လူထုအုံကြွမှုကြောင့် အဓမ္မကျင့်သတ်ဖြတ်မှုတစ်ခုကို အိန္ဒိယက ခုံရုံးဖွဲ့ စစ်ဆေးမည်

ဒီဇင်ဘာ ၃၊ ၂၀၁၉
M-Media

-ပြီးခဲ့တဲ့တစ်ပတ်က တိရစ္ဆာန်ဆရာဝန်တစ်ဦး အဓမ္မကျင့်သတ်ဖြတ်ခံရမှုအတွက် အထူးခုံရုံးဖွဲ့ကာ အလျင်အမြန် စစ်ဆေးသွားမယ်လို့ အိန္ဒိယနိုင်ငံတောင်ပိုင်း တီလန်ဂါနာပြည်နယ် အုပ်ချုပ်ရေးမှူးက ပြောကြားလိုက်ပါတယ်။

အသက် ၂၇ နှစ်အရွယ် အမျိုးသမီးဟာ ဟိုက်ဒရာဘတ်မြို့မှာ ဗုဒ္ဓဟူးနေ့က ပြန်ပေးဆွဲ အဓမ္မပြုကျင့် ခံခဲ့ရတာ ဖြစ်ပါတယ်။ ကျူးလွန်သူတွေဟာ ဒီအမျိုးသမီးကို သတ်ဖြတ်ပြီး စောင်နဲ့ပတ်ကာ ရေနံဆီလောင်း မီးရှို့ခဲ့ပါတယ်။

ရဲတပ်ဖွဲ့ရဲ့ ကိုင်တွယ်မှုတွေကို ပြည်သူလူထုက မကျေနပ်တာကြောင့် စနေနေ့မှာ ဟိုက်ဒရာဘတ် ရဲစခန်းကို၀ိုင်းကာ ဆန္ဒပြခဲ့ကြပါတယ်။

တီလန်နာဂါပြည်နယ် အုပ်ချုပ်ရေးမှူး ချန်ဒရာရှီခါ ရာအိုက ဒီသတ်ဖြတ်မှုဟာ လူမဆန်တဲ့လုပ်ရပ်ဖြစ်တယ်လို့ဆိုပြီး အထူးခုံရုံးဖွဲ့ကာ ကျူးလွန်သူတွေကို ပြင်းပြင်းထန်ထန် အပြစ်ပေးသွားမယ်လို့ ပြောကြားခဲ့ပါတယ်။ ဒီကိစ္စနဲ့ပတ်သက်ပြီး လူသိရှိကြား ရှုတ်ချခြင်းမရှိတဲ့အတွက် ရာအိုဟာ အရင်က ဝေဖန်ခံခဲ့ရပါတယ်။

လက်ရှိမှာတော့ ဒီသတ်ဖြတ်မှုအတွက် လူ ၄ ဦးကို အိန္ဒိယရဲတပ်ဖွဲ့က ဖမ်းဆီးထားပါတယ်။

၂၀၁၂ ခုနှစ်က မြို့တော်ဒေလီမှာ ကျောင်းသူတစ်ဦး ဘတ်စ်ကားပေါ်မှာ အုပ်စုဖွဲ့ အဓမ္မကျင့် သတ်ဖြတ်ခံရမှု ဖြစ်ပွားခဲ့ပြီးတဲ့နောက် အိန္ဒိယအစိုးရရဲ့ ဒီကိစ္စအပေါ် ကိုင်တွယ်မှုတွေအပေါ် နိုင်ငံတကာက အာရုံစိုက်လာကြပါတယ်။ နောက်ဆက်တွဲအဖြစ် မုဒိမ်းမှုအတွက် ဥပဒေဆိုင်ရာ ပြုပြင်ပြောင်းလဲမှုတွေ လုပ်ဆောင်ခဲ့ပေမယ့် ထိရောက်မှု မရှိပါဘူး။

၂၀၁၇ ခုနှစ်တွင်း နိုင်ငံတစ်ဝှမ်း အဓမ္မကျင့်မှုပေါင်း ၃၂၀၀၀ လောက် ဖြစ်ပွားခဲ့တယ်လို့ အစိုးရမှတ်တမ်းတွေမှာ ဖော်ပြပြီး ကျွမ်းကျင်သူတွေကတော့ အရေအတွက်ဟာ ဒီထက်ပိုပြီး များပြားနိုင်တယ်လို့ ပြောကြားခဲ့ပါတယ်။

Ref: Aljazeera