အိန္ဒိယတွင် အဓမ္မမှုတစ်ခုမှ တရားလိုအမျိုးသမီး အရှင်လတ်လတ် မီးရှို့ခံရ

ဒီဇင်ဘာ ၅၊ ၂၀၁၉
M-Media

-အိန္ဒိယနိုင်ငံမြောက်ပိုင်း အူတာပရာဒက်ရှ်ပြည်နယ်မှာ အဓမ္မကျင့်ခံရတဲ့ အမျိုးသမီးတစ်ဦးဟာ တရားရုံးအသွား လမ်းမှာ ဖမ်းဆီးမီးရှို့ခံခဲ့ရပါတယ်။

အသက် ၂၃ နှစ်အရွယ် အဲဒီအမျိုးသမီးဟာ မတ်လက အဓမ္မပြုကျင့်ခံခဲ့ရတာဖြစ်ပြီး အဲဒီအတွက် အမျိုးသား ၂ ကို တရားစွဲဆိုထားတာပါ။ ဒီကနေ့ ရုံးချိန်းအသွား ဘူတာရုံအနီးမှာ အမျိုးသားတစ်စုက သူမကို ဖမ်းဆီးပြီး မီးရှို့ခဲ့တာဖြစ်ပါတယ်။

ရဲတပ်ဖွဲ့ကတော့ သူမနဲ့ တရားရင်ဆိုင်နေရတဲ့ အမျိုးသား ၂ ဦးအပါအဝင် လူ ၅ ဦးကို မီးရှို့မှုအတွက် ဖမ်းဆီးထားတယ်လို့ ပြောကြားခဲ့ပါတယ်။ သူမရဲ့ခန္ဓာကိုယ် ၉၀ ရာခိုင်နှုန်း မီးလောင်ကျွမ်းဒဏ်ရာ ရရှိခဲ့ပြီး ဆေးကုသဖို့အတွက် မြို့တော်ဒေလီကို ပို့ဆောင်ဖို့ လိုအပ်တယ်လို့ ပြည်နယ်ဆေးရုံက ပြောကြားခဲ့ပါတယ်။

သမိုင်းနဲ့ဆိုး

အူတာပရာဒက်ရှ်ပြည်နယ်က အခုဖြစ်ရပ်ဖြစ်ပွားတဲ့ အူနာအိုခရိုင်ဟာ အရင်ကလည်း အဓမ္မမှုနဲ့ တရားစွဲတဲ့သူတွေကို လုပ်ကြံသတ်ဖြတ်တဲ့သမိုင်း ရှိခဲ့ပါတယ်။

အာဏာရ BJP ပါတီက အမတ်တစ်ဦးကို အဓမ္မကျင့်မှုနဲ့ တရားစွဲထားတဲ့ အမျိုးသမီးဟာ ဇူလိုင်လက ကားမတော်တဆမှုဖြစ်ပွားကာ ဒဏ်ရာ ပြင်းပြင်းထန်ထန် ရခဲ့ပါတယ်။ အဲဒီအတွက် ရဲတပ်ဖွဲ့ဟာ BJP အမတ်ကို လူသတ်မှုနဲ့ ထပ်မံစစ်ဆေးနေပါတယ်။

အမျိုးသမီးရဲ့ အဒေါ် ၂ ဦးကတော့ သေဆုံးခဲ့ပြီး ရှေ့နေဟာ ဒဏ်ရာရရှိခဲ့ပါတယ်။

ပြီးခဲ့တဲ့တစ်ပတ်အတွင်း အိန္ဒိယနိုင်ငံတစ်ဝှမ်း အုပ်စုဖွဲ့အဓမ္မကျင့် သတ်ဖြတ်မှုတစ်ချို့ကြောင့် လူထုအုံကြွမှုတွေ ဖြစ်ပေါ်ခဲ့ပါတယ်။

ဟိုက်ဒရာဘတ်မြို့မှာ အသက် ၂၇ နှစ်အရွယ် အမျိုးသမီးတစ်ဦး နိုဝင်ဘာ ၂၇ ရက်နေ့က အုပ်စုဖွဲ့ အဓမ္မကျင့် သတ်ဖြတ်ခံခဲ့ရကာ၊ မီးရှို့ အလောင်းဖျောက်ဖျက်ခံခဲ့ရတာကြောင့် နိုင်ငံတစ်ဝှမ်းမှာ ပြည်သူတွေက ဆန္ဒပြခဲ့ကြပါတယ်။

နိုင်ငံရဲ့ ရာဇဝတ်မှုကိန်းဂဏန်းတွေအရ အိန္ဒိယနိုင်ငံမှာ တစ်နေ့ကို အဓမ္မကျင့်မှုပေါင်း ၁၀၀ နီးပါးလောက် ဖြစ်ပွားတာကို တွေ့မြင်ရပါတယ်။ ဒီအမှုတွေကို ထိထိရောက်ရောက် မကိုင်တွယ်နိုင်မှုအတွက်လည်း အိန္ဒိယအစိုးရဟာ ပြည်တွင်း၊ ပြည်ပရဲ့ ဝေဖန်မှုတွေကို ခံနေရပါတယ်။

Ref: BBC