တရုတ်ရှိ ကမ္ဘာ့အကြီးဆုံး တယ်လီစကုပ် စမ်းသပ်အသုံးပြုမှုကာလ ပြီးဆုံးတော့မည်

ဒီဇင်ဘာ ၈၊ ၂၀၁၉
M-Media

-တရုတ်နိုင်ငံက ကမ္ဘာ့အကြီးဆုံး ရေဒီယို တယ်လီစကုပ်ရဲ့ စမ်းသပ်အသုံးပြုမှုကာလဟာ ပြီးဆုံးတော့မှာဖြစ်ပြီး နေအဖွဲ့အစည်းအပြင်က အရာ၀တ္ထုတွေ၊ အသံတွေ တော်တော်များများကို တွေ့ရှိ ဖမ်းယူထားနိုင်တယ်လို့ သိပ္ပံပညာရှင်တွေက ပြောကြားလိုက်ပါတယ်။

နိုင်ငံတောင်ပိုင်း ကွေ့ကျိုးပြည်နယ်မှာ တည်ရှိပြီး FAST လို့ အမည်ပေးထားတဲ့ အဲဒီ တယ်လီစကုပ်ဟာ အချင်း မီတာ ၅၀၀ ရှိပြီး အာကာသထဲမှာ စူးစမ်းထောက်လှမ်းဖို့အပြင် အခြားလုပ်ငန်းအများအပြားကိုလည်း လုပ်ဆောင်နိုင်ပါတယ်။ တရုတ်ဟာ ဒီတယ်လီစကုပ် စမ်းသပ်အသုံးပြုမှုကို ၂၀၁၆ ခုနှစ် စက်တင်ဘာ လကတည်းက စတင်ခဲ့တာပါ။

တရုတ်ရုပ်သံ CCTV က FAST ဟာ လက်ရှိအချိန်အထိ လျင်မြန်တဲ့အရှိန်တဲ့ လည်ပတ်နေတဲ့ နူထရွန်ကြယ် (pulsar) ၉၉ ခုကို ရှာဖွေတွေ့ရှိထားတယ်လို့ ဖော်ပြခဲ့ပါတယ်။ FAST က သိပ္ပံဆိုင်ရာသုတေသန ဒါရိုက်တာ ကျူမင်းက လူသား၊ ဒါမှမဟုတ် အာကာသထဲက အခြားရင်းမြစ်တွေကနေ ထွက်လာတယ်လို့ ယူဆရတဲ့ အသံတွေကို ဖမ်းယူရရှိထားကြောင်း၊ ၉၉ ရာခိုင်နှုန်းလောက်ဟာ ဆူညံသံတွေဖြစ်ပြီး အဲဒီအထဲက လိုချင်တာတွေကို ရွေးထုတ်လေ့လာဖို့ လိုအပ်ကြောင်း ပြောကြားခဲ့ပါတယ်။

FAST ရဲ့ လေ့လာမှုကနေ ရရှိထားတဲ့ အချက်အလက်တွေကို နိုင်ငံတစ်ဝှမ်းက နက္ခတဗေဒပညာရှင်ပေါင်း ၁၀၀ ကျော်ကို မကြာသေးခင်ကပဲ ခေါ်ယူရှင်းပြခဲ့ပါတယ်။ FAST တယ်လီစကုပ်နဲ့ pulsar ကြယ်စင်တန်းတွေအကြောင်းကို ပိုမိုလေ့လာဖို့လည်း ရှိနေပါတယ်။

အရင်က စနစ် ၃ ခုနဲ့ သုတေသန လုပ်နေရာကနေ ဒီတယ်လီစကုပ်ကြောင့် သိပ္ပံပညာရှင်တွေဟာ စနစ် ၁၀ ခုနဲ့ လုပ်ဆောင်လာနိုင်ပြီး တယ်လီစကုပ်ကနေ အချက်အလက်တွေ ထပ်မံရယူနိုင်မယ့် ကိရိယာတွေကိုလည်း လေ့လာတီထွင်နေပါတယ်။

Ref: space.com