လက်နက်ကိုင်အဖွဲ့ရန်ကြောင့် အီဘိုလာကုသရေးအဖွဲ့ ကွန်ဂိုရှိ ဒေသတစ်ခုမှ ထွက်ခွာ

ဒီဇင်ဘာ ၉၊ ၂၀၁၉
M-Media

-အီဘိုလာရောဂါ ကုသပေးနေတဲ့ ဝန်ထမ်းတွေ အသတ်ခံခဲ့ရတာနဲ့ တုတ်ဓားကိုင်လူအုပ်က သူတို့ရဲ့ စင်တာကို ဖျက်ဆီးဖို့ ကြိုးစားလာတာကြောင့် ဝန်ထမ်းတွေကို ကွန်ဂိုနိုင်ငံအရှေ့ပိုင်းကနေ ထွက်ခွာခိုင်းလိုက်တယ်လို့ နယ်စည်မခြားဆရာဝန်များအဖွဲ့ (MSF) က ပြောကြားလိုက်ပါတယ်။

ပြီးခဲ့တဲ့သီတင်းပတ်အတွင်း ဘီယာကာတိုဒေသမှာ ကျန်းမာရေးဝန်ထမ်း ၃ ဦး အသတ်ခံခဲ့ရပါတယ်။ အဲဒီနောက်ပိုင်း ကမ္ဘာ့ကျန်းမာရေးအဖွဲ့ WHO က သူတို့ရဲ့ ဝန်ထမ်းတွေကို အဲဒီဒေသကနေ ထွက်ခွာခိုင်းခဲ့ပါတယ်။

MSF က သူတို့ အီဘိုလာကုသရေးစင်တာအဖြစ် အသုံးပြုနေတဲ့ ဘီယာကာတို ကျန်းမာရေးစောင့်ရှောက်မှုစင်တာကို တုတ်ဓားကိုင်လူအုပ်က အင်္ဂါနေ့မှာ ဝင်ရောက်ဖို့ကြိုးစားခဲ့တယ်လို့ ပြောကြားခဲ့ပါတယ်။ လူအုပ်ဟာ စင်တာထဲကို မဝင်နိုင်ခဲ့ဘဲ ဒီအဖြစ်အပျက်အတွင်း ထိခိုက်ဒဏ်ရာရသူတွေလည်း မရှိပါဘူး။

အခြားအုပ်စုတစ်ခုကလည်း ဘီယာကာတိုက မိုင်းစ်ဒေသမှာ MSF ရဲ့စင်တာတစ်ခုကို ဖျက်ဆီးဖို့ ကြိုးစားခဲ့ပါတယ်။

MSF က ထုတ်ပြန်တဲ့ ကြေငြာချက်မှာ ဒေသတွင်း လုံခြုံရေးဆိုင်ရာအခြေအနေ ဆိုးရွားလာတာကြောင့် မိမိတို့ရဲ့ နိုင်ငံခြားသား ဝန်ထမ်းအားလုံးကို ထွက်ခွာခိုင်းလိုက်တယ်လို့ ဖော်ပြထားပါတယ်။

ကွန်ဂိုအာဏာပိုင်တွေက ပြီးခဲ့တဲ့တစ်ပတ် ကျန်းမာရေးဝန်ထမ်း ၃ ဦးကို သတ်ဖြတ်မှုဟာ မာယီ-မာယီ လက်နက်ကိုင် အုပ်စုက လုပ်ဆောင်တာဖြစ်တယ်လို့ ပြောကြားခဲ့ပါတယ်။ မာယီ-မာယီ လက်နက်ကိုင်အဖွဲ့ဟာ တိုင်းပြည်ရဲ့ ခွဲဝေပေးရေး တိုက်ပွဲဝင်နေတဲ့ အဖွဲ့ ဖြစ်ပါတယ်။

အခုတစ်ကြိမ် အီဘိုလာရောဂါဖြစ်ပွားမှုဟာ ကွန်ဂိုနိုင်ငံမှာ ၁၀ ကြိမ်မြောက်ဖြစ်ပြီး ထိခိုက်သေဆုံးမှုအရေအတွက်ကတော့ ဒုတိယမြောက်အများဆုံး ဖြစ်ပါတယ်။

Ref: Aljazeera