အငြင်းပွားဖွယ် နိုင်ငံသားပြင်ဆင်ချက်ကို အိန္ဒိယအတည်ပြု၊ တိုင်းရင်းသားများ စိုးရိမ်

ဒီဇင်ဘာ ၁၂၊ ၂၀၁၉
M-Media

-အိမ်နီးချင်း ၃ နိုင်ငံက အဖိနှိပ်ခံ လူနည်းစုတွေကို နိုင်ငံသားပေးမယ့် အငြင်းပွားဖွယ် နိုင်ငံသားဥပဒေ ပြင်ဆင်ချက်တစ်ခုကို အိန္ဒိယလွှတ်တော်က မနေ့မှာ အတည်ပြုလိုက်ပြီး ဝေဖန်မှုတွေ၊ ဆန္ဒပြမှုတွေလည်း ထွက်ပေါ်လာပါတယ်။

အဲဒီ နိုင်ငံသားဥပဒေအသစ်အရ ပါကစ္စတန်၊ အာဖဂန်နစ္စတန်နဲ့ ဘင်္ဂလားဒေ့ရှ်နိုင်ငံတွေမှာ ဖိနှိပ်ခံရတဲ့ လူနည်းစု ဟိန္ဒူ၊ ဗုဒ္ဓဘာသာ၊ ဂျိန်း၊ ပါစစ်နဲ့ ခရစ်ယာန်တွေဟာ ၂၀၁၅ ခုနှစ်အရင် အိန္ဒိယနိုင်ငံကို ရောက်ရှိနေထိုင်ခဲ့မယ်ဆိုရင် နိုင်ငံသားလျှောက်ထားနိုင်မှာ ဖြစ်ပါတယ်။

ဝေဖန်သူတွေ လူ့အခွင့်အရေးအဖွဲ့တွေကတော့ ဒီဥပဒေဟာ မွတ်စလင်တွေအပေါ် ခွဲခြားဆက်ဆံမှုကို အခြေခံတဲ့အတွက် အိန္ဒိယနိုင်ငံရဲ့ ဘာသာရေးမစွက်တဲ့ အခြေခံဥပဒေကို ဖောက်ဖျက်ရာရောက်တယ်လို့ ဝေဖန်ခဲ့ကြပါတယ်။ ဥပဒေမူကြမ်းကို အာဏာရ ဟိန္ဒူအမျိုးသားရေးပါတီ BJP က တင်သွင်းတာ ဖြစ်ပါတယ်။

ပြည်ထဲရေးဝန်ကြီး အေမစ်ရှားက ဒီဥပဒေသစ်ကြောင့် နိုင်ငံသားမွတ်စလင်တွေ စိုးရိမ်စရာမလိုကြောင်း၊ ဥပဒေဟာ နိုင်ငံသားပေးဖို့ဖြစ်ပြီး နိုင်ငံသားရုပ်သိမ်းဖို့မဟုတ်ကြောင်း လွှတ်တော်မှာ ပြောကြားခဲ့ပါတယ်။ လွှတ်တော်ထဲက အတိုက်အခံပါတီ အမတ်တွေက ဥပဒေသစ်အတွက် တရားရုံးမှာ ရင်ဆိုင်သွားမယ်လို့ ဆိုပါတယ်။

“ဒီ နိုင်ငံသားဥပဒေ ပြင်ဆင်ချက်ဟာ ဗဟုဝါဒ အိန္ဒိယနိုင်ငံမှာရှိနေတဲ့ အမြင်ကျဉ်းမြောင်းသူတွေ၊ အမုန်းတရားအခြေခံတဲ့ အင်အားစုတွေရဲ့ အောင်ပွဲပဲဖြစ်ပါတယ်” လို့ အတိုက်အခံ ကွန်ဂရက်ပါတီခေါင်းဆောင် ဆိုနီယာဂန္ဒီက ပြောကြားခဲ့ပါတယ်။

ဝန်ကြီးချုပ် နရန်ဒရာမိုဒီက ဒီပြင်ဆင်ချက်ကို အတည်ပြုလိုက်နိုင်တာဟာ အိန္ဒိယနိုင်ငံအတွက် သမိုင်းမှတ်တိုင်တစ်ခုဖြစ်ပြီး နှစ်ပေါင်းများစွာ ဖိနှိပ်ချုပ်ခြယ်မှုဒဏ် ခံနေရတဲ့ လူနည်းစုတွေရဲ့ ခံစားမှုတွေကို လျော့ပါးစေလိမ့်မယ်လို့ ပြောကြားခဲ့ပါတယ်။

တိုင်းရင်းသားလူမျိုးစုများပြားတဲ့ အရှေ့မြောက်ပိုင်းအပါအဝင် အိန္ဒိယနိုင်ငံတစ်ဝှမ်းမှာ ဒီပြဌာန်းမှုကို ဆန့်ကျင်တဲ့ ဆန္ဒပြမှုတွေလည်း ပေါ်ပေါက်လာပါတယ်။ ဥပဒေသစ်ကြောင့် ဘင်္ဂလားဒေ့ရှ်ကနေ တရားမဝင်ဝင်ရောက်လာတဲ့ ဟိန္ဒူတွေ နိုင်ငံသားရသွားကာ ဒေသခံတိုင်းရင်းသားတွေအပေါ် လွှမ်းမိုးသွားမှာကို အိန္ဒိယအရှေ့မြောက်ပိုင်းက လူမျိုးစုတွေက စိုးရိမ်နေ‌ကြတာ ဖြစ်ပါတယ်။

Ref: Aljazeera