ဘာဘရီဗလီကိစ္စ မွတ်စလင်များ၏ အသနားခံစာကို အိန္ဒိယတရားရုံးချုပ် ပယ်ချ

ဒီဇင်ဘာ ၁၃၊ ၂၀၁၉
M-Media

-နိုင်ငံမြောက်ပိုင်း အယွတ်ဒယမြို့က ဖျက်ဆီးခံထားရတဲ့ ဘာဘရီဗလီနဲ့ပတ်သက်ပြီး တရားရုံးချုပ်ရဲ့ ဆုံးဖြတ်ချက်ကို ပြန်လည်သုံးသပ်ဖို့ မွတ်စလင်တွေရဲ့ အသနားခံစာတင်ထားမှုကို တရားရုံးချုပ်က ပယ်ချလိုက်ပါတယ်။

၁၆ ရာစုကတည်းက ဆောက်လုပ်ထားတဲ့ အဲဒီဗလီဟာ ရာမနတ်ဘုရားမွေးဖွားရာနေရာ ဖြစ်တယ်လို့ ဟိန္ဒူတွေက ၁၉၄၉ ခုနှစ်မှာ စတင်စွပ်စွဲခဲ့ပြီး ၁၉၉၂ ခုနှစ်မှာတော့ ဖျက်ဆီး ဖြိုချခဲ့ပါတယ်။

နိုဝင်ဘာ ၉ ရက်နေ့ တရားရုံးချုပ်ရဲ့ နောက်ဆုံး ဆုံးဖြတ်ချက်မှာ ဘာဘရီဗလီနေရာကို ဟိန္ဒူ‌ေတွထံပေးကာ ဘုရားကျောင်းတစ်ခုတည်ဆောက်ဖို့ အမိန့်ချခဲ့ပြီး မွတ်စလင်တွေကိုတော့ အယွတ်ဒယမြို့က အခြားနေရာမှာ မြေ ၅ ဧက ပေးရမယ်လို့ ဆိုပါတယ်။

ဒီဆုံးဖြတ်ချက်ဟာ တရားမျှတမှုမရှိဘဲ၊ အိန္ဒိယက မွတ်စလင်လူ့အဖွဲ့အစည်းကို ထိခိုက်နစ်နာစေတယ်လို့ဆိုကာ ပြန်လည်သုံးသပ်ပေးဖို့ မွတ်စလင်အဖွဲ့အစည်းတွေက အသနားခံစာ ၁၈ ခု တင်ခဲ့တာဖြစ်ပါတယ်။

၅ ဦးပါ ခုံအဖွဲ့ကို ဦးဆောင်တဲ့ တရားသူကြီးချုပ် အက်စ်အေ ဘော့ဘ်ဒီက ဒီအသနားခံစာတွေကို အသေအချာ ကြည့်ရှုစစ်ဆေးခဲ့ပေမယ့် ခိုင်မာမှုမရှိတဲ့အတွက် ပယ်ချလိုက်တာဖြစ်တယ်လို့ ထုတ်ပြန်ခဲ့ပါတယ်။

အသနားခံစာကို အခုလို ပယ်ချလိုက်တာကြောင့် ဆုံးဖြတ်ချက်မှာ ချို့ယွင်းချက်တွေရှိနေပြီး ဒါတွေကို သုံးသပ်ပြုပြင်ပေးဖို့ ဥပေဒကြောင်းအရ တောင်းဆိုနိုင်မယ့် နည်းလမ်းတစ်ခုသာ ကျန်ရှိပါတော့ပါတယ်။

ဘာဘာရီဗလီကို ဟိန္ဒူတွေထံပေးခဲ့တဲ့ တရားရုံးချုပ်ရဲ့ ဆုံးဖြတ်ချက်ဟာ ဝန်ကြီးချုပ်မိုဒီရဲ့ အာဏာရ ဟိန္ဒူအမျိုးသားရေးပါတီ BJP ရဲ့ အဓိကအောင်ပွဲတစ်ခု ဖြစ်ပါတယ်။ ဗလီနေရာမှာ ဟိန္ဒူဘုရားကျောင်းတစ်ခု ဆောက်လုပ်ဖို့ ဆောင်ရွက်မယ်လို့ မိုဒီက ရွေးကောက်ပွဲတိုင်းမှာ ပြောကြားခဲ့တာပါ။

Ref: Aljazeera