အမေရိကန်တွင် ဂျူးဆန့်ကျင်ရေးတိုက်ခိုက်မှု စိုးရိမ်စရာကောင်းလာ

ဒီဇင်ဘာ ၁၃၊ ၂၀၁၉
M-Media

-နယူးဂျာစီပြည်နယ်က ဂျူးစျေးတစ်ခုမှာ အခုတစ်ပတ်အတွင်း ပစ်ခတ်မှုတစ်ခု ဖြစ်ပွားခဲ့ပြီးတဲ့နောက် အမေရိကန်မှာ ဂျူးတွေအပေါ် မုန်းတီးမှုနဲ့ပတ်သက်ပြီး စိုးရိမ်စရာဖြစ်လာတယ်လို့ ကျွမ်းကျင်သူတွေက သုံးသပ်ခဲ့ကြပါတယ်။

နယူးဂျာစီစီးတီးက ဂျူးအသားစျေးကို ဇနီးမောင်နှံလို့ ယူဆရတဲ့ အမျိုးသားနဲ့ အမျိုးသမီး ၂ ဦးက ဝင်ရောက်ပစ်ခတ်ခဲ့တာပါ။ ရဲတွေနဲ့ အပြန်အလှန်ပစ်ခတ်မှု ဖြစ်ပွားခဲ့ပြီး စျေးဆိုင်ထဲက လူ ၃ ဦး၊ ရဲတပ်ဖွဲ့ဝင်တစ်ဦး သေဆုံးခဲ့ပါတယ်။ သေနတ်သမား ၂ ဦးကိုတော့ ရဲတပ်ဖွဲ့က အသေပစ်သတ်ခဲ့ပါတယ်။

သေနတ်သမားတွေဟာ လူဖြူတွေနဲ့ ဂျူးတွေအပေါ် မလိုမုန်းထားတဲ့ Black Hebrew Israelites လှုပ်ရှားမှုက အဖွဲ့ဝင်တွေဖြစ်တယ်လို့ အမည်မဖော်လိုတဲ့ တာဝန်ရှိသူတစ်ဦးက ပြောကြားခဲ့ပါတယ်။ နယူးဂျာစီစီးတီး မြို့တော်ဝန် စတီဗ် ဖူလော့ပ်ကလည်း သေနတ်သမား ၂ ဦးဟာ ဗန်ကားခိုးပြီး ဂျူးအသားစျေးကို အတိအကျ ပစ်မှတ်ထားတိုက်ခိုက်ခဲ့တဲ့အတွက် ဒါဟာ ဂျူးတွေအပေါ် အမုန်းရာဇဝတ်မှုဖြစ်တယ်လို့ ပြောကြားခဲ့ပါတယ်။

ပြည်နယ်နဲ့ ဖက်ဒရယ်ရဲတပ်ဖွဲ့ကတော့ တိုက်ခိုက်မှုနောက်ကွယ်က အကြောင်းအရင်းကို တိတိကျကျ မသိရသေးဘဲ စုံစမ်းစစ်ဆေးနေဆဲပဲလို့ ပြောကြားခဲ့ပါတယ်။ ဒီကိစ္စနဲ့ဆက်စက်ပြီး Black Hebrew အဖွဲ့ရဲ့ ရုံးချုပ်ဖြစ်တဲ့ နယူး‌ယောက်ဆင်ခြေဖုံးက Israelite Church of God in Jesus Christ ခရစ်ယာန်အသင်းကို FBI က ဝင်ရောက် ရှာဖွေခဲ့ကြပါတယ်။

နယူးယောက်မြို့တော်ဝန် ဘီလ် ဒီ ဘလာစီယိုက နယူးယောက်မှာရှိတဲ့ ဂျူးဘုရားကျောင်းတွေနဲ့ ဂျူးအသင်းအဖွဲ့တွေ ပိုမို ကာကွယ်စောင့်ရှောက်ပေးသွားမယ်လို့ ပြောကြားခဲ့ပါတယ်။

၂၀၁၈ ခုနှစ် အောက်တိုဘာလက ပင်ဆဲလ်ဗားနီးယားပြည်နယ် ပစ္စဘာ့ဂ်မြို့ ဂျူးဘုရားကျောင်းတစ်ခုမှာဖြစ်ပွားခဲ့တဲ့ သေနတ်ပစ်မှုဟာ အမေရိကန်သမိုင်းမှာ ဂျူးတွေကို ပစ်မှတ်ထားတဲ့ အဆိုးဝါးဆုံးတိုက်ခိုက်မှု ဖြစ်ခဲ့ပါတယ်။ အဲဒီအဖြစ်အပျက်အတွင်း လူ ၁၁ ဦး သေဆုံးခဲ့ပါတယ်။

ပြီးခဲ့တဲ့ ဧပြီလကလည်း ဆန်ဒီယေဂို‌မြို့မြောက်ဖက်က ဂျူးဘုရားကျောင်းတစ်ခုကို သေနတ်သမား တစ်ဦးက ဝင်ရောက်ပစ်ခတ်မှုကြောင့် အမျိုးသမီး ၁ ဦးသေဆုံးကာ ဂျူးဘုန်းကြီးနဲ့ အခြား ၂ ဦး ဒဏ်ရာ ရရှိခဲ့ပါတယ်။

Ref: AP