ပြည်တွင်းဖြစ် စာပို့ဒရုန်းနှင့် လူသားစက်ရုပ်ကို အီရန် ထုတ်ပြ

ဒီဇင်ဘာ ၁၇၊ ၂၀၁၉
M-Media

-ပြည်တွင်းမှာ တီထွင်ထုတ်လုပ်ပြီး စာနဲ့ ခြားပစ္စည်းတွေ ပို့ဆောင်ပေးနိုင်မယ့် ဒရုန်းလေယာဉ်တစ်ခုနဲ့ သုတေသနလုပ်နိုင်မယ့် လူသားစက်ရုပ်တစ်ခုကို အီရန်က ပြီးခဲ့တဲ့တစ်ပတ်မှာ ထုတ်ပြလိုက်ပါတယ်။

ကြာသာပတေးနေ့က ထုတ်ပြခဲ့တဲ့ စာပို့ဒရုန်းဟာ ဗဟိုထိန်းချုပ်မှုစနစ်၊ လမ်းကြောင်းရှာစနစ်နဲ့ ပါဆယ်ပို့ဆောင်ရေးစနစ်တွေ ပါဝင်ပါတယ်။ အီရန်ဆက်သွယ်ရေးဝန်ကြီးက ပါဆယ်တွေပို့ဆောင်နိုင်တဲ့ ဒီဒရုန်းကို အရပ်ဖက်မှာ အသုံးပြုသွားမယ်လို့ ပြောကြားခဲ့ပါတယ်။

အီရန်ကြက်ခြေနီအဖွဲ့ကလည်း အရေးပေါ် သက်ကယ်အကူအညီတွေပို့ဆောင်မှုမှာ ရဟတ်ယာဉ်တွေအစား ပိုမိုအကုန်အကျသက်သာပြီး ခရီးရောက်မယ့် ဒီဒရုန်းကို အသုံးပြုဖို့ စဉ်းစားနေတယ်လို့လည်း ဝန်ကြီးက ထည့်သွင်းပြောဆိုခဲ့ပါတယ်။

ပြည်တွင်းဖြစ် စာပို့ဒရုန်းကို အီရန်က ထုတ်ပြပြီးပြီးချင်းမှာပဲ တူရကီ အစိုးရစာတိုက်လုပ်ငန်းက စိတ်ဝင်စားကြောင်း လာရောက်ပြောဆို ဆက်သွယ်ခဲ့တယ်လို့ ဆိုပါတယ်။

လူသားစက်ရုပ်

အီရန်သုတေသနပညာရှင်တွေဟာ စနေနေ့က မြို့တော်တီဟီရန်မှာ လူသားစက်ရုပ် Surena III ကိုလည်း ထုတ်ပြခဲ့ပါတယ်။

အရပ် ၆ ပေ ၃ လက်မရှိတဲ့ အဲဒီစက်ရုပ်ဟာ Kinect အခြေခံတဲ့ 3D vision module ကို အသုံးပြုထားပြီး ဆာဗိုမော်တာ ၃၁ လုံး တပ်ဆင်ထားပါတယ်။ စက်ရုပ်မှာ အသုံးပြုတဲ့ ဆော့ဖ်ဝဲဟာ လူကြိုက်များတဲ့ Robot Operating System (ROS) ဖြစ်ကာ လူသားက စောင့်ကြည့်ထိန်းချုပ်မှု စနစ်လည်း ပါဝင်ပါတယ်။

Surena စက်ရုပ်တီထွင်ရေး စီမံကိန်းကို ဦးစီးနေတဲ့ စက်မှုအင်ဂျင်နီယာ ပရော်ဖက်ဆာ ဒေါက်တာ အဂ်ဟီလ် ယူဆီဖီ-ကိုမာက စက်ရုပ်ကို သုတေသနလုပ်ငန်းအတွက် ရည်ရွယ် ဖန်တီးတာဖြစ်ပြီး ခြေနှစ်ချောင်းလှုပ်ရှားမှု၊ လူသားနဲ့ စက်ရုပ် ဆက်သွယ်ပြောဆိုမှုတွေအပါအဝင် စက်ရုပ်နည်းပညာက စိန်ခေါ်မှုတွေကို ဖော်ထုတ်ဖြေရှင်းဖို့ဖြစ်တယ်လို့ ပြောကြားခဲ့ပါတယ်။

မိတ်ဆက်ပြသပွဲမှာ Surena III ဟာ လမ်းလျှောက်တာ လူသားရဲ့ လက်ပုံသဏ္ဍာန်အတိုင်း လှုပ်ရှားတာ လူသားနဲ့ ဆက်သွယ်ပြောဆိုတာတွေ လုပ်ဆောင်ပြခဲ့ပါတယ်။

Ref: Press TV, Spectrum