တရုတ်ကို‌ အောက်မကျို့ရဟု NLD တာဝန်ရှိသူ ပြော

ဒီဇင်ဘာ ၁၇၊ ၂၀၁၉
M-Media

-တရုတ်နိုင်ငံနဲ့ ရရှိတဲ့ သဘောတူညီချက်တွေမှာ အစိုးရဖက်က အောက်ကျို့ရတာမရှိဘဲ ညီတူညီမျှသာဖြစ်တယ်လို့ အာဏာရ အမျိုးသားဒီမိုကရေစီအဖွဲ့ချုပ် (NLD) ရဲ့ ဗဟိုပြန်ကြားရေးကော်မတီအတွင်းရေးမှူး မုံရွာအောင်ရှင်က ပြီးခဲ့တဲ့တစ်ပတ်မှာ ပြောကြားခဲ့ပါတယ်။

NLD အစိုးရဟာ အနောက်နိုင်ငံတွေနဲ့ ပိုမိုနီးကပ်တဲ့ဆက်ဆံရေးမျိုး တည်ဆောက်နိုင်မယ်လို့ ထင်ခဲ့ကြပေမယ့် တရုတ်နဲ့ ပိုမိုပြီး ဆက်ဆံရေးကောင်းမွန်လာတာကြောင့် ပြည်တွင်းပြည်ပ ကျွမ်းကျင်သူတွေက အံ့အားသင့်ခဲ့ရတယ်လို့ မုံရွာအောင်ရှင်က ဆိုပါတယ်။

“ကြိုက်ကြိုက်မကြိုက်ကြိုက် အိမ်နီးချင်းနိုင်ငံတွေနဲ့ ကောင်းမွန်တဲ့ဆက်ဆံရေးရှိဖို့ လိုအပ်ပါတယ်။ ဒေါ်အောင်ဆန်းစုကြည် ပြောသလိုပဲ အိမ်နီးချင်းတွေနဲ့အဆင်မပြေရင် အိမ်‌ပြောင်းလို့ရပေမယ့် နိုင်ငံတစ်ခုမှာတော့ ဒီလိုပြောင်းလို့ မရပါဘူး”

အစိုးရဟာ တရုတ်အပေါ် အောက်ကျို့ရတဲ့ ဆက်ဆံရေးမျိုး မရှိဘဲ win-win အခြေအနေမျိုးသာ ဖြစ်တယ်လို့လည်း သူက ထည့်သွင်းပြောကြားခဲ့ပါတယ်။

မြန်မာနိုင်ငံရဲ့ ငြိမ်းချမ်းရေးလုပ်ငန်းစဉ်မှာ တရုတ်ဟာ ထဲထဲဝင်ဝင် ပါဝင်နေကြောင်း၊ မြန်မာနိုင်ငံဟာ အိန္ဒိယသမုဒ္ဒရာနဲ့ ယူနန်ပြည်နယ်ကြားမှာ တည်ရှိပြီး တောင်အာရှနိုင်ငံတွေအတွက် ဝင်ပေါက်ဖြစ်ကာ၊ BRI စီမံကိန်းအတွက် အဓိကကျနေတာကြောင့် တရုတ်အတွက် မြန်မာနိုင်ငံက အရေးပါနေကြောင်း ပြည်တွင်း နိုင်ငံရေး လေ့လာဆန်းစစ်သူတွေက သုံးသပ်ထားပါတယ်။

ရှမ်းအမျိုးသား ဒီမိုကရေစီအဖွဲ့ချုပ်ရဲ့ ဥက္ကဌ ဦးစိုင်းညွန့်လွင်က ရှမ်းပြည်နယ် ငြိမ်းချမ်းရေးဟာ တရုတ်အစိုးရအတွက် အရေးကြီးနေတယ်လို့ ပြောကြားခဲ့ပါတယ်။

တရုတ်နိုင်ငံခြားရေးဝန်ကြီး ဝမ်ယီဟာ အခုလအစောပိုင်းက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ တွေ့ဆုံခဲ့ပြီး BRI စီမံကိန်းရဲ့ တစ်စိတ်တစ်ပိုင်းဖြစ်တဲ့ တရုတ်-မြန်မာ စီးပွားရေးစင်္ကြန်က ဆောက်လုပ်ရေးလုပ်ငန်းတွေကို အရှိန်မြှင့်ဆောင်ရွက်ဖို့ အစိုးရကို တောင်းဆိုခဲ့ပါတယ်။

Ref: mmtimes