တူရကီရှိ သမိုင်းဝင်ဗလီတစ်လုံးကို ရေဘေးအန္တရာယ်ကြောင့် နေရာရွှေ့

ဒီဇင်ဘာ ၁၇၊ ၂၀၁၉
M-Media

-တူရကီနိုင်ငံ ဘတ်မန်ပြည်နယ်က သမိုင်းဝင် ဗလီဝတ်ကျောင်းတော်တစ်လုံးကို ရေလွှမ်းမိုးမှုအန္တရာယ်ကနေ လွတ်မြောက်စေဖို့အတွက် နေရာရွှေ့ပြောင်းခဲ့ပါတယ်။

Er-Rızk လို့ အမည်ရတဲ့ အဲဒီဗလီဟာ နှစ်ပေါင်း ၆၀၉ နှစ် သက်တမ်းရှိနေတာပါ။ ဗလီတည်ရှိရာ ရှေးဟောင်းမြို့ Hasankeyf အထက်ပိုင်းမှာ ရေကာတာတစ်ခု တည်ဆောက်ခဲ့တာကြောင့် ရေလွှမ်းမိုးမှုအန္တရာယ် မြင့်တက်လာခဲ့တာ ဖြစ်ပါတယ်။ မြို့တွင်းမှာ ရှိနေတဲ့ သမိုင်းဝင်နေရာ တော်တော်များများကို အာဏာပိုင်တွေက ရေလွတ်ရာနေရာမှာ တည်ထားတဲ့ ယဉ်ကျေးမှုပန်းခြံ Hasankeyf Culture Park ကို တစ်ဖြည်းဖြည်း ရွှေ့ပြောင်းနေပါတယ်။

တန်ပေါင်း ၁၇၀၀ ရှိတဲ့ Er-Rizk ဗလီ အဆောက်အဦးကို မနေ့မှာ ရွှေ့ပြောင်းခဲ့ပါတယ်။ သက္ကရာဇ် ၁၄၀၉ ခုနှစ်မှာ အိုက်ယူဘီမင်းဆက် Ebu’l Mefahir Süleyman ရဲ့ အမိန့်နဲ့ တည်ဆောက်ခဲ့တဲ့ မင်နာရတ် မျှော်စင်ကိုတော့ သီးခြားရွှေ့ပြောင်းခဲ့ပါတယ်။

Er-Rizk ဗလီဟာ Hasankeyf မြို့မှာ အကြီးမားဆုံး အဆောက်အဦးဖြစ်ပြီး ဗလီအဆောက်အဦးကို သီးခြားစီဖြတ်တောက်ကာ ရွှေ့ပြောင်းခဲ့တာဖြစ်ပါတယ်။ ယဉ်ကျေးမှုပန်းခြံမှာ ဒီအစိတ်အပိုင်းတွေကို ဆက်ကာ ပြန်လည်တည်ဆောက်မှာပါ။

မြို့ထဲမှာရှိတဲ့ Artuklu Hamam ရေချိုးခန်း၊ Sultan Süleyman Koç ဗလီ၊ Imam Abdullah Zawiyah ဗိမာန်၊ Zeynel Abidin ဗိမာန်နဲ့ Eyyubi ဗလီတွေကိုလည်း အရင်က ရွှေ့ပြောင်းခဲ့ပါတယ်။

Ref: Daily Sabah