နိုင်ငံတော်အတိုင်ပင်ခံပုဂ္ဂိုလ် ရခိုင်ပြည်နယ် မာန်အောင်သို့သွားမည်

ဒီဇင်ဘာ ၁၈၊ ၂၀၁၉
M-Media

-နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ မနက်ဖြန်မှာ ရခိုင်ပြည်နယ် မာန်အောင်မြို့ကို သွားရောက်ဖို့ရှိနေပြီး NLD ပါတီ အစိုးရတာဝန်ယူခဲ့တဲ့ ၂၀၁၆ ခုနှစ်ကစလို့ ဒုတိယအကြိမ်မြောက် ရခိုင်ပြည်နယ်ကို သွားရောက်မှု ဖြစ်ပါတယ်။

ရခိုင်ပြည်နယ်လွှတ်တော်အမတ် ဦးဘိုးနွဲ့က ဒေါ်အောင်ဆန်းစုကြည်ဟာ မန်အောင်မြို့နယ်က နေစွမ်းအင်သုံး ဓာတ်အားပေးစနစ် ဖွင့်ပွဲအခမ်းအနားကို တက်ရောက်မှာဖြစ်တယ်လို့ ပြောကြားခဲ့ပါတယ်။

“နေစွမ်းအင်သုံး ဓာတ်အားပေးစနစ် ဖွင့်ပွဲအခမ်းအနားကို တက်ရောက်ပြီးတဲ့နောက် ပြည်သူလူထုနဲ့ တွေ့ဆုံမှာပါ။ ရောက်တုန်းရောက်ခိုက် အခြားနေရာတွေကို သွားမလားဆိုတာတော့ ကျွန်တော်လည်း မသိပါဘူး”

လျှပ်စစ်နှင့် စွမ်းအင်ဝန်ကြီးဌာန၊ ရခိုင်ပြည်နယ်အစိုးရနဲ့ တောင်ကိုရီးယား POSCO Daewoo Corporation ကုမ္ပဏီတို့ ပူးပေါင်းဖော်ဆောင်တဲ့ ဒီ နေစွမ်းအင်သုံး ဓာတ်အားပေးစီမံကိန်းကို ပြီးခဲ့တဲ့နှစ်မှာ စတင်ဆောင်ရွက်ခဲ့တာ ဖြစ်ပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ ၂၀၁၇ ခုနှစ် နိုဝင်ဘာလက ရခိုင်ပြည်နယ်မြောက်ပိုင်း မောင်တောမြို့နယ်ကို သွားရောက်ခဲ့ပါတယ်။

Ref: mmtimes