KL မွတ်စလင်ခေါင်းဆောင်များ ထိပ်သီးအစည်းအဝေးမှာ မဟာသီဘာပြောလဲ

ဒီဇင်ဘာ ၁၉၊ ၂၀၁၉
M-Media

-မလေးရှားက ဦးဆောင်ကျင်းပတဲ့ မွတ်စလင်ခေါင်းဆောင်များ ထိပ်သီးအစည်းအဝေး ( Kuala Lumpur Summit 2019) ဟာ ဘယ်နိုင်ငံကိုမှ ခွဲခြားဖို့၊ သီးသန့်ဖယ်ထုတ်ဖို့မဟုတ်ဘဲ မွတ်စလင်ကမ္ဘာက လက်ခံနိုင်မယ့်၊ အလုပ်ဖြစ်မယ့် အဆိုပြုချက်တွေ၊ အဖြေတွေကို ရှာဖွေဖို့ဖြစ်တယ်လို့ မလေးရှားဝန်ကြီးချုပ် မဟာသီယာ မိုဟာမက်က ပြောကြားလိုက်ပါတယ်။

အဲဒီထိပ်သီးအစည်းအဝေးဟာ ရှိပြီးသား OIC အဖွဲ့ကို စင်ပြိုင်လုပ်တယ်လို့ ဆော်ဒီအာရေဗျက စွပ်စွဲထားပြီး တက်ရောက်ခြင်းလည်း မရှိပါဘူး။ OIC အဖွဲ့ဝင်နိုင်ငံ ၅၇ နိုင်ငံကို မလေးရှားက ဖိတ်ကြားရာမှာ နိုင်ငံ ၂၀ လောက်သာ တက်ရောက်ပါတယ်။

မလေးရှားဝန်ကြီးချုပ်က ထိပ်သီးအစည်းအဝေးရဲ့ ရည်ရွယ်ချက်ဟာ ဘာသာရေးဆွေးနွေးဖို့မဟုတ်ဘဲ ‘ဒုက္ခသုက္ခရောက်နေတဲ့’ မွတ်စလင်ကမ္ဘာက ပြဿနာတွေကို ဆွေးနွေးအဖြေရှာဖို့ဖြစ်တယ်လို့ အဖွင့်မိန့်ခွန်းမှာ ပြောကြားခဲ့ပါတယ်။

“ဘယ်နေရာကိုကြည့်လိုက်ကြည့်လိုက် မွတ်စလင်နိုင်ငံတွေ ဖျက်ဆီးခံနေရတယ်။ နိုင်ငံသားတွေ ထွက်ပြေးနေရတယ်။ မွတ်စလင်မဟုတ်တဲ့နိုင်ငံတွေမှာ ဒုက္ခသည်တွေအဖြစ် သွားရောက်ခိုလှုံနေရတယ်။ လူထောင်သောင်းချီသေဆုံးပြီး၊ ခိုလှုံခွင့်တွေလည်း ငြင်းပယ်ခံနေရတယ်။ တစ်ဖက်ကိုကြည့်လိုက်ရင်လည်း မွတ်စလင်တွေဟာ အကြမ်းဖက်ဖို့၊ အပြစ်မဲ့သူတွေ၊ အမျိုးသားတွေ၊ အမျိုးသမီးတွေ၊ ကလေးငယ်တွေ၊ နေထိုင်မကောင်းသူတွေကို သတ်ဖြတ်ဖို့ လုပ်နေကြတယ်”

အခု ထိပ်သီးအစည်းအဝေးဟာ ဒီကိစ္စတွေကိုဖြေရှင်နိုင်ရေး အစပျိုးတာဖြစ်တယ်လို့လည်း မဟာသီက ထည့်သွင်းပြောဆိုခဲ့ပါတယ်။

“ကျွန်တော်တို့ ဘယ်သူ့ကိုမှ ခွဲခြားတာ၊ ပစ်ပယ်တာ မရှိပါဘူး။ သေးသေးလေးကနေ စတင်တာဖြစ်တယ်။ ဒီကထွက်လာမယ့် အတွေးအမြင်တွေ၊ အဆိုပြုချက်တွေ၊ အဖြေတွေဟာ လက်ခံနိုင်စရာဖြစ်မယ်၊ အလုပ်ဖြစ်မယ်ဆိုရင် ပိုပြီး ကြီးမားထိရောက်တဲ့ လုပ်ငန်းတွေ လုပ်ဆောင်ဖို့ မျှော်လင့်ထားပါတယ်”

မဟာသီဟာ ထိပ်သီးအစည်းအဝေးရဲ့ ဥက္ကဌအဖြစ် တာဝန်ယူထားပါတယ်။ အစည်းအဝေးမှာ ကမ္ဘာတစ်ဝှမ်း ပြန့်နှံ့နေတဲ့ အစ္စလာမ်ကြောက်ရောဂါကို ဖြေရှင်းရေး၊ မွတ်စလင်ကမ္ဘာက ချို့ယွင်းချက်တွေကို ပြုပြင်ရေး၊ မွတ်စလင်တွေရဲ့ အသက်ရှင်နေထိုင်မှုအခြေအနေ တိုးတက်ကောင်းမွန်ရေး ဆွေး‌နွေးသွားမယ်လို့ ထုတ်ပြန်ထားပါတယ်။

မွတ်စလင်နိုင်ငံတွေမှာ ဂိုဏ်းကနပဋိပက္ခတွေ၊ ပြည်တွင်းစစ်တွေဖြစ်နေတာ၊ ခိုင်မာတောင့်တင်းတဲ့ အစိုးရမရှိတာနဲ့ အခြား ပြဿနာတွေကို မဟာသီက ထောက်ပြခဲ့ပြီး ဒါတွေကိုဖြေရှင်းရေး ခိုင်မာတဲ့ ဆောင်ရွက်မှုမျိုးကိုလည်း မတွေ့ရဘူးလို့ ထည့်သွင်းပြောဆိုခဲ့ပါတယ်။

“ဒုတိယကမ္ဘာစစ်ကြောင့် ပျက်ဆီးသွားတဲ့ နိုင်ငံတစ်ချို့ဟာ အလျင်အမြန် ပြန်လည်ထူထောင်နိုင်ရုံသာမက၊ ခိုင်မာတဲ့ ဖွံ့ဖြိုးတိုးတက်မှုတွေ ရရှိတာကို ကျွန်တော်တို့ မြင်တွေ့ခဲ့ရတယ်။ ဒါပေမယ့် မွတ်စလင်နိုင်ငံ တစ်ချို့ကတော့ ဖွံ့ဖြိုးဖို့၊ သာယာ၀ပြောဖို့မပြောနဲ့ ‌ကောင်းမွန်တဲ့အုပ်ချုပ်ရေးမျိုး ရှိလာအောင်တောင် မလုပ်နိုင်ပါဘူး”

ဒါတွေကို နားလည်အောင်ကြိုးစားခြင်းဟာ မွတ်စလင်ကမ္ဘာကို နိမ့်ပါးစေတဲ့ ပြဿနာတွေကို ကျော်ဖြတ် ဖြေရှင်းနိုင်ရေး လမ်းကြောင်းတစ်ခုပေါ်လာအောင် မျက်စိဖွင့်ပေးလိမ့်မယ်လို့လည်း မလေးရှားဝန်ကြီးချုပ်က ထည့်သွင်းပြောဆိုခဲ့ပါတယ်။

၃ ရက်တာကြာမြင့်မယ့် Kuala Lumpur Summit 2019 ထိပ်သီးအစည်းအဝေးကို အီရန်သမ္မတ ဟာဆန်ရူဟာနီ၊ တူရကီသမ္မတ အာဒိုဂန်တို့ အပါအဝင် မွတ်စလင်ကမ္ဘာက ခေါင်းဆောင်တစ်ချို့ တက်ရောက်ခဲ့ကြပါတယ်။

Ref: The Star