လူ့အခွင့်အရေး လေးစားရန် ရဲတပ်ဖွဲ့ကို တိုင်ပင်ခံတိုက်တွန်း

ဒီဇင်ဘာ ၂၁၊ ၂၀၁၉
M-Media

-တာဝန်ထမ်းဆောင်တဲ့အခါမှာ အင်အား အလွန်အကျွံသုံးစွဲမှုကို ရှောင်ရှားဖို့နဲ့ နိုင်ငံတကာ စံချိန်စံညွှန်းတွေအတိုင်း လိုက်နာဆောင်ရွက်ဖို့ နိုင်ငံတော် အတိုင်ပင်ခံ ဒေါ်အောင်ဆန်းစုကြည်က းရဲတပ်ဖွဲ့ဝင်ကို တိုက်တွန်းလိုက်ပါတယ်။

နိုင်ငံတော်အတိုင်ပင်ခံဟာ ဗုဒ္ဓဟူးနေ့က ရဲတပ်ဖွဲ့ အကြီးတန်းတာဝန်ရှိသူတွေနဲ့ နေပြည်တော်က ပြည်ထဲရေးဝန်ကြီးဌာနမှာ တွေ့ဆုံခဲ့တာ ဖြစ်ပါတယ်။

“တာဝန်ထမ်းဆောင်ရာမှာ အင်အားအလွန်အကျွံ သုံးစွဲတာဟာ လူ့အခွင့်အရေး ချိုးဖောက်မှု ဖြစ်တယ်။ ပြည်သူတွေကို ကာကွယ်ရာမှာ ရဲတပ်ဖွဲ့က အဓိကအခန်းကဏ္ဍကနေ ပါဝင်တာကြောင့် မိမိတို့ရဲ့တာဝန်ထမ်းဆောင်မှုအတွက် ဂုဏ်ယူရပါမယ်” လို့ ဒေါ်အောင်ဆန်းစုကြည်က ပြောကြားခဲ့ပါတယ်။

ဖွံ့ဖြိုးတည်ငြိမ်တဲ့ ကမ္ဘာ့နိုင်ငံတွေမှာ ရဲတပ်ဖွဲ့ဟာ ပြည်သူလူထုရဲ့ ယုံကြည်မှုကို ရရှိထားကြတယ်လို့လည်း ဆိုပါတယ်။

မြန်မာတစ်နိုင်ငံလုံးမှာ ရဲတပ်ဖွဲ့ဝင်အင်အား ၈ သောင်းသာရှိပြီး အင်အား အလွန်နည်းပါးနေတာကို တာဝန်ရှိသူတွေက နိုင်ငံတော်အတိုင်ပင်ခံကို တင်ပြခဲ့ပါတယ်။ ကမ္ဘာ့စံနှုန်းအရ ပြည်သူ ၄၀၀ မှာ ရဲတစ်ယောက်နှုန်းဖြစ်ပေမယ့် မြန်မာနိုင်ငံမှာတော့ ပြည်သူ ၁၃၀၀ မှာ ရဲတစ်ယောက်နှုန်း ဖြစ်နေပါတယ်။

ဒေါ်အောင်ဆန်းစုကြည်ကတော့ နိုင်ငံတစ်ဝှမ်း ရဲတပ်ဖွဲ့ဝင်တွေ ကြုံတွေ့နေရတဲ့ အခက်အခဲကို အသိအမှတ်ပြုပြီး ဒါတွေကို ဖြေရှင်းပေးဖို့အတွက် အကောင်းဆုံး ကြိုးစားဆောင်ရွက်နေတယ်လို့ ပြောကြားခဲ့ပါတယ်။

အထက်အရာရှိတွေအနေနဲ့ အောက်ခြေတပ်ဖွဲ့ဝင်တွေနဲ့ ဆွေးနွေးညှိနှိုင်းမှုတွေ လုပ်ဆောင်ဖို့ ၊ ပြည်သူတွေရဲ့ လေးစားမှုကို အရယူဖို့လည်း နိုင်ငံတော်အတိုင်ပင်ခံက တိုက်တွန်းခဲ့ပါတယ်။

Ref: mmtimes