ဩစတေးလျတောမီးလောင်မှု အန္တရာယ်ကြီးလာ

ဒီဇင်ဘာ ၃၀၊ ၂၀၁၉
M-Media

-ဩစတေးလျ အရှေ့တောင်ပိုင်းမှာ တစ်ကျော့ပြန်ဖြစ်ပွားလာတဲ့ တောမီးလောင်ကျွမ်းမှုဟာ အန္တရာယ်ရှိတဲ့ အနေအထားကို ရောက်ရှိလာတာကြောင့် အာဏာပိုင်တွေက ထောင်နဲ့ချီတဲ့ပြည်သူတွေကို ဘေးလွတ်ရာရွှေ့ပြောင်းဖို့ သတိပေးခဲ့ပါတယ်။

နွေရာသီရောက်တိုင်း ဩစတေးလျမှာ တောမီးလောင်ကျွမ်းမှု ပုံမှန်ဖြစ်လေ့ရှိပေမယ့် အခုနှစ်မှာတော့ အရင်နှစ်တွေကထက်စောပြီး တောမီးလောင်မှုတွေ ဖြစ်ပေါ်လာတာပါ။ ဗစ်တိုးရီးယား၊ နယူးဆောက်သ်ဝေးလ်စ်နဲ့ ဆောက်ဩစတေးလျတွေအပါအဝင် ပြည်နယ်တော်တော်များများမှာ လက်ရှိ တောမီးလောင်မှုကို ခံစားနေရပြီး အပူချိန်မြင့်တက်မှုနဲ့ လေတိုက်နှုန်းပြင်းထန်မှုကြောင့် မီးသတ်သမားတွေဟာ မီးညှိမ်းသက်ရေးမှာ အခက်အခဲတွေ ရှိနေပါတယ်။

ဗစ်တိုးရီးယားပြည်နယ်က နာမည်ကျော် East Gippsland ဒေသမှာ လူပေါင်း ၃ သောင်းကျော်လောက်ကို ဘေးလွတ်ရာရွှေ့ပြောင်းဖို့အတွက် အာဏာပိုင်တွေက တိုက်တွန်းထားသလို၊ လာရောက်လည်ပတ်သူအားလုံးကို အကူအညီမပေးနိုင်ဘူးလို့ သတိပေးထားပါတယ်။

ဆောက်သ်ဩစတေးလျပြည်နယ်မှာလည်း အပူချိန်ဟာ ၄၀ ဒီဂရီဆဲလ်စီးယက်စ်အထိရှိနေပြီး အာဏာပိုင်တွေက ပြည်သူတွေအတွက် အလွန်အန္တရာယ်ရှိတဲ့ အခြေအနေဖြစ်တယ်လို့ သတိပေးချက် ထုတ်ပြန်ထားပါတယ်။

အခုနှစ်နွေရာသီအတွင်း ဩစတေးလျမှာ တောမီးလောင်မှုကြောင့် သေဆုံးသူအရေအတွက်ဟာ ၁၀ ဦးရှိလာပြီး နေအိမ်ပေါင်း တစ်ထောင်ကျော်၊ မြေဧက ဧက ၇.၄ သန်းကျော် မီးလောင်ပျက်ဆီးခဲ့ပါတယ်။ မီးလောင်မှုကထွက်လာတဲ့ မီးခိုးတွေရဲ့ အန္တရာယ်ကြောင့် ကလေးငယ်တွေ နေအိမ်ထဲမှာပဲကစားဖို့ မြို့တော်တော်များများမှာ သတိပေးချက် ထုတ်ပြန်ထားသလို အားကစားပြိုင်ပွဲတွေကိုလည်း ရပ်ဆိုင်းခဲ့ပါတယ်။

Ref: Aljazeera