အရှေ့အလယ်ပိုင်းမှ အမေရိကန် ထွက်ခွာချိန်တန်ပြီဟု အီရန်ပြော

ဒီဇင်ဘာ ၃၀၊ ၂၀၁၉
M-Media

-ပြီးခဲ့တဲ့ ရက်ပိုင်းအတွင်း တရုတ်၊ ရုရှားတို့နဲ့ ပြုလုပ်ခဲ့တဲ့ ရေတပ်စစ်ရေးလေ့ကျင့်မှုဟာ ဟော်မုဇ်ရေလက်ကြား လုံခြုံရေးအတွက် အီရန်က ပူးပေါင်းဆောင်ရွက်ဖို့ အသင့်ရှိနေတယ်ဆိုတာကို ပြသလိုက်တာဖြစ်ကြောင်း အီရန်နိုင်ငံခြားရေးဝန်ကြီး ဂျာဗဒ်ဇာရစ်ဖ်က ပြောကြားလိုက်ပါတယ်။

အိုမန်ပင်လယ်ကွေ့နဲ့ အိန္ဒိယသမုဒ္ဒရာတွေမှာ ပြုလုပ်ခဲ့တဲ့ အဲဒီ ရေတပ်စစ်ရေးလေ့ကျင်မှုဟာ ၃ ရက်တာကြာမြင့်ခဲ့ပြီး တနင်္ဂနွေနေ့မှာ ပြီးဆုံးခဲ့ပါတယ်။ ပစ်မှတ်ကို နှိမ်နှင်းမှု၊ အရေးပေါ်အခြေအနေတွေမှာ သင်္ဘောတွေကို ကယ်ဆယ်မှုအပါအဝင် နည်းစနစ်ပိုင်းဆိုင်ရာ လေ့ကျင့်မှု တော်တော်များများ ပါဝင်ခဲ့ပါတယ်။

အီရန်နိုင်ငံခြားရေးဝန်ကြီး ဂျာဗဒ်ဇာရစ်ဖ်က နိုင်ငံတကာရေကြောင်းသွားလာမှုမှာ အရေးပါတဲ့ ဟော်မုဇ်ရေလက်ကြား လုံခြုံရေးအတွက် မိမိတို့ဟာ ဘယ်တိုင်းပြည်နဲ့မဆို ပူးပေါင်းဆောင်ရွက်ဖို့ အသင့်ရှိတယ်ဆိုတာ ဒီစစ်ရေးလေ့ကျင့်မှုက ပြသနေကြောင်း၊ အရှေ့အလယ်ပိုင်းဒေသအတွင်း ရန်လိုတဲ့ ပေါ်လစီတွေကို မကြိုက်တဲ့ အခြား အင်အားကြီးနိုင်ငံတွေ ရှိနေတယ်ဆိုတာ ဖော်ကျူးနေကြောင်း ပြောကြားခဲ့ပါတယ်။

ပြီးခဲ့တဲ့လအနည်းငယ်အတွင်း ပါရှန်ပင်လယ်ကွေ့မှာ ရေနံသင်္ဘောတွေ သံသယဖြစ်ဖွယ် တိုက်ခိုက်မှု ဖြစ်ပွားပြီးနောက်ပိုင်း နိုင်ငံတကာ ရေကြောင်းသွားလာမှု မဟာမိတ်အဖွဲ့ ဖွဲ့စည်းရေး အမေရိကန်က တိုက်တွန်းဆော်ဩနေစဉ်မှာ အမေရိကန်ရဲ့ ပြိုင်ဘက်တွေ ပူးပေါင်းပြီး အခုလို စစ်ရေးလေ့ကျင့်မှု ပေါ်ထွက်လာတာပါ။

အီရန်ရေတပ်အကြီးအကဲက အမေရိကန်ရဲ့ ကျူးကျော်တဲ့ကာလ ကုန်ဆုံးသွားပြီး အရှေ့အလယ်ပိုင်းကနေ ထွက်ခွာချိန်တန်ပြီလို့ စစ်ရေးလေ့ကျင့်မှုအခမ်းအနားမှာ ပြောကြားခဲ့ပါတယ်။

Ref: Press TV