ဖျက်ဆီးခံ ဘာဘရီဗလီအတွက် အစားပေးရန် နေရာ ၅ ခုကို အိန္ဒိယအဆိုပြု

ဒီဇင်ဘာ ၃၁၊ ၂၀၁၉
M-Media

-အကြမ်းဖက်ဖျက်ဆီးခံရတဲ့ ဘာဘရီဗလီဝတ်ကျောင်းတော်အတွက် နေရာအစားပေးဖို့ အိန္ဒိယနိုင်ငံ အူတာပရာဒက်ရှ် ပြည်နယ်အစိုးရက အယွဒ္ဒယမြို့မှာ နေရာ ၅ နေရာကို ဒီကနေ့မှာ အဆိုပြုလိုက်ပါတယ်။

၁၆ ရာစုကတည်းက ဆောက်လုပ်ထားတဲ့ အဲဒီဗလီဟာ ရာမနတ်ဘုရားမွေးဖွားရာနေရာ ဖြစ်တယ်လို့ ဟိန္ဒူတွေက ၁၉၄၉ ခုနှစ်မှာ စတင်စွပ်စွဲခဲ့ပြီး ၁၉၉၂ ခုနှစ်မှာတော့ ဖျက်ဆီး ဖြိုချခဲ့ပါတယ်။

ဘာဘရီဗလီဝတ်ကျောင်းတော် ပိုင်ဆိုင်မှုအတွက် အယွဒ္ဒယက မွတ်စလင်နဲ့ ဟိန္ဒူလူ့အဖွဲ့အစည်းကြား နှစ်ပေါင်း ၇၀ ကြာ အမှုဖြစ်ပွားပြီးတဲ့နောက် နိုဝင်ဘာ ၉ ရက်နေ့မှာ တရားရုံးချုပ်က နောက်ဆုံး ဆုံးဖြတ်ချက်တစ်ခု ချမှတ်ခဲ့ပါတယ်။ ဆုံးဖြတ်ချက်မှာ ဘာဘရီဗလီနေရာကို ဟိန္ဒူတွေထံပေးကာ ရာမ နတ်ဘုရားကျောင်းတစ်ခုတည်ဆောက်ဖို့ တိုက်တွန်းခဲ့ပြီး မွတ်စလင်တွေကိုတော့ အယွတ်ဒယမြို့က အခြားနေရာမှာ မြေ ၅ ဧက ပေးရမယ်လို့ ဆိုပါတယ်။

ဟိန္ဒူဘုန်းကြီး ယိုဂီ အဒီယာနက်သ် ဦးဆောင်တဲ့ အူတာပရာဒက်ရှ်ပြည်နယ် အစိုးရဟာ တရားရုံးချုပ်ရဲ့ ဆုံးဖြတ်ချက်အတိုင်း မွတ်စလင်တွေ ဗလီဆောက်ဖို့အတွက် အယွဒ္ဒယမြို့က နေရာ ၅ နေရာကို အဆိုပြုခဲ့ပါတယ်။ မွတ်စလင်တွေကို ကိုယ်စားပြု တရားရင်ဆိုင်ခဲ့တဲ့ Sunni Central Waqf Board က ဒီနေရာတွေကို လက်ခံမလား လက်မခံဘူးလားဆိုတာ ထုတ်ပြန်ခြင်း မရှိသေးပဲ ဇန်နဝါရီလမှာ အဖွဲ့အတွင်း ဆွေးနွေးသွားမယ်လို့ ဆိုပါတယ်။

ဆုံးဖြတ်ချက်ကို ပြင်ဆင်ပေးဖို့ မွတ်စလင်အဖွဲ့အစည်းတွေက အသနားခံစာ တင်ခဲ့ပေမယ့် တရားရုံးချုပ်က ပယ်ချခဲ့ပါတယ်။

လက်ရှိ အဆိုပြုတဲ့နေရာတွေဟာ Ayodhya-Faizabad လမ်း၊ Ayodhya-Basti road လမ်း၊ Ayodhya-Sultanpur လမ်း၊ Ayodhya-Gorakhpur လမ်းနဲ့ မြို့ပြင်က အဝေးပြေးလမ်းတွေမှာ ဖြစ်ပါတယ်။ အဆိုပြုထားတဲ့နေရာတွေဟာ သွားရလာရ လွယ်ကူတဲ့နေရာတွေဖြစ်ပြီး၊ ခွင့်ပြုချက်ရဖို့နဲ့ ရှင်းလင်းရေးလုပ်ဆောင်ဖို့အတွက် သက်ဆိုင်ရာကို‌ တင်ပြသွားမယ်လို့ ပြည်နယ်အစိုးရရဲ့ ထုတ်ပြန်ချက်မှာ ဖော်ပြထားပါတယ်။

Ref: India TV News