သံရုံးတိုက်ခိုက်ခံရမှုကြောင့် အရှေ့အလယ်ပိုင်းတွင် အမေရိကန်တပ်ဖွဲ့ဝင် ထပ်တိုးချမည်

ဇန်နဝါရီ ၁၊ ၂၀၂၀
M-Media

-အရှေ့အလယ်ပိုင်းကို တပ်ဖွဲ့ဝင် ၇၅၀ ထပ်မံပို့ဆောင်သွားမယ်လို့ အမေရိကန်က မနေ့မှာ ကြေငြာလိုက်ပြီး အီရတ်နိုင်ငံ ဘဂ္ဂဒတ်မြို့က အမေရိကန်သံရုံး တိုက်ခိုက်ခံရပြီးတဲ့နောက် ဒီကြေငြာချက် ပေါ်ထွက်လာတာ ဖြစ်ပါတယ်။

‌အီရတ်နိုင်ငံက အင်အားတောင့်တင်းတဲ့ ပြည်သူ့စစ်အဖွဲ့ Hashd al-Shaabi ကို ထောက်ခံသူတွေဟာ မနေ့က ဘဂ္ဂဒတ်မှာရှိတဲ့ အမေရိကန်သံရုံးရှေ့မှာ စုရုံးကာ အမေရိကန်ဆန့်ကျင်ရေး ဆန္ဒပြခဲ့ကြပါတယ်။ နောက်ပိုင်းမှာ ဆန္ဒပြသူတွေဟာ သံရုံးထဲကို ဝင်ရောက်စီးနင်း တိုက်ခိုက်တဲ့အထိ ဖြစ်ခဲ့ပါတယ်။

အမေရိကန်က အီရတ်နဲ့ ဆီးရီးယားမှာရှိတဲ့ Hashd al-Shaabi လက်အောက်ခံအဖွဲ့ Kataib Hezbollah ကို တနင်္ဂနွေနေ့က လေကြောင်းကနေ တိုက်ခိုက်ခဲ့ပြီးတဲ့နောက် ဒီလိုဆန္ဒပြမှု ပေါ်ပေါက်လာတာဖြစ်ပါတယ်။ IS အကြမ်းဖက်အဖွဲ့ကို သုတ်သင်ရှင်းလင်းရာမှာ ပါဝင်ခဲ့တဲ့ ဒီအဖွဲ့တွေကို အီရန်က ကျောထောက်နောက်ခံပြုထားတာပါ။

မနေ့က သံရုံးရှေ့ ဆန္ဒပြမှုနဲ့ သံရုံးတိုက်ခိုက်မှုအတွက် အီရန်မှာ အပြည့်အ၀ တာဝန်ရှိပြီး၊ ဆန္ဒပြသူတွေကိုလည်း အရေးယူသွားမှာဖြစ်ကြောင်း၊ သံရုံးကိုကာကွယ်ရေး အီရတ်က အင်အားအသုံးပြုဖို့ မျှော်လင့်ပြီး ဒီအတွက်လည်း အကြောင်းကြားထားကြောင်း အမေရိကန်သမ္မတ ဒေါ်နယ်ထရမ့်က ပြောကြားခဲ့ပါတယ်။

တိုက်ခိုက်ခံရမှုအပြီး ကူဝိတ်က တပ်ဖွဲ့ဝင်တွေကို ဘဂ္ဂဒတ်သံရုံးမှာ အမေရိကန်က ထပ်မံ ချထားခဲ့သလို၊ အရှေ့အလယ်ပိုင်းကို နောက်ထပ် တပ်ဖွဲ့ဝင် ၇၅၀ ပို့ဆောင်သွားမယ်လို့ အမေရိကန် ကာကွယ်ရေးဝန်ကြီး မာ့ခ် အက်စ်ပါက ထုတ်ပြန်ပြောကြားခဲ့ပါတယ်။

အီရန်ရဲ့ရန်ကို စိုးရိမ်ရတယ်ဆိုတဲ့ အကြောင်းပြချက်နဲ့ အရှေ့အလယ်ပိုင်းကို အမေရိကန်တပ်ဖွဲ့ဝင်တွေ စေလွှတ်မှုအရေအတွက်ဟာ ပြီးခဲ့တဲ့နှစ် မေလကစလို့ ၁၄၀၀၀ လောက် ရှိလာပြီဖြစ်ပါတယ်။‌ ဒီမတိုင်ခင်က အီရတ်မှာ အမေရိကန်တပ်ဖွဲ့ ၅၂၀၀ လောက် ရှိနေပြီး အီရတ်တပ်ဖွဲ့ဝင်တွေကို လေ့ကျင့်ပေးဖို့နဲ့ IS အကြမ်းဖက်အဖွဲ့ကို တိုက်ဖျက်ရေး ကူညီဖို့ ဖြစ်ပါတယ်။

Ref: Aljazeera