ထိုင်ဝမ်ဗိုလ်ချုပ်ကြီးတစ်ဦး လေယာဉ်ပျက်ကျသေဆုံး

ဇန်နဝါရီ ၂၊ ၂၀၂၀
M-Media

-ထိုင်ဝမ်စစ်တပ်က အရာရှိကြီးတွေအပါအဝင် လူ ၁၂ ဦးကို တင်ဆောင်လာတဲ့ ရဟတ်ယာဉ်တစ်စင်းဟာ ရာသီဥတုဆိုးဝါးလို့ အရေးပေါ်ဆင်းသက်ရာမှာ ပျက်ကြပြီး ဗိုလ်ချုပ်ကြီးတစ်ဦးအပါအဝင် လူတစ်ချို့ သေဆုံးခဲ့ပါတယ်။

အရာရှိကြီးတွေဟာ UH-60M Black Hawk လေယာဉ်နဲ့ နိုင်ငံ အရှေ့မြောက်ပိုင်းက စစ်စခန်းတစ်ခုကို သွားရောက်ပြီး အပြန် မြို့တော်ထိုင်ပေအနီး တောအုပ်ထဲမှာ ဒီလိုကံကြမ္မာဆိုးကို ကြုံတွေ့ခဲ့ရတာပါ။

လေယာဉ်ပေါ်လိုက်ပါလာသူတွေရဲ့ အခြေအနေကို အစောပိုင်းမှာ အတိအကျ မသိရပေမယ့် နောက်ပိုင်းမှာတော့ အသက် ၆၂ နှစ်အရွယ် ဗိုလ်ချုပ်ကြီး ရှန်ယီမင်းအပါအဝင် စစ်ဖက်အရာရှိ ၈ ဦး သေဆုံးခဲ့တယ်လို့ ထိုင်ဝမ်တာဝန်ရှိသူတွေက ထုတ်ပြန်ခဲ့ပါတယ်။ ဒီအဖြစ်အပျက်အတွင်း အနည်းဆုံး ၄ ဦးအသက်ရှင်လျက် ပြန်တွေ့ခဲ့ရပါတယ်။

ထိုင်ဝမ်ဟာ ဇန်နဝါရီ ၁၁ ရက်နေ့မှာ အထွေထွေရွေးကောက်ပွဲ ကျင်းပဖို့ရှိနေပြီး သမ္မတ ချိုင်အမ်ဝမ်ကလည်း ဒီအဖြစ်အပျက်ကြောင့် မဲဆွယ်မှုအစီအစဉ်ကို ဖျက်သိမ်းခဲ့ပါတယ်။

ရာသီဥတုမကောင်းလို့ လေယာဉ်ပျက်ကျတာလို့ ကနဦးထုတ်ပြန်ချက်မှာ ဖော်ပြထားပေမယ့် အခင်းဖြစ်ပွားတဲ့အချိန်မှာ ထိုင်ဝမ်တစ်ဝှမ်း ရာသီဥတု ကောင်းမွန်နေပြီး စက်ပိုင်းဆိုင်ရာ ချို့ယွင်းမှုကြောင့် ပျက်ကျတာဖြစ်မယ်ဆိုတဲ့ ယူဆချက်တွေလည်း ရှိနေပါတယ်။

Ref: Aljazeera