တတိယမြောက် လပေါ်သွားမည့် စီမံကိန်းကို အိန္ဒိယ ထုတ်ပြန်ကြေငြာ

ဇန်နဝါရီ ၃၊ ၂၀၂၀
M-Media

-တတိယအကြိမ်မြောက် လကမ္ဘာပေါ်သွားမယ့်အစီအစဉ်ကို အိန္ဒိယ အာကာသအေဂျင်စီ ISRO က ဗုဒ္ဓဟူးနေ့မှာ ကြေငြာလိုက်ပြီး ဒုတိယအကြိမ်ကြိုးစားမှု မအောင်မမြင်ဖြစ်ခဲ့ပြီးတဲ့နောက် လအနည်းငယ်အကြာမှာ ပေါ်ထွက်လာခဲ့တာပါ။

Chandrayaan-3 လို့အမည်ပေးထားတဲ့ အဲဒီစီမံကိန်းမှာ အာကာသယာဉ်အတွက် ကန်ဒေါ်လာ ၃၅ သန်း၊ လွှတ်တင်မယ့် ဒုံးပျံအတွက် ကန်ဒေါ်လာ ၅၁ သန်း ကုန်ကျမှာဖြစ်ပါတယ်။

ဒီအစီအစဉ်သာ အောင်မြင်မယ်ဆိုရင် အမေရိကန်၊ ရုရှားနဲ့ တရုတ်တို့ပြီးတဲ့နောက် အိန္ဒိယဟာ လပေါ်ကို အာကာသယာဉ် ဆင်းသက်နိုင်တဲ့ စတုတ္ထမြောက်နိုင်ငံ ဖြစ်လာမှာဖြစ်ပါတယ်။

အိန္ဒိယဟာ သူတို့ရဲ့ ပထမဆုံး လပေါ်သွားခရီးစဉ်ကို ၂၀၀၈ ခုနှစ်မှာ စတင်ခဲ့ပြီး လပတ်လမ်းကနေ လေ့လစူးစမ်းမှုတွေ ပြုလုပ်ခဲ့ပါတယ်။ ပြီးခဲ့တဲ့နှစ် ဒုတိယအကြိမ်မြောက် ခရီးစဉ်မှာ လပေါ်ကို အာကာသယာဉ်ငယ်ဆင်းပြီး လေ့လာစူးစမ်းမှု ပြုလုပ်ဖို့ ပါဝင်ပေမယ့် လမျက်နှာပြင်ပေါ် ဆင်းသက်တဲ့အချိန်မှာ အာကာသယာဉ်နဲ့ မြေပြင်ထိန်းချုပ်ရေးစခန်းတို့ အဆက်အသွယ်ပြတ်တောက်ကာ မအောင်မမြင် ဖြစ်ခဲ့ရပါတယ်။

ပြီးခဲ့တဲ့ နှစ်အနည်းငယ်အတွင်း အာကာသစူးစမ်းလေ့လာမှုနယ်ပယ်မှာ အောင်မြင်မှုတွေရခဲ့တဲ့ အိန္ဒိယဟာ ၂၀၂၂ ခုနှစ်မှာ အာကာသထဲကို လူလွှတ်တင်ဖို့အထိ ရည်ရွယ်ထားပါတယ်။ ဒီအစီအစဉ်အတွက် တိုးတက်မှုတွေ ရှိနေပြီး အာကာသယာဉ်မှူး ၄ ဦးကို ရွေးချယ်ကာ အသေးစိတ် လေ့ကျင့်သင်ကြားပေးမှုတွေ ပြုလုပ်နေတယ်လို့ ISRO က ထည့်သွင်းပြောကြားခဲ့ပါတယ်။

၂၀၁၄ ခုမှာ အင်္ဂါဂြိုဟ်ပတ်လမ်းထဲကို အိန္ဒိယက စူးစမ်းလေ့လာရေးယာဉ် အောင်မြင်စွာ လွှတ်တင်နိုင်ခဲ့သလို၊ ၂၀၁၇ ခုနှစ်ကလည်း ဒုံးပျံတစ်ခုတည်းနဲ့ ဂြိုဟ်တု ၁၀၄ လုံးကို စံချိန်တင် လွှတ်တင်ပေးနိုငခဲ့ပါတယ်။

အိန္ဒိယဟာ ဂြိုဟ်တုလွှတ်တင်မှုနဲ့ အာကာသခရီးစဉ်တွေကို ကုန်ကျစားရိတ်အနည်းဆုံးနဲ့ ဆောင်ရွက်နိုင်တဲ့ နိုင်ငံတစ်ခုအဖြစ်လည်း နာမည်ကျော်ပါတယ်။

Ref: CNN