ရေကြီးမှုကြောင့် အင်ဒိုနီးရှားက မိုးနည်းအောင် နည်းပညာသုံးဆောင်ရွက်

ဇန်နဝါရီ ၄၊ ၂၀၂၀
M-Media

-မြို့တော် ဂျကာတာမှာ မိုးသည်းထန်ပြီး ရေကြီးရေလျှံနေတာကို တားမြစ်ဖို့အတွက် အင်ဒိုနီးရှားဟာ မိုးနည်းအောင် နည်းပညာအသုံးပြု ဆောင်ရွက်လာပါတယ်။

နှစ်သစ်ကူးကစလို့ မုန်တိုင်းငယ်တစ်ခုကြောင့် ဂျကာတာနဲ့ ပတ်ဝန်းကျင်ဒေသမှာ မိုးသည်းထန်စွာရွာသွန်းကာ ရေကြီးရေလျှံမှု ဖြစ်ပွားနေတာပါ။ ရေကြီးမှုကြောင့် အနည်းဆုံး ၄၃ ဦးသေဆုံးကာ ၁၉၂၀၀၀ ဦး ဘေးလွတ်ရာကို ရွှေ့ပြောင်းနေရပါတယ်။

လာမယ့်ရက်ပိုင်းအတွင်း မိုးသည်းထန်စွာရွာသွန်းဖို့ ရှိနေတာကြောင့် အာဏာပိုင်တွေဟာ မိုးသားတိမ်တိုက်တွေထဲ ဓာတုပစ္စည်းတွေသွင်းကာ မိုးရွာသွန်းမှုလျော့ကျအောင် လုပ်ဆောင်နေပါတယ်။

မနေ့က လေယာဉ် ၂ စီးဟာ ဂျကာတာကိုရောက်မယ့် မိုးသားတွေကို ဓာတုပစ္စည်းထည့်သွင်း ဖြိုခွဲတာတွေ လုပ်ဆောင်ခဲ့ပါတယ်။

နှစ်စဉ် ဒီလိုအချိန် ဂျာကာတာမှာ မိုးကြီးရေလျှံမှု ပုံမှန်ဖြစ်ပွားလေ့ရှိပြီး လက်ရှိ ကြုံတွေ့နေရတာဟာ ၂၀၁၃ ခုနှစ်နောက်ပိုင်း အဆိုးဆုံးအခြေအနေ ဖြစ်ပါတယ်။

လူပေါင်းသန်းချီနေထိုင်တဲ့ ဂျကာတာမြို့ဟာ ကမ္ဘာပေါ်မှာ အမြန်ဆန်ဆုံး ရေထဲနစ်ဝင်နေတဲ့ မြို့တစ်မြို့ဖြစ်ပြီး ၂၀၅၀ ခုနှစ်ရောက်ရင် လုံး၀ ရေမြုပ်သွားမယ်လို့ ကျွမ်းကျင်သူတွေက ခန့်မှန်းထားပါတယ်။

မြို့တော်ကို ဘောနီယိုကျွန်းအရှေ့ပိုင်းကို ရွှေ့မယ့် သမ္မတဝီဒိုဒို အစီအစဉ်ရဲ့ အကြောင်းအရင်းတွေထဲမှာ ဒီအချက်လည်း ပါဝင်ပါတယ်။

Ref: BBC