ပန်ဂျပ်ပြည်နယ်က ဗလီတစ်လုံးကို ဟိန္ဒူနှင့် ဆစ်ခ်များက စောင့်ရှောက်ပေးထား

ဇန်နဝါရီ ၄၊ ၂၀၂၀
M-Media

-အိန္ဒိယနိုင်ငံမြောက်ပိုင်း ပန်ဂျပ်ပြည်နယ်က ရွာတစ်ရွာမှာရှိနေတဲ့ ရှေးဟောင်း ဗလီဝတ်ကျောင်းတော်နဲ့ အစ္စလာမ့် သာသနိကအဆောက်အဦးတွေကို ဟိန္ဒူနဲ့ ဆစ်ခ်တွေက ထိန်းသိမ်းပေးထားပြီး နိုင်ငံရဲ့ ဘာသာစုံလူမျိုးစုံ ညီညွတ်မှု ပြယုဂ်တစ်ခုလည်း ဖြစ်ပါတယ်။

လူဒီယာနာဆိုတဲ့ စက်မှုမြို့လေးက ဟေဒွန်ဘတ်ရွာမှာ ၁၉၄၇ ခုနှစ် အိန္ဒိယ၊ ပါကစ္စတန် ကွဲသွားပြီးနောက်ပိုင်း အစ္စလာမ်ဘာသာဝင်တစ်ဦးမှ မရှိတော့ပါဘူး။ ဒါပေမယ့် ဗလီအပါအဝင် မွတ်စလင်တွေရဲ့ အမွေအနှစ်တွေက ဆက်လက်ရှိနေပြီး ရွာမှာရှိနေတဲ့ ဟိန္ဒူတွေ၊ ဆစ်ခ်တွေက စောင့်ရှောက်ပေးထားပါတယ်။

“ဒါဟာ ဘုရားသခင်ရဲ့အိမ်တော်ပါ။ ဒီအိမ်တော်ကို စောင့်ရှောက်ခွင့်ရတဲ့အတွက်လည်း ပျော်ရွှင်ဝမ်းမြောက်မိပါတယ်။ ညတိုင်း ဗလီမှာ မီးလာထွန်းပေးတယ်။ ကြာသာပတေးနေ့ အပတ်တိုင်းမှာလည်း ဗလီမှာ မုန့်အချိုတွေလုပ်ပြီး ဝေငှပေးပါတယ်” လို့ အသက် ၅၄ နှစ်အရွယ် ဆစ်ခ်လူမျိုး ပရမ်ဆင်းက ပြောကြားခဲ့ပါတယ်။

ဟေဒွန်ဘတ်ရွာက ဗလီဝတ်ကျောင်းတော်ကို မွတ်စလင်သူတော်စင်တစ်ဦးက ဆယ်စုနှစ်ချီ စောင့်ရှောက်ခဲ့ပြီးတဲ့နောက် ၂၀၀၉ ခုနှစ်မှာ ပရမ်ဆင်းက လက်လွှဲတာဝန်ယူခဲ့တာ ဖြစ်ပါတယ်။

“ကျွန်တော် အူရဒူဘာသာစကား မဖတ်တတ် မရေးတတ်သလို ကုရ်အာန်ကိုလည်း ဘာမှ မသိပါဘူး။ ဒါပေမယ့် သူ‌တော်စင်ကြီး မတိမ်းပါးခင်က စာတစ်ချို့ ကျွန်တော့်ကို သင်ပေးခဲ့တယ်။ ကုရ်အာန်ထဲကပဲ ဖြစ်မယ်ထင်တယ်။ အဲဒီစာတွေကို မနက်၊ ညနေတိုင်းမှာ ဗလီထဲအသံကျယ်ကျယ်နဲ့ ကျွန်တော်ရွတ်ဆိုပေးတယ်။ ဒါဟာ ဝတ်ပြုရာနေရာဖြစ်ပြီး စောင့်ရှောက်ခွင့်ရတဲ့အတွက်လည်း ကျွန်‌တော်ကြည်နူးပါတယ်အ

ဗလီရဲ့ အပတ်စဉ်မုန့်ဝေပွဲမှာ ပါဝင်ကူညီနေတဲ့ ကူလ်ဝန့် ကူရ်က ဘယ်ဘာသာတရားရဲ့ ဝတ်ပြုရာနေရာကိုမဆို ပိတ်မထားသင့်ဘူးလို့ ပြောကြားခဲ့ပါတယ်။

“ဘာသာတရားဟာ သွေးကွဲစရာလို့ ရွာသား‌တွေက မယူဆပါဘူး။ နှစ်စဉ် ဒီဗလီမှာ ပွဲတော်တစ်ခုကို ရွာသားတွေက ကျင်းပပေးတယ်။ ကျွန်တော်တို့အတွက် ဟိန္ဒူဘုရားကျောင်းပဲဖြစ်ဖြစ်၊ ဆစ်ခ်ဘုရားကျောင်းပဲဖြစ်ဖြစ်၊ ဗလီမှာပဲဖြစ်ဖြစ် ဒီလိုဆောင်ရွက်တာဟာ ဘုရားသခင်ရဲ့ အမှုတော်ကိုထမ်းရွက်တာလို့ပဲ ယူဆပါတယ်”

ပန်ဂျပ်ပြည်နယ်ရဲ့ အခြားနေရာတွေမှာလည်း ဗလီဝတ်ကျောင်းတော်နဲ့ အစ္စလာမ့် သာသနိက အဆောက်အဦးတွေကို ဟိန္ဒူတွေ၊ ဆစ်ခ်တွေက ထိန်းသိမ်းစောင့်ရှောက်မှုတွေ ပြုလုပ်ထားပါတယ်။

အိန္ဒိယ-ပါကစ္စတန် ကွဲသွားပြီးနောက်ပိုင်း စောင့်ရှောက်မယ့်သူ မရှိတဲ့ အနီးအနားရွာက ဗလီဝတ်ကျောင်းတော်တွေကိုလည်း ပရမ်ဆဆင်းက စောင့်ရှောက်ပေးထားပါတယ်။

Ref: The Print