နိုင်ငံခြားတပ်ဖွဲ့များ နှင်ထုတ်ရေး အစိုးရကို အီရတ်လွှတ်တော် တိုက်တွန်း

ဇန်နဝါရီ ၆၊ ၂၀၂၀
M-Media

-နိုင်ငံအတွင်းမှာရှိနေတဲ့ နိုင်ငံခြားတပ်ဖွဲ့တွေအားလုံးကို နှင်ထုတ်ရေး အစိုးရကိုတိုက်တွန်းတဲ့ ဆုံးဖြတ်ချက်တစ်ခုကို အီရတ်လွှတ်တော်က မနေ့မှာ အတည်ပြုခဲ့ပါတယ်။

အီရန်က ထိပ်တန်းဗိုလ်ချုပ် ကာစင် ဆိုလိုင်မာနီနဲ့ အီရတ်က အင်အားတောင့်တင်းတဲ့ Hashd al-Shaabi ပြည်သူ့စစ်အဖွဲ့ တပ်မှူးတို့ကို အမေရိကန်က လုပ်ကြံသတ်ဖြတ်ခဲ့ပြီးတဲ့နောက် အရှေ့အလယ်ပိုင်းမှာ တင်းမာမှု မြင့်တက်လာတဲ့အချိန် အီရတ်ရဲ့ ဒီဆောင်ရွက်ချက် ပေါ်ထွက်လာတာပါ။

နိုင်ငံအတွင်းမှာရှိတဲ့ နိုင်ငံခြားတပ်ဖွဲ့တွေအားလုံးကို နှင်ထုတ်ရေးအပြင် IS တိုက်ဖျက်ရေး ကူညီနေတဲ့ အမေရိကန်ဦးဆောင်တဲ့ မဟာမိတ်တပ်ဖွဲ့ထံ အကူအညီတောင်းခံထားမှုကို ရုပ်သိမ်းဖို့လည်း အီရတ်လွှတ်တော်က အစိုးရကို တိုက်တွန်းခဲ့ပါတယ်။

လွှတ်တော်ရဲ့ ဆုံးဖြတ်ချက်ဟာ ဥပဒေမဟုတ်တာကြောင့် သဘောထားသက်သက်သာ ဖြစ်ပြီး အကောင်အထည်ဖော်နိုင်ရေး ဥပဒေသစ်တစ်ခု ပြဌာန်းဖို့ လိုအပ်ပါတယ်။

မဲခွဲမှုမပြုခင် အမတ်တွေက ‘အမေရိကန်အလိုမရှိ…. အီရတ်အဓွန့်ရှည်ပါစေ’ လို့ လွှတ်တော်အတွင်းမှာ ဟစ်အော်ခဲ့ကြပါတယ်။ အီရတ်ဝန်ကြီးချုပ် အဒဲလ် အဘ်ဒူလ် မဟ်ဒီက နိုင်ငံခြားတပ်ဖွဲ့တွေ တိုင်းပြည်မှာ မရှိရေး ဆောင်ရွက်ဖို့ လွှတ်တော်ကို တိုက်တွန်းခဲ့ပါတယ်။

အီရတ်နိုင်ငံမှာ အမေရိကန်တပ်ဖွဲ့ဝင် ၅၀၀၀ လောက်ရှိနေပြီး အများစုက အကြံပေးအဖြစ် ဆောင်ရွက်နေကြတာဖြစ်ပါတယ်။ ၂၀၁၄ ခုနှစ်ကနေ ၂၀၁၇ ခုနှစ်အတွင်း အမေရိကန်တပ်ဖွဲ့ဝင်တွေဟာ Hashd al-Shaabi နဲ့အတူ IS အကြမ်းဖက်အဖွဲ့ကို တိုက်ထုတ်ခဲ့ပါတယ်။

သမ္မတဒေါ်နယ်ထရမ့်က အီရတ်အနေနဲ့ အမေရိကန်တပ်ဖွဲ့ဝင်တွေကို နှင်ထုတ်မယ်ဆိုရင် လျောကြေး ဒေါ်လာ ဘီလီယံချီ ပေးရမယ်လို့ တုန့်ပြန်ပြောကြားခဲ့ပါတယ်။

Ref: Aljazeera