ချင်းပြည်နယ်၏ ပထမဆုံးလေယာဉ်ကွင်းကို မေလတွင် ဖွင့်လှစ်မည်

ဇန်နဝါရီ ၇၊ ၂၀၂၀
M-Media

-ချင်းပြည်နယ်ရဲ့ ပထမဆုံး လေယာဉ်ကွင်းကို လာမယ့် မေလနှောင်းပိုင်းမှာ ဖွင့်လှစ်နိုင်တော့မယ်လို့ သိရပါတယ်။

ဖလမ်းမြို့နယ်မှာ တည်ရှိတဲ့ အဲဒီ ‘ဆူရ်ဘုန်’ လေယာဉ်ကွင်းကို ငွေကျပ် ၃၇ ဘီလီယံ အကုန်ကျခံ တည်ဆောက်ခဲ့တာဖြစ်ပါတယ်။ စီမံကိန်းကို ၂၀၁၅ ခုနှစ်မှာ စတင်အကောင်အထည်ဖော်ခဲ့ပြီး ၂၀၂၂ ခုနှစ်မှာ ပြီးစီးဖို့ လျာထားပေမယ့် ပြီးခဲ့တဲ့နှစ် ဇန်နဝါရီလက နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ သမ္မတဦးဝင်းမြင့်တို့ရဲ့ တိုက်ရိုက်ညွှန်ကြားမှုနဲ့ အရှိန်မြှင့် ဆောင်ရွက်ခဲ့တာပါ။

ဆူရ်ဘုန်တောင်တန်းက အဲဒီလေယာဉ်ကွင်းဟာ ပင်လယ်ရေမျက်နှာပြင်အထက် ၁၈၃၀ မီတာမှာ တည်ရှိပြီး ATR-72 လေယာဉ် ဆင်းသက်နိုင်ဖို့ ပြေးလမ်းအရှည် ၁၈၃၀ မီတာ၊ အကျယ် ၃၀ မီတာ ရှိပါတယ်။

ချင်းပြည်နယ်ဟာ တောင်တန်းဒေသဖြစ်တာကြောင့် သွားလာရခက်ခဲပြီး နိုင်ငံအတွင်း ဖွံ့ဖြိုးမှု နောက်အကျဆုံး ပြည်နယ်လည်း ဖြစ်ပါတယ်။ ၂၀၁၇ ခုနှစ် မြန်မာနိုင်ငံရဲ့ လူနေမှုအခြေအနေ စစ်တမ်းအရ ချင်းပြည်နယ် ပြည်သူလူထုရဲ့ ၆၀ ရာခိုင်နှုန်းနီးပါးဟာ ဆင်းရဲမွဲတေတဲ့ အခြေအနေမှာ နေထိုင်နေရတာကို တွေ့ခဲ့ရပါတယ်။

အသည်းပုံ ရိဒ်ရေကန်၊ နာမည်ကျော် နတ်မတောင် အမျိုးသားဥယျာဉ်တွေ ချင်းပြည်နယ်မှာ တည်ရှိတာကြောင့် အခုလို ပထမဆုံးလေဆိပ် ဖွင့်လှစ်နိုင်တာက ပြည်နယ်ရဲ့ ခရီးသွားကဏ္ဍကို တိုးတက်ဖွံ့ဖြိုးစေလိမ့်မယ်လို့ မျှော်လင့်ထားပါတယ်။

ဆူရ်ဘုန်လေယာဉ်ကွင်းအပြင် တီးတိန်၊ တွန်းဇံ၊ ဖလမ်းနဲ့ ဟားခါးမြို့နယ်တွေမှာလည်း လေယာဉ်ကွင်းငယ်တွေ တည်ဆောက်ဖို့ ချင်းပြည်နယ်အစိုးရက စီစဉ်ထားပါတယ်။ မြန်မာနိုင်ငံမှာ နိုင်ငံတကာ လေယာဉ်ကွင်း ၃ ခု ရှိပြီး၊ ပြည်တွင်းလေယာဉ်ကွင်း ၅၈ ခုမှာ လက်ရှိ ၃၁ ခု လည်ပတ်နေပါတယ်။

Ref: mmtimes