အင်ဒို-တရုတ် ရေပိုင်နက်အငြင်းပွားမှု ထိပ်တိုက်တွေ့သည့်အဆင့် ရောက်လာ

ဇန်နဝါရီ ၇၊ ၂၀၂၀
M-Media

-တောင်တရုတ်ပင်လယ်အတွင်းက နာတူနာကျွန်းအနီး တရုတ်နဲ့ အင်ဒိုနီးရှားတို့ရဲ့ ရေပိုင်နက် အငြင်းပွားမှုဟာ ပြီးခဲ့တဲ့ရက်အနည်းငယ်အတွင်း ထိပ်တိုက်တွေ့တဲ့အဆင့်ကို ရောက်လာပါတယ်။

အင်ဒိုနီးရှားဟာ မနေ့က အငြင်းပွားရေပိုင်နက်အနီး စစ်သင်္ဘော ၄ စင်း စေလွှတ်ခဲ့ပြီး စုစုပေါင်း ၈ စင်းအထိ ရှိလာမှာ ဖြစ်ပါတယ်။

အင်ဒိုနီးရှား အထူးစီးပွားရေးဇုန်မှာ ပါဝင်နေတဲ့ ရေပိုင်နက်အတွင်းကို ပြီးခဲ့တဲ့လက တရုတ်ငါးဖမ်းသင်္ဘော ဒါဇင်နဲ့ချီ ဝင်ရောက်လာခဲ့ပြီးတဲ့နောက် အင်ဒိုနီးရှားနဲ့ တရုတ်တို့အကြား ရေပိုင်နက်အငြင်းပွားမှုအခြေအနေ မြင့်တက်လာတာ ဖြစ်ပါတယ်။

တရုတ်ကတော့ နာတူနာကျွန်းအနီး ရေပိုင်နက်ဟာ တရုတ်ငါးဖမ်းသမားတွေ မျိုးရိုးစဉ်ဆက် ငါးဖမ်းရာနေရာ ဖြစ်တယ်လို့ ပြောကြားထားပါတယ်။

အင်ဒိုနီးရှား အမှတ် (၁) ရေတပ် တပ်မှူး ဖာဂျာရ် ထရီ ရိုဟာဒီက စစ်သင်္ဘောတွေနဲ့အတူ ရာနဲ့ချီတဲ့ တပ်ဖွဲ့ဝင်တွေကို ချထားကြောင်း၊ လေကြောင်းနဲ့ ရေကြောင်းလုံခြုံရေးဘုတ်အဖွဲ့ကလည်း ကင်းလှည်စောင့်ကြပ်မှုတွေ ပြုလုပ်နေကြောင်း မနေ့က ထုတ်ပြန်ပြောကြားခဲ့ပါတယ်။

“ငါးဖမ်းသင်္ဘောတွေ ထွက်သွားလိမ့်မယ်လို့ ကျွန်တော်တို့ မျှော်လင့်တယ်။ သူတို့တွေဟာ တရားမဝင် ငါးဖမ်းနေကြတာဖြစ်ပါတယ်။ သူတို့ မထွက်သွားဘူးဆိုရင် အင်ဒိုနီးရှားရဲ့ အချုပ်အခြာ၊ အင်ဒိုနီးရှားရဲ့ဥပဒေ ဘာလဲဆိုတာ ဖမ်းပြီး ပြသရလိမ့်မယ်”

တစ်နေရာကို အနည်းဆုံး ၂ စီးနှုန်းနဲ့ နာတူနာကျွန်းတစ်၀ိုက်က နေရာ ၃၀ လောက်မှာ တရုတ် ငါးဖမ်းသင်္ဘောတွေ တည်ရှိပြီး၊ တရုတ်ကမ်းခြေစောင့်သင်္ဘော ၃ စီးလည်း ရှိနေတယ်လို့ ရိုဟာဒီက ဆိုပါတယ်။

အင်ဒိုနီးရှားရဲ့ ဥပဒေဟာ နိုင်ငံတကာစံချိန်မီဖြစ်တာ‌ကြောင့် နိုင်ငံတကာ ဥပဒေကို လိုက်နာလိုသူတွေအနေနဲ့ အင်ဒိုနီရှားရေပိုင်နက် ဘယ်ဟာလဲဆိုတာကို သိရှိမှာဖြစ်ကြောင်းလည်း သူက ထည့်သွင်းပြောဆိုခဲ့ပါတယ်။

တရုတ်ငါးဖမ်းသင်္ဘောတွေကို တန်ပြန်ဖို့အတွက် ပြည်တွင်းက ငါးဖမ်းသင်္ဘောတွေကို နာတူနာကျွန်းတစ်၀ိုက် စေလွှတ်ဖို့လည်း အင်ဒိုနီးရှားအစိုးရက စီစဉ်ထားပါတယ်။

ဗီယက်နမ်နဲ့ ဖိလစ်ပိုင်အပါအဝင် အရှေ့တောင်အာရှ နိုင်ငံတော်တော်များများဟာ တောင်တရုတ်ပင်လယ်မှာ တရုတ်နဲ့ ရေပိုင်နက်အငြင်းပွားမှုတွေ ရှိနေတာပါ။

အင်ဒိုနီးရှားဟာ အရင်က ပိုင်နက်အငြင်းပွားတာမျိုး မရှိပေမယ့် နာတူနာကျွန်းတစ်၀ိုက်မှာ ငါးဖမ်းခွင့်နဲ့ပတ်သက်ပြီး တရုတ်နဲ့ အခြေအတင် ဖြစ်နေတာ ဖြစ်ပါတယ်။ ၂၀၁၆ ခုနှစ် ဒီပြဿနာ ပေါ်ပေါက်လာပြီးနောက်ပိုင်း အင်ဒိုနီးရှားဟာ တရုတ်ငါးဖမ်းသင်္ဘောတွေကို ဖမ်းဆီးခဲ့ပြီး ကျွန်းအနီးမှာ စစ်အခြေစိုက်စခန်းတစ်ခု တည်ဆောက်ခဲ့ပါတယ်။

အခု ကျူးကျော်မှုအတွက် အင်ဒိုနီးရှားနိုင်ငံခြားရေးဝန်ကြီးက ပြီးခဲ့တဲ့တစ်ပတ်မှာ ကြေငြာချက်တစ်စောင် ထုတ်ပြန်ကာ ရှုတ်ချခဲ့ပါတယ်။

Ref: CNA