ယူကရိန်းခရီးသည်တင်လေယာဉ် တီဟီရန်တွင်ပျက်ကျ

ဇန်နဝါရီ ၈၊ ၂၀၂၀
M-Media

-အီရန်မြို့တော် တီဟီရန်က အီမာမ် ခိုမေနီလေဆိပ်အနီးမှာ ယူကရိန်း ခရီးသည်တင်လေယာဉ်တစ်စင်း ဒီကနေ့မနက်ပိုင်းက ပျက်ကျခဲ့ပြီး လေယာဉ်ပေါ်လိုက်ပါသွားသူအားလုံး သေဆုံးခဲ့ပါတယ်။

Boeing 737-800 လေယာဉ်ဟာ ယူကရိန်းနိုင်ငံ ကိဗ်မြို့ကို ပျံသန်းမှာဖြစ်ပြီး လေယာဉ်ကွင်းက အတက်မှာပဲ ပျက်ကျခဲ့တာပါ။ အီရန်ပို့ဆောင်ရေးဝန်ကြီးဌာန တာဝန်ရှိသူ ကာဆင် ဘီနီယက်ဇ်က အင်ဂျင်တစ်လုံးမီးလောင်ပြီး ပျက်ကျခဲ့တာဖြစ်တယ်လို့ ဆိုပါတယ်။

လေယာဉ်ပေါ်မှာ ခရီးသည် ၁၇၆ ဦးနဲ့ လေယာဉ်အမှုထမ်းတွေ လိုက်ပါသွားပြီး အသက်ရှင်ကျန်ရစ်သူ မရှိပါဘူး။ အများစုဟာ အီရန်နိုင်ငံသားတွေဖြစ်ပြီး၊ ကနေဒါ၊ ယူကရိန်း၊ ဆွီဒင်၊ အာဖဂန်နဲ့ ဂျာမနီနိုင်ငံတွေကလည်း ပါဝင်ပါတယ်။

ယူကရိန်းသမ္မတက ဒီအဖြစ်အပျက်အတွက် ဝမ်းနည်းကြောင်းပြောကြားခဲ့ပါတယ်။ လေယာဉ်ကို ထုတ်လုပ်တဲ့ ဘိုးအင်းကုမ္ပဏီကလည်း ပျက်ကျမှုသတင်းကို ရရှိထားပြီး အချက်အလက်တွေ စုဆောင်းနေတယ်လို့ ထုတ်ပြန်ထားပါတယ်။

ဘိုးအင်းရဲ့ 737-800 လေယာဉ်တွေဟာ အင်ဂျင် ၂ လုံးတပ်လေယာဉ်တွေဖြစ်ပြီး ပြီးခဲ့တဲ့နှစ်အနည်းငယ်အတွင်း လေယာဉ်ပျက်ကျမှုတွေထဲမှာ ဒီလေယာဉ်တွေ ပါဝင်ခဲ့ပါတယ်။ ၂၀၁၆ ခုနှစ်မတ်လ ရုရှားမှာ ပျက်ကျခဲ့တဲ့ ဒူဘိုင်းခရီးသည်တင်လေယာဉ်၊ ၂၀၁၀ ခုနှစ် မေလက အိန္ဒိယနိုင်ငံမှာ မန်ဂလောရ်မှာ ပျက်ကျခဲ့တဲ့ ခရီးသည်တင်လေယာဉ်တွေဟာ 737-800 လေယာဉ်တွေ ဖြစ်ပါတယ်။

Ref: Aljazeera