ကမ္ဘာ့ပထမဆုံး မောင်းသူမဲ့ကျည်ဆန်ရထား တရုတ်ပြည်တွင် စတင်ပြေးဆွဲ

ဇန်နဝါရီ ၉၊ ၂၀၂၀
M-Media

-ကမ္ဘာ့ပထမဆုံး မောင်းသူမဲ့ ကျည်ဆန်ရထားကို တရုတ်နိုင်ငံမှာ အခုနှစ်ဆန်းပိုင်းက စတင်ပြီး ပြေးဆွဲနေပြီ ဖြစ်ပါတယ်။

မြို့တော် ဘေဂျင်းကနေ ၂၀၂၂ ဆောင်းရာသီအိုလံပစ်ကျင်းပမယ့် နိုင်ငံမြောက်ပိုင်းက ကျန်းကျားခိုမြို့အထိရောက်မယ့် အဲဒီရထားလိုင်းဟာ မိုင်ပေါင်း ၁၀၈ မိုင် ရှည်လျားပါတယ်။

ဒီမောင်းသူနဲ့ ကျည်ဆန်ရထားဟာ အမြင့်ဆုံး တစ်နာရီ ကီလိုမီတာ ၃၅၀ (၂၁၇ မိုင်) ပြေးဆွဲနိုင်ပြီး အရင်က ၃ နာရီလောက်သွားရတဲ့ ဘေဂျင်း-ကျန်းကျားခိုခရီးစဉ်ဟာ အခုဆိုရင် ၄၇ မိနစ်သာ ကြာမြင့်တော့မှာ ဖြစ်ပါတယ်။

ရထားလမ်းကို ၄ နှစ်တာ အချိန်ယူတည်ဆောက်ခဲ့ရတာဖြစ်ပြီး အိုလံပစ်ပြိုင်ပွဲ ကျင်းပမယ့် ဘေဂျင်း၊ ယန်ကျင်းနဲ့ ကျန်းကျားခိုမြို့တွေကို ဆက်သွယ်ထားကာ ကြားဘူတာ ၁၀ ခု ပါဝင်မှာ ဖြစ်ပါတယ်။

ရထားမှာ 5G တယ်လီဖုန်းကွန်ယက်၊ စမတ်မီးလင်းစနစ်တွေ ပါဝင်သလို၊ မောင်းနှင်မှုအတွင်း အချက်အလက်တွေ ကောက်ယူဖို့နဲ့ ချို့ယွင်းချက်တွေကို စောင့်ကြည့်နိုင်ဖို့အတွက် ဆင်ဆာပေါင်း ၂၇၁၈ ခု တပ်ဆင်ထားပါတယ်။ ထိုင်ခုံတစ်ခုချင်းစီမှာလည်း touch-screen အသုံးပြုစနစ်၊ ဖုန်းအားသွင်းရာနေရာတွေ ပါဝင်မှာပါ။

ရထားဟာ မောင်းနှင်တာ၊ ရပ်တန့်တာ၊ အရှိန်တင်၊ အရှိန်လျော့တာတွေကို အလိုအလျောက် လုပ်ဆောင်မှာဖြစ်ပေမယ့် ရထားကိုစောင့်ကြည့်မယ့် စက်မောင်းတစ်ဦး အချိန်ပြည့် လိုက်ပါမှာ ဖြစ်ပါတယ်။

ဘူတာရုံတွေမှာလည်း ခရီးသည်တွေကိုလမ်းညွှန်ဖို့၊ ခရီးဆောင်အိတ်တွေကို စီမံခန့်ခွဲဖို့၊ စာရွက်မလိုတဲ့ လက်မှတ်ဖြတ်မှုတွေအတွက် စက်ရုပ်တွေ၊ အဆင့်မြင့်နည်းပညာတွေကို အသုံးပြုထားပါတယ်။

ရထားတွဲတွေကို အိုလံပစ်ပြိုင်ပွဲ လာရောက်မယ့် အားကစားသမားတွေ၊ သတင်းလာယူမယ့် ဂျာနယ်လစ်တွေနဲ့ ကိုက်ညီမယ့် ဒီဇိုင်းမျို းဖန်တီးထားတာပါ။ တစ်ချို့တွဲဆိုင်းတွေမှာ ဆောင်းရာသီအားကစားပစ္စည်းတွေ သိမ်းဆည်းနိုင်မယ့် နေရာတွေ ထည့်သွင်းထားပါတယ်။ ရထားတွဲကို မသန်စွမ်းသူတွေလည်း လွယ်ကူစွာ အသုံးပြုနိုင်မှာ ဖြစ်ပါတယ်။

တရုတ်ဟာ ကမ္ဘာ့ကျည်ဆန်ရထားကွန်ယက် အများဆုံးရှိရာ နိုင်ငံဖြစ်ပြီး အမြန်နှုန်းအမြင့်ဆုံး ရထားလိုင်းက တစ်နာရီကို ၄၃၁ ကီလိုမီတာအထိ ခုတ်မောင်းနိုင်ပါတယ်။

Ref: CNN