ယူကရိန်းခရီးသည်တင်လေယာဉ်ကို မှားယွင်းပစ်ချမိကြောင်း အီရန် ဝန်ခံ

ဇန်နဝါရီ ၁၁၊ ၂၀၂၀
M-Media

-အခုတစ်ပတ်အစောပိုင်းက မြို့တော်တီဟီရန်အနီး ယူကရိန်းလေယာဉ် ပျက်ကျသွားတာဟာ မိမိတို့က မှားယွင်းပစ်ချမိတာကြောင့် ဖြစ်တယ်လို့ အီရန်က ဒီကနေ့မှာ ဝန်ခံလိုက်ပါတယ်။

ခရီးသည် ၁၇၆ ဦး နဲ့ လေယာဉ်အမှုထမ်း ၉ ဦး လိုက်ပါသွားတဲ့ အဲဒီလေယာဉ်ဟာ ယူကရိန်းနိုင်ငံ ကိဗ်မြို့ကိုသွားဖို့ အီမာမ်ခိုမေနီလေဆိပ်က ပျံတက်ပြီး သိပ်မကြာခင်မှာ ပျက်ကျသွားတာပါ။ အီရတ်မှာရှိတဲ့ အမေရိကန် စစ်အခြေစိုက်စခန်းတွေကို အီရန်က ဒုံးကျည်တွေနဲ့ တိုက်ခိုက်ပြီး နာရီပိုင်းအကြာမှာ ဒီအဖြစ်အပျက် ဖြစ်ပွားခဲ့တာ ဖြစ်ပါတယ်။

ဒီကနေ့မနက် အီရန်စစ်ဦးစီးအရာရှိချုပ်က ထုတ်ပြန်တဲ့ ကြေငြာချက်မှာ အဲဒီ ခရီးသည်တင်လေယာဉ်ဟာ စစ်ရေးအရ အရေးပါတဲ့ နေရာအနီးကို ပျံသန်းသွားချိန်၊ စစ်သည်တွေရဲ့ အမှားကြောင့် ပစ်ချလိုက်မိတာဖြစ်တယ်လို့ ဖော်ပြထားပါတယ်။

အီရန်သမ္မတ ဟာဆန်ရူဟာနီက ဒီလိုဆိုးရွားတဲ့အမှားအတွက် အလွန်အမင်း ကြေကွဲနောင်တရမိပြီး ထိခိုက်ခံစားရသူတွေအတွက် ဝမ်းနည်းမိကြောင်း၊ ခွင့်လွှတ်နိုင်စရာမရှိတဲ့ ဒီလိုအမှားမျိုးကို စုံစမ်းစစ်ဆေးဖော်ထုတ်ကာ အရေးယူဆောင်ရွက်သွားမှာဖြစ်ကြောင်း ဆိုရှယ်မီဒီယာမှာ ရေးသားခဲ့ပါတယ်။

ကနေဒါနဲ့ အမေရိကန်အပါအဝင် အနောက်နိုင်ငံတွေက ယူကရိန်းခရီးသည်တင်လေယာဉ်ကို အီရန်က မှားယွင်း ပစ်ချလိုက်တာ ဖြစ်မယ်လို့ ပြီးခဲ့တဲ့ရက်ပိုင်းမှာ ပြောကြားခဲ့ပြီး အီရန်က အစောပိုင်းမှာ ငြင်းဆိုခဲ့ပါ‌သေးတယ်။ အီရတ်က အမေရိန်ကစစ်စခန်းတွေကို ဒုံးကျည်နဲ့တိုက်ခိုက်အပြီး တုန့်ပြန်လာမှာကို စိုးရိမ်တဲ့အတွက် ဒုံးခွင်းစနစ်တွေ ဖွင့်ထားချိန်မှာ မတော်တဆ ပစ်ချမိလိုက်တာ ဖြစ်နိုင်တယ်လို့လည်း အမေရိကန်မီဒီယာတွေက ဖော်ပြခဲ့ကြပါတယ်။

Ref: Aljazeera