ညစ်ညမ်းမြစ်တွေကို သန့်ရှင်းဖို့ နည်းလမ်းသစ်တစ်မျိုးကို မလေးရှား အသုံးပြုလာ

ဇန်ဝါရီ ၁၆၊ ၂၀၂၀
M-Media

-ပလက်စတစ်တွေ အမှိုက်တွေနဲ့ ညစ်ညမ်းနေတဲ့မြစ်တွေကို ရှင်းလင်းဖို့အတွက် မလေးရှားနိုင်ငံဟာ နေစွမ်းအင်သုံး အမှိုက်သိမ်းဘော်ယာကြီးတွေကို အသုံးပြုလာပါတယ်။

အအေးသောက်တဲ့ပိုက်လို နေ့စဉ်အသုံးပြုနေတဲ့ လူသုံးကုန်ပစ္စည်းတွေကနေ စက်မှုလုပ်ငန်း စွန့်ပစ်ပစ္စည်းတွေအထိ တစ်နှစ်ကို ပလက်စတစ် တန်ပေါင်း ၈ သန်းလောက် သမုဒ္ဒရာတွေထဲကို ဝင်ရောက်နေတယ်လို့ အမေရိကန်အခြေစိုက် Ocean Conservancy အဖွဲ့က ထုတ်ပြန်ထားပါတယ်။

နောက်ဆက်တွဲဆိုးကျိုးအနေနဲ့ ရေထုညစ်ညမ်းတာ၊ ရေနေသတ္တဝါတွေရဲ့ အသက်ရှင်သန်နေထိုင်မှုကို ထိခိုက်တာတွေ ဖြစ်ပေါ်လာခဲ့ပါတယ်။

မလေးရှားမှာတော့ ပလက်စတစ်တွေ၊ အမှိုက်တွေနဲ့ ညစ်ညမ်းလွန်းတဲ့မြစ်တွေကို ရှင်းလင်းဖို့အတွက် ၂၄ မီတာအရှည်ရှိတဲ့ နေစွမ်းအင်သုံး အမှိုက်သိမ်းဘော်ယာကို အသုံးပြုနေပါတယ်။ Interceptor လို့ အမည်ပေးထားတဲ့ အဲဒီ ဘော်ယာဟာ မြစ်ထဲက အမှိုက်တွေကို အလိုအလျောက်ဆယ်ယူကာ အမှိုက်ပုံးထဲ ထည့်ပေးပြီး တစ်နေ့ကို အမှိုက် တန်ချိန်ပေါင်း ၅၀ လောက်ကို ရှင်းလင်းနိုင်ပါတယ်။

ဒီအိုက်ဒီယာကို နယ်သာလန်က အကူအညီပေးရေးအဖွဲ့ Ocean Cleanup က စတင်ခဲ့တာဖြစ်ပြီး မလေးရှားမှာတော့ ဒေသတွင်း ကုမ္ပဏီ Landasan Lumayan နဲ့ ပူးပေါင်းလုပ်ဆောင်နေပါတယ်။

Interceptor ဟာ ကမ္ဘာ့ ၅၀ ခုမြောက် အညစ်ညမ်းဆုံး‌မြစ်ဖြစ်တဲ့ ကွာလာလမ်ပူက ကလန်းမြစ်မှာ ပြီးခဲ့တဲ့နှစ် အောက်တိုဘာလကစပြီး ရှင်းလင်းမှုတွေ လုပ်ဆောင်နေပါတယ်။ မလေးရှားနိုင်ငံမှာ Interceptor ကို လွန်ခဲ့တဲ့ ၄ နှစ်က စတင်အသုံးပြုခဲ့တာဖြစ်ပြီး မြစ်တွေထဲက အမိုက်တန်ပေါင်း ၅ သောင်းလောက်ကို ရှင်းလင်းပေးနိုင်ခဲ့ပြီ ဖြစ်ပါတယ်။

Ocean Cleanup အဖွဲ့ဟာ လက်ရှိမှာ အမှိုက်သိမ်းဘော်ယာ ၄ ခု တည်ဆောက်ထားပြီး မလေးရှား၊ အင်ဒိုနီးရှားနိုင်ငံတွေမှာ အသုံးပြုနေကာ ဗီယက်နမ်နဲ့ ဒိုမီနီကန်နိုင်ငံတွေကိုလည်း ပို့ဆောင်သွားဖို့ ရှိပါတယ်။ ထိုင်းနိုင်ငံနဲ့ အမေရိကန်ပြည်ထောင်စု လော့စ်အိန်ဂျလိစ်တို့ကလည်း ဘော်ယာတွေရရှိရေး ဒီအဖွဲ့နဲ့ သဘောတူညီချက် ရထားပါတယ်။

တစ်စီးတည်ဆောက်စားရိတ်ဟာ ကန်ဒေါ်လာ ၇ သိန်း ၇ သောင်းကျော်လောက် ကျပေမယ့် များများထုတ်လုပ်နိုင်ရင် စျေးကျသွားလိမ့်မယ်လို့ Ocean Cleanup အဖွဲ့က မျှော်လင့်နေပါတယ်။

ညစ်ညမ်းနေတဲ့မြစ်တွေကို ရှင်းလင်းရေး ဒီဘော်ယာတွေက အထောက်အကူဖြစ်စေနိုင်ပေမယ့် အမှိုက်ကင်းစင်တဲ့ မြစ်ချောင်းအင်းအိုင်တွေ ဖြစ်လာဖို့အတွက် လူတွေရဲ့ အမှိုက်ပစ်တဲ့အပြုအမူတွေ ပြောင်းလဲဖို့ လိုအပ်တယ်လို့ Landasan Lumayan ကုမ္ပဏီရဲ့ တာဝန်ရှိသူ ဆိုက်ဖွလ်က ပြောကြားခဲ့ပါတယ်။

Ref: CNA