တရုတ်တွင် အမည်မသိရောဂါပြန့်နှံ့ဖြစ်ပွားမှု တရားဝင်ထုတ်ပြန်ထားသည့်ထက် ပိုများနိုင်

ဇန်နဝါရီ ၁၈၊ ၂၀၂၀
M-Media

-တရုတ်နိုင်ငံအလယ်ပိုင်း ဝူဟန်မြို့က အမည်မသိ အဆုတ်ရောင်ရောဂါသစ် ကူးစက်ပြန့်နှံ့မှုဟာ တရုတ်အစိုးရရဲ့ ထုတ်ပြန်ချက် များပြားပြီး လူတစ်‌ထောင်ကျော်လောက် ရှိနိုင်တယ်လို့ လေ့လာဆန်းစစ်သူတွေက ပြောကြားလိုက်ပါတယ်။

ပင်လယ်စာစျေးတစ်ခုကနေ စတင်ခဲ့တဲ့ ဒီရောဂါ ကူးစက်သူဟာ အနည်းဆုံး ၄၁ ဦး ရှိနေပြီလို့ အရင်က တရုတ်အာဏာပိုင်တွေ ထုတ်ပြန်ထားပြီး ဒီကနေ့မှာတော့ နောက်ထပ် ၄ ဦး ထပ်မံကူးစက်ခဲ့တယ်လို့ ဆိုပါတယ်။ ရောဂါကြောင့် သေဆုံးသူဟာ ၂ ဦးအထိ ရှိလာပါတယ်။

လန်ဒန် Imperial ကောလိပ်က ကမ္ဘာ့ကူးစက်ရောဂါ လေ့လာဆန်းစစ်ရေးဌာနရဲ့ မနေ့က ထုတ်ပြန်တဲ့ အစီရင်ခံစာမှာ ဒီရောဂါကူးစက်သူအရေအတွက်ဟာ ဇန်နဝါရီ ၁၂ ရက်နေ့အထိ တစ်ထောင်ကျော်နိုင်တယ်လို့ ဖော်ပြထားပြီး WHO အပါအဝင် ကမ္ဘာတစ်ဝှမ်း ကျန်းမာရေးအဖွဲ့အစည်းတွေကိုလည်း ထိထိရောက်ရောက် ကိုင်တွယ်ဖို့ တိုက်တွန်းခဲ့ပါတယ်။

ထိုင်းနိုင်ငံမှာ ဒီရောဂါကူးစက်နေသူ ၂ ဦး၊ ဂျပန်နိုင်ငံမှာတစ်ဦး တွေ့ရှိခဲ့ရပြီး ဒါကိုအခြေခံကာ ဝူဟန်မြို့ လေဆိပ်က ရရှိတဲ့ နိုင်ငံတကာ လေကြောင်းသွားလာမှု အချက်အလက်တွေကို ပေါင်းစပ်ပြီး ပညာရှင်တွေက သုံးသပ်ခဲ့ကြတာ ဖြစ်ပါတယ်။

လေ့လာဆန်းစစ်မှု ပြုလုပ်သူတွေထဲက ပညာရှင်တစ်ဦးဖြစ်တဲ့ ပရော်ဖက်ဆာ နီးလ် ဖာဂူဆန်က ဝူဟန်မြို့က ကူးစက်သူ ၃ ဦး အခြားနိုင်ငံတွေကို ရောက်ရှိသွားတာကြည့်ရင် မြို့တွင်းမှာ အမှန်တကယ် ကူးစက်သူအရေအတွက်ဟာ သတင်းထုတ်ပြန်တာထက် ပိုမိုများပြားနိုင်တယ်လို့ ပြောကြားခဲ့ပါတယ်။

လွန်ခဲ့တဲ့ ၁၀ နှစ်အရင် တရုတ်နိုင်ငံက စတင်ခဲ့တဲ့ SARS ရောဂါကြောင့် ကမ္ဘာတစ်ဝှမ်း လူထောင်သောင်းချီ ကူးစက်ကာ လူရာချီ သေဆုံးခဲ့ပါတယ်။ တရုတ်အာဏာပိုင်တွေက အခုရောဂါဟာ SARS ရောဂါလောက် ပြင်းထန်မှုမရှိဘူးလို့ ထုတ်ပြန်ထားပါတယ်။

‌ဟောင်ကောင်၊ အမေရိကန်နဲ့ ထိုင်းတို့အပါအဝင် ကမ္ဘာတစ်ဝှမ်း နိုင်ငံတော်တော်များများကလည်း တရုတ်နိုင်ငံကနေ ရောက်ရှိလာတဲ့ ခရီးသည်တွေကို စောင့်ကြည့်မှုတွေ လုပ်ဆောင်နေပါတယ်။

Ref: Aljazeera