အမည်မသိ အဆုတ်ရောင်ရောဂါပြန့်နှံ့မှု တစ်ပတ်အတွင်း ၁၄၀ နီးပါးရှိဟု တရုတ်အတည်ပြု

ဇန်နဝါရီ ၂၀၊ ၂၀၂၀
M-Media

-အမည်မသိ နမိုးနီးယားရောဂါကြောင့် လူတစ်ဦး ထပ်မံသေဆုံးခဲ့ပြီး ကူးစက်မှု ၁၄၀ နီးပါးဖြစ်လာကာ နိုင်ငံရဲ့ အခြားဒေသတွေအထိ ရောက်ရှိလာတယ်လို့ တရုတ်အာဏာပိုင်တွေက ဒီကနေ့မှာ အတည်ပြု ပြောကြားလိုက်ပါတယ်။

နိုင်ငံအလယ်ပိုင်း ဝူဟန်မြို့က ပင်လယ်စာစျေးကနေ စတင်ကူးစက်ဖြစ်ပွားတဲ့ အဆုတ်ရောင်ရောဂါဟာ အခုအချိန်မှာတော့ အရှေ့ပိုင်းက မြို့တော်ဘေဂျင်းနဲ့ တောင်ပိုင်းက ဂွမ်ဒုန်းပြည်နယ်တွေအထိ ပြန့်နှံ့ရောက်ရှိနေပြီ ဖြစ်ပါတယ်။

တောင်ပိုင်းက ရှင်ကျန်းမြို့မှာ အသက် ၆၆ နှစ်အရွယ်အမျိုးသားတစ်ဦး မနေ့က သေဆုံးသွားခဲ့ပြီး ဒါဟာ အမည်မသိ အဆုတ်ရောင်ရောဂါကြောင့် တတိယမြောက်သေဆုံးသူ ဖြစ်ပါတယ်။ ဝူဟန်ကို သွားရောက်ခဲ့တဲ့ အဲဒီအမျိုးသားကို ဇန်နဝါရီ ၁၁ ရက်နေ့ကတည်းက သီးသန့်ခွဲထား ကုသခဲ့တာ ဖြစ်ပါတယ်။

ပြီးခဲ့တဲ့တစ်ပတ်အတွင်း နောက်ထပ် ကူးစက်မှု ၁၃၆ ခု တွေ့ခဲ့တယ်လို့ ဝူဟန်အာဏာပိုင်တွေက အတည်ပြုခဲ့ပါတယ်။ ဘေဂျင်းမှာ ကူးစက်မှု ၂ ခုရှိခဲ့ပြီး ဂွမ်ဒုန်းမှာ ကူးစက်မှု တစ်ခု ရှိခဲ့ပါတယ်။ ရောဂါသံသယကြောင့် စောင့်ကြည့်ကုသရသူ အရေအတွက်ဟာ တရုတ်နိုင်ငံတစ်ဝှမ်းမှာ ၂၀၁ ဦး ရှိခဲ့ပြီး ၉ ဦးက စိုးရိမ်ရတဲ့အနေအထားမှာ ရှိနေပါတယ်။

နိုင်ငံရပ်ခြား ကူးစက်မှုကတော့ ထိုင်းနိုင်ငံမှာ ၂ ဦး၊ ဂျပန်နိုင်ငံမှာ ၁ ဦး ရှိနေပါတယ်။ အခုတစ်ပတ် တရုတ်နှစ်ကူး အားလပ်ရက်မှာ တရုတ်နိုင်ငံသားတွေ ခရီးထွက်မှာကြောင့် ဒီရောဂါ အလွန်အမင်း ပြန့်နှံ့သွားနိုင်တယ်ဆိုတဲ့ စိုးရိမ်မှုတွေလည်း ရှိနေပါတယ်။

Ref: CNA