ချမ်းသာသည့် ကနေဒါနိုင်ငံတွင် လူသန်းချီ ငတ်မွတ်ခေါင်းပါး‌နေ

ဇန်နဝါရီ ၂၂၊ ၂၀၂၀
M-Media

-ချမ်းသာကြွယ်၀တဲ့နိုင်ငံတစ်ခုလို့ သတ်မှတ်ခံထားရတဲ့ ကနေဒါနိုင်ငံမှာ ငတ်မွတ်ခေါင်းပါးသူအရေအတွက်ဟာ သန်းနဲ့ချီရှိနေပြီး နောက်ဆက်တွဲဆိုးကျိုးတွေကို ခံစားနေရတယ်လို့ မကြာသေးခင်က ပြုလုပ်ခဲ့တဲ့ လေ့လာမှုတစ်ရပ်မှာ တွေ့ရှိခဲ့ပါတယ်။

ကနေဒါနိုင်ငံက အရွယ်ရောက်ပြီးသူ ၅ သိန်းကျော်ကို အခြေခံတဲ့ အဲဒီ လေ့လာဆန်းစစ်မှုအရ ကင်ဆာကလွဲရင် အခြားသေဆုံးမှုတွေမှာ စားနပ်ရိက္ခာ မလုံလောက်မှုနဲ့ တစ်နည်းမဟုတ်တစ်နည်း ဆက်စပ်နေတယ်ဆိုတာကို တွေ့ခဲ့ရပါတယ်။ စားနပ်ရိက္ခာ လုံလုံလောက်လောက် ရသူတွေထက်၊ မရသူတွေမှာ ကူးစက်ရောဂါ၊ နာတာရှည်ရောဂါဖြစ်ပွားတာ၊ မိမိကိုယ်ကို သတ်‌သေတာတွေကလည်း ၂ ဆလောက် မြင့်တက်လာတာကို တွေ့ရတယ်လို့လည်း Canadian Medical Association ဂျာနယ်မှာ ဖော်ပြထားတဲ့ လေ့လာမှုရလဒ်က ဆိုပါတယ်။

လေ့လာဆန်းစစ်မှုမှာ ပါဝင်သူ ဖီမန်က တတိယကမ္ဘာမှာ ဖြစ်ပျက်နေတာတွေကို ပထမကမ္ဘာမှာ တွေ့ရှိခဲ့တာဖြစ်ကြောင်း၊ ကနေဒါက စားနပ်ရိက္ခာ မလုံလောက်သူတွေမှာ ကူးစက်ရောဂါ၊ ဆေးအဆိပ်အတောက်ဖြစ်တာတွေလို ပြဿနာတွေကို တွေ့ရပြီး အခြား ဖွံ့ဖြိုးပြီးနိုင်ငံတွေမှာလည်း ဒီအခြေအနေတွေကို တွေ့ရနိုင်ကြောင်း ပြောကြားခဲ့ပါတယ်။

“လေ့လာဆန်းစစ်မှုရလဒ်က ကျွန်တော်တို့ကို တော်တော်လေး တုန်လှုပ်စေပါတယ်။ ကနေဒါလို ဖွံ့ဖြိုးပြီးနိုင်ငံမှာတောင် စားနပ်ရိက္ခာမလုံလောက်မှုဟာ လူတွေသေစေတဲ့ အကြောင်းအရင်း ဖြစ်နေပါတယ်”

တရားဝင်ကိန်းဂဏန်းတွေအရ ကနေဒါနိုင်ငံမှာ လူပေါင်း ၄ သန်းလောက် စားနပ်ရိက္ခာ မလုံလောက်တာကို တွေ့ရပါတယ်။ နောက်ဆက်တွဲအဖြစ် ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ ဆုတ်ယုတ်မှုကို ဖြစ်ပေါ်စေတယ်လို့လည်း မန်က ထည့်သွင်း ပြောကြားခဲ့ပါတယ်။

‌ကမ္ဘာတစ်ဝှမ်းမှာ လူပေါင်း ၂ ဘီလီယံလောက်ဟာ ကျန်းမာရေးနဲ့ညီညွတ်တဲ့ အစားအသောက်တွေ လုံလုံလောက်လောက်မရဘဲ ကျန်းမာရေးဆိုင်ရာ ပြဿနာတွေကို ရင်ဆိုင်နေရပါတယ်။ ဒီအရေအတွက်ရဲ့ ၈ ရာခိုင်နှုန်းက မြောက်အမေရိကနဲ့ ဥရောပနိုင်ငံတွေက ဖြစ်ပါတယ်။

ရောဂါတွေ၊ ထိခိုက်ဒဏ်ရာရမှုတွေကို တားဆီးကာကွယ်ရာမှာ ‌လူတွေ စားနပ်ရိက္ခာ လုံလုံလောက်လောက် မရတဲ့အချက်ကို အဓိကထားပြီး ဖြေရှင်းသင့်တယ်လို့လည်း ကနေဒါက‌ လေ့လာဆန်းစစ်သူတွေက အာဏာပိုင်တွေကို အကြံပြုခဲ့ပါတယ်။

Ref: Reuters