တာလီဘန်က လေယာဉ်ပစ်ချခဲ့သည်ဆိုသည့်သတင်း အမေရိကန်ငြင်း

ဇန်နဝါရီ ၂၈၊ ၂၀၂၀
M-Media

-အာဖဂန်နစ္စတန်မှာ မနေ့က လေယာဉ်တစ်စီး ပျက်ကျခဲ့တယ်ဆိုတာကို အမေရိကန်စစ်တပ်က အတည်ပြုခဲ့ပေမယ့် တာလီဘန်က ပစ်ချတယ်ဆိုတဲ့ သတင်းကိုတော့ ငြင်းဆိုခဲ့ပါတယ်။

အမေရိကန်စစ်လေယာဉ် Bombardier E-11A ဟာ နိုင်ငံအလယ်ပိုင်း ဂဇ်နီပြည်နယ်မှာ ပျက်ကျခဲ့တာဖြစ်ပြီး လေယာဉ်ပေါ်လိုက်ပါသွားသူ ၅ ဦးစလုံး သေဆုံးခဲ့ပါတယ်။ တာလီဘန်အဖွဲ့က လေယာဉ်ပေါ်မှာ အမေရိကန်စစ်တပ်က အဆင့်မြင့်အရာရှိတွေ လိုက်ပါလာပြီး မိမိတို့က ပစ်ချလိုက်တာ ဖြစ်တယ်လို့ ထုတ်ပြန်ခဲ့ပါတယ်။

အမေရိကန်စစ်တပ်ရဲ့ ပြောရေးဆိုခွင့်ရှိသူ ဗိုလ်မှူးကြီး ဆန်နီ လက်ဂျက်က လေယာဉ်ပျက်ကျတာကို အတည်ပြုခဲ့ပေမယ့် ရန်သူက ပစ်ချလို့ ပျက်ကျတဲ့လက္ခဏာမျိုး မတွေ့ရဘူးလို့ ထုတ်ပြန်ခဲ့ပါတယ်။ ပျက်ကျရတဲ့ အကြောင်းအရင်းကို စုံစမ်းစစ်ဆေးနေတယ်လို့လည်း သူက ဆိုပါတယ်။

၁၈ နှစ်တာ ကြာမြင့်နေပြီဖြစ်တဲ့ စစ်ပွဲကို အဆုံးသတ်ရေး အမေရိကန်နဲ့ တာလီဘန်တို့ဟာ ပြီးခဲ့တဲ့လအနည်းက ဆွေးနွေးမှုတွေ ထပ်မံပြုလုပ်ခဲ့ပေမယ့် စက်တင်ဘာနဲ့ ဒီဇင်ဘာလ‌တွေမှာ အာဖဂန်က အမေရိကန်စစ်ဖက်ပစ်မှတ်တွေကို တာလီဘန်က တိုက်ခိုက်မှုကြောင့် အနည်းဆုံး ၂ ကြိမ်လောက် ဆွေးနွေးမှု ပျက်ပြယ်ခဲ့ပါတယ်။ တာလီဘန်ဟာ အမေရိကန်ပစ်မှတ်တွေကို ပြီးခဲ့တဲ့လအနည်းငယ်အတွင်း တိုးမြှင့်တိုက်ခိုက်လာပါတယ်။

Ref: Aljazeera