ဘိလပ်မြေစက်ရုံ၏ ဆိုးကျိုးကို အစိုးရက ဖြေရှင်းပေးမည်ဟု ကရင်ပြည်သူများ မျှော်လင့်နေ

ဇန်နဝါရီ ၂၈၊ ၂၀၂၀
M-Media

-ကရင်ပြည်နယ် ဘားအံမြို့နယ်က ရွာတစ်ချို့မှာ ဘိလပ်မြေစက်ရုံက စွန့်ပစ်ပစ္စည်းတွေကြောင့် ရွာသားတွေရဲ့ လူနေမှုဘ၀ကို သိသိသာသာ ထိခိုက်မှုတွေ ရှိလာပြီး ဒါတွေကို အစိုးရက ဖြေရှင်းပေးဖို့ ဆန္ဒပြမှုတွေလည်း လုပ်ဆောင်ခဲ့ကြပါတယ်။

နတ်ကုန်းရွာမှာ ရွာသားတွေ၊ ကျောင်းသားတွေနဲ့ တက်ကြွလှုပ်ရှားသူတွေ မကြာသေးခင်က စုဝေးကာ စစ်တပ်က လုပ်ကိုင်နေတဲ့ ကျောက်မီးသွေးဓာတ်အားသုံး မြိုင်ကလေး ဘိလပ်မြေစက်ရုံ ပိတ်ပစ်ဖို့ တောင်းဆိုခဲ့ကြပါတယ်။ အဲဒီစက်ရုံသက်တမ်းဟာ နှစ်ပေါင်း ၃၀ လောက်ရှိနေပြီး လက်ရှိ တစ်နေ့ကို ဘိလပ်မြေ တန် ၄၀၀၀ လောက် ထုတ်လုပ်နေပါတယ်။

စက်ရုံကထွက်တဲ့ စွန့်ပစ်ပစ္စည်းတွေကြောင့် သဘာ၀ပတ်ဝန်းကျင်နဲ့ အသက်မွေးဝမ်းကြောင်းလုပ်ငန်းတွေကို ထိခိုက်လာတယ်လို့ ရွသားတွေက ဆိုပါတယ်။

အဓိကစိုးရိမ်စရာက စက်ရုံပတ်ဝန်းကျင်တစ်၀ိုက်မှာ ရေချိုရှားပါးလာတာဖြစ်ပါတယ်။ စက်ရုံတစ်၀ိုက်က ရွာပေါင်း ၂၇ ရွာမှာ တစ်ချို့ရေတွင်းက ရေတွေဟာ အနက်ရောင်ပြောင်းသွားပြီး၊ တစ်ချို့ရေတွင်းမှာ ရေက ကြည်ပေမယ့် ရွာသားတွေက မသောက်ရဲတော့ပါဘူး။

သောက်ရေအတွက် နတ်ကုန်းရွာသားတွေဟာ အရင်က အပြင် အကူအညီပေးရေးအဖွဲ့တွေရဲ့ ထောက်ပံ့မှုကို မှီခိုနေရတာပါ။ ဒါပေမယ့် ပြီးခဲ့တဲ့လအနည်းငယ်စလို့ ထောက်ပံ့မှုတွေ မရှိတော့တဲ့အတွက် သောက်ရေဝယ်သောက်ရတာ၊ ညစ်ညမ်းနေတဲ့ရေကို ကျောက်ချဉ်ထည့်ပြီး သောက်ရတာတွေ ဖြစ်လာပါတယ်။

ပူပြင်းခြောက်သွေ့တဲ့ နွေရာသီကို ရောက်ရှိလာတာကြောင့် ဒီအခြေအနေ ပိုမိုဆိုးရွားလာမှာကို ရွာသားတွေက စိုးရိမ်နေကြပါတယ်။

စစ်တပ်ကပိုင်တဲ့ မြိုင်ကလေး ဘိလပ်မြေစက်ရုံကို ၁၉၈၀ ပြည့်နှစ်တွေက စတင်လည်ပတ်ခဲ့ပြီး အရင်က စွမ်းအင်အတွက် သဘာ၀ဓာတ်ငွေ့ကို အသုံးပြုခဲ့ပေမယ့် ၂၀၁၈ ခုနှစ်ကစလို့ ကျောက်မီးသွေးကို ပြောင်းလဲအသုံးပြုခဲ့ကာ အဲဒီနောက်ပိုင်း ဒီလိုအခြေအနေတွေ ကြုံတွေ့ခဲ့ရတာ ဖြစ်ပါတယ်။ ဒေသခံတွေကတော့ ကျောက်မီးသွေးအသုံးမပြုရေး ကန့်ကွက်ခဲ့ပေမယ့် အာဏာပိုင်တွေက လစ်လျူရှုခဲ့တယ်လို့ ပြောကြားခဲ့ပါတယ်။

ကရင် သဘာ၀ပတ်ဝန်းကျင်နှင့် လူမှုလှုပ်ရှားမှုကွန်ယက် (KESAN) ရဲ့ တာဝန်ရှိသူ ကိုစောသာဖိုးက အစိုးရဟာ ပြည်သူလူထုထံကနေ အကြံပြုချက်မယူဘဲ ဆောင်ရွက်ခဲ့တာဖြစ်တယ်လို့ ပြောကြားခဲ့ပါတယ်။

စက်ရုံကစွန့်ပစ်ပစ္စည်းတွေကြောင့် မြစ်ချောင်းအင်းအိုင်ကငါးတွေ သေဆုံးမှုလည်း ဖြစ်ပေါ်နေပါတယ်။

အစိုးရတာဝန်ရှိသူတွေနဲ့ ကျွမ်းကျင်သူတွေက စက်ရုံတစ်၀ိုက်မှာရှိတဲ့ ရေအရင်းအမြစ်တွေဟာ သောက်သုံးဖို့အတွက် အန္တရာယ်မရှိဘူးလို့ ပြောကြားခဲ့ပါတယ်။

သဘာ၀ပတ်ဝန်းကျင်ဆိုင်ရာ ဓာတ်ခွဲစမ်းသပ်မှုတွေ လုပ်ဆောင်နေတဲ့ ပြည်တွင်းအဖွဲ့ Advancing Life and Regenerating Motherland က ရေအရောင်းပြောင်းမှု၊ ငါးတွေသေဆုံးမှု ဖြစ်နေတဲ့ ရွာ ၅ ရွာက ရေနမူနာ ၁၀ ခုကို စမ်းသပ်ခဲ့ပါတယ်။ ရေဟာ PH တန်ဖိုး ကျဆင်းနေပေမယ့် ကမ္ဘာ့ကျန်းမာရေးအဖွဲ့ WHO က သတ်မှတ်ထားတဲ့ သောက်သုံးရေစံနှုန်းနဲ့ ကိုက်ညီနေတယ်ဆိုတာတွေ့ရကြောင်း ဒီအဖွဲ့က ထုတ်ပြန်ခဲ့ပါတယ်။

ငါးတွေသေဆုံးတာက ကလိုရင်းနဲ့ ဖော့စဖိတ်တွေ များပြားနေတာကြောင့် ဖြစ်တယ်လို့ ဆိုပါတယ်။

ကိုစောသာဖိုးက ဒေသခံတွေရဲ့ စိုးရိမ်မှုကို ပပျောက်စေဖို့အတွက် နိုင်ငံတကာပညာရှင်တွေကို ဖိတ်ခေါ်ပြီး စမ်းသပ်ခိုင်းဖို့ လိုအပ်တယ်လို့ ပြောကြားခဲ့ပါတယ်။ ရွာသားတွေကို သောက်ရေလှူတာ၊ ရေတွင်းအသစ်တွေတူးတာဟာ ရေတိုဖြေရှင်းမှုဖြစ်ပြီး၊ ရေရှည်ဖြေရှင်းမှုလိုအပ်တယ်လို့ သူက ဆိုပါတယ်။

“ကျွန်တော်တို့ရဲ့စိုးရိမ်မှုတွေ ဖြေဖျောက်ရေး အစိုးရ ကူညီလိမ့်မယ်လို့ ကျွန်တော်တို့ မျှော်လင့်ပါတယ်”

Ref: mmtimes