ပါကစ္စတန်ကို ၁၀ ရက်အတွင်း ချေမှုန်းနိုင်သည်ဟု အိန္ဒိယဝန်ကြီးချုပ်ပြော

ဇန်နဝါရီ ၃၀၊ ၂၀၂၀
M-Media

-ပါကစ္စတန်ကို ၁၀ ရက်အတွင်း ခေျမှုန်းနိုင်တဲ့စွမ်းအားမျိုး အိန္ဒိယမှာ ရှိနေပြီလို့ အိန္ဒိယဝန်ကြီးချုပ် နရန်ဒရာမိုဒီက ပြောကြားလိုက်ပါတယ်။

အိန္ဒိယနဲ့ ပါကစ္စတန်တို့ဟာ ဗြိတိသျှထံကနေ လွတ်လပ်ရေးရခဲ့တဲ့ ၁၉၄၇ ခုနှစ်ကစလို့ စစ်ပွဲ ၃ ကြိမ်တိုင်တိုင် ဖြစ်ပွားခဲ့ပြီး ပြီးခဲ့တဲ့နှစ် ဖေဖော်ဝါရီလက အပြန်အလှန် လေကြောင်းတိုက်ပွဲနဲ့စတုတ္ထမြောက်စစ်ပွဲ ဖြစ်ပွားလုအထိ ဖြစ်ခဲ့ပါတယ်။

“ပါကစ္စတန်ဟာ ၃ ကြိမ်တိုင်တိုင်ရှုံးခဲ့တယ်။ ကျွန်တော်တို့စစ်တပ်ဟာ ပါကစ္စတန်ကို ချေမှုန်းဖို့ ၇ ရက်ကနေ ၁၀ ရက်ထက် ပိုမကြာပါဘူး” လို့ ဇန်နဝါရီ ၂၈ ရက်နေ့က စစ်ဖက်အရာရှိတွေကိုပြောကြားတဲ့ မိန့်ခွန်းမှာ ဝန်ကြီးချုပ်မိုဒီက ထည့်သွင်းပြောဆိုခဲ့ပါတယ်။

နိုင်ငံသားဥပဒေကို အငြင်းပွားဖွယ်ပြင်ဆင်ချက်နဲ့ပတ်သက်ပြီး ပြည်သူတွေရဲ့ ဆန္ဒပြမှု၊ စီးပွားရေးကျဆင်းမှု၊ လာမယ့်လနယူးဒေလီမှာလုပ်မယ့် ပြည်နယ်ရွေးကောက်ပွဲမှာ ရှုံ့းနိမ့်နိုင်တယ်ဆိုတဲ့ ခန့်မှန်းမှုတွေကြောင့် မိုဒီဦးဆောင်တဲ့ အိန္ဒိယအစိုးရဟာ ဖိအားတွေနဲ့ ရင်ဆိုင်နေရတာပါ။

အိန္ဒိယရဲ့ ပြောင်မြောက်တဲ့စွမ်းရည်နဲ့ ကျွမ်းကျင်လိမ္မာမှုတွေဟာ သစ်လွင်တဲ့အတွေးအခေါ်တွေကလာပြီး ၂၀၁၆ ခုနှစ်နဲ့ ပြီးခဲ့တဲ့နှစ်က ပါကစ္စတန်နိုင်ငံထဲအထိဝင်ပြီး စစ်သွေးကြွတွေကို ကြိုတင်လက်ဦးမှု ရယူတိုက်ခိုက်တာဟာ ဒီအတွက် အထောက်အထား ဖြစ်တယ်လို့လည်း မိုဒီက ထည့်သွင်းပြောဆိုခဲ့ပါတယ်။

ပြီးခဲ့တဲ့နှစ် ဖေဖော်ဝါရီလက ကက်ရှ်မီးယားမှာ ပါကစ္စတန်နဲ့ဖြစ်ပွားခဲ့တဲ့ လေကြောင်းတိုက်ခိုက်မှုအတွင်း အိန္ဒိယတိုက်လေယာဉ်တစ်စီး ပစ်ချခံလိုက်ရပြီး လေယာဉ်မှူးလည်း ဖမ်းဆီးခံခဲ့ရပါတယ်။ ပါကစ္စတန်က နောက်ပိုင်းမှာ လေယာဉ်မှူးကို ပြန်လွှတ်ပေးခဲ့ပါတယ်။

ပြိုင်ဘက် ၂ နိုင်ငံဟာ ၁၉၄၇၊ ၁၉၆၅နဲ့ ၁၉၇၁ ခုနှစ်တွေမှာ ၃ ကြိမ်တိုင်တိုင် စစ်ဖြစ်ခဲ့ဖူးပါတယ်။ မိုဒီက ပါကစ္စတန်ဟာ အိန္ဒိယထိန်းချုပ်ထားတဲ့ ကက်ရှ်မီးယားဒေသက စစ်သွေးကြွကို ပံ့ပိုးကူညီကာ တစ်ဆင့်ခံစစ်ပွဲ ဖော်ဆောင်နေတယ်လို့ ထည့်သွင်းပြောဆိုခဲ့ပါတယ်။

Ref: CNA