ဘင်္ဂလားဒေ့ရှ်ရောက် ရိုဟင်ဂျာဒုက္ခသည်ကလေးများကို မြန်မာသင်ရိုးဖြင့် စာသင်မည်

ဇန်နဝါရီ ၃၀၊ ၂၀၂၀
M-Media

-ဘင်္ဂလားဒေ့ရှ်ဖက်ကို ရောက်ရှိနေတဲ့ မြန်မာနိုင်ငံက ရိုဟင်ဂျာဒုက္ခသည်ကလေးငယ်တွေရဲ့ ပညာရေးကို ချဲ့ထွင်ပြီး မြန်မာသင်ရိုးညွှန်းတန်းနဲ့ ပုံမှန် အတတန်းပညာသင်ကြားရေး ကုလနဲ့ ဘင်္ဂလားဒေ့ရှ်အာဏာပိုင်တွေ ပူးပေါင်းဆောင်ရွက်တော့မယ်လို့ သိရပါတယ်။

ကော့ဆက်ဘဇားက ဒုက္ခသည်စခန်းတွေမှာ နေထိုင်နေရတဲ့ ရိုဟင်ဂျာ ဒုက္ခသည်ကလေးငယ်တွေဟာ လက်ရှိမှာ ကုလ ဒုက္ခသည်အေဂျင်စီ UNICEF က ဖွင့်လှစ်ထားတဲ့ စာသင်ကျောင်း ၁၅၀၀ လောက်မှာ အခြေခံပညာရေးကို သင်ယူနေရတာ ဖြစ်ပါတယ်။

ဧပြီလမှာစတင်မယ့် အစီအစဉ်အသစ်အရ ကလေးတွေဟာ ၅ တန်းကနေ ၈ တန်းအထိ မြန်မာနိုင်ငံက သင်ရိုးညွှန်းတမ်းနဲ့ သင်ကြားရတော့မယ်လို့ ကုလကထုတ်ပြန်တဲ့ကြေငြာချက်မှာ ဖော်ပြထားပါတယ်။

ဘင်္ဂလားဒေ့ရှ်က ကုလဒုက္ခသည် ကယ်ဆယ်ရေးနဲ့ ပြန်လည်နေရာချထားရေး ကော်မရှင်နာမင်းကြီး မဟ်ဘူးဘ် အလမ် တာလွက်ဒါက ရိုဟင်ဂျာကလေးငယ်တွေကို မြန်မာပညာရေးစနစ် သင်ပေးဖို့အတွက် ကုလရဲ့ အဆိုပြုချက်ကို ဘင်္ဂလားဒေ့ရှ်အစိုးရက လက်ခံခဲ့တယ်လို့ ပြောကြားခဲ့ပါတယ်။

“မြန်မာဘာသာစကားနဲ့ သင်ပေးမယ်။ မြန်မာနိုင်ငံက သင်ရိုးညွှန်းတမ်းအတိုင်း သွားမယ်။ ဘင်္ဂလားဒေ့ရှ် အစိုးရကျောင်းတွေမှာ ပညာသင်ကြားခွင့် သူတို့ ရမှာမဟုတ်သလို၊ ဘင်္ဂါလီစာကိုလည်း သူတို့ မဖတ်တတ်ပါဘူး။ သူတို့ ဘင်္ဂလားဒေ့ရှ်မှာ ရေရှည်နေရမယ့်အနေအထားမျိုး မရှိတဲ့အတွက် ပြည်တော်ပြန်တဲ့အခါ မြန်မာလူ့အဖွဲ့အစည်းနဲ့ အသားကျရေး အခုဆောင်ရွက်မှုက အထောက်အကူဖြစ်စေမှာ ဖြစ်ပါတယ်”

မြန်မာသင်ရိုးညွှန်းတမ်းနဲ့ သင်ကြားမယ့် ရှေ့ပြေးအစီအစဉ်မှာ ရိုဟင်ဂျာကလေးငယ် တစ်သောင်းလောက် ပါဝင်မယ်လို့ ကုလက ပြောကြားခဲ့ပါတယ်။ ဒီအစီအစဉ်အတွက် ဆရာ၊ ဆရာမတွေကို လေ့ကျင့်သင်တန်းပေးမှုကိုလည်း ကုလက စတင်နေပါတယ်။

ဘင်္ဂလားဒေ့ရှ်က ရိုဟင်ဂျာဒုက္ခသည်စခန်းတွေမှာ ကလေးငယ် ၄ သိန်းလောက်ရှိပြီး သူတို့ ပုံမှန်ပညာရေးရရှိဖို့အတွက် လူ့အခွင့်အရေးအဖွဲ့တွေက ဘင်္ဂလာဒေ့ရှ်အစိုးရကို အရင်ကတည်းက တောင်းဆိုခဲ့ကြတာ ဖြစ်ပါတယ်။

Ref: The Diplomat