သေဆုံးမှု၊ ကူးစက်မှုအရေအတွက် မြင့်တက်လာတဲ့ ဝူဟန်ဗိုင်းရပ်စ် (နောက်ဆုံးရသတင်းများ)

ဖေဖော်ဝါရီ ၁၊ ၂၀၂၀ (နေ့လည် ၃ နာရီ)
M-Medi‌‌a

– ကိုရိုနာဗိုင်းရပ်စ်သစ်ကြောင့် သေဆုံးသူအရေအတွက်ဟာ အနည်းဆုံး ၂၅၉ ဦးအထိ ရှိလာခဲ့ပြီး ကူးစက်သူကလည်း ၁၁၇၉၁ ဦးအထိ ရှိလာပြီလို့ တရုတ်အာဏာပိုင်တွေက ဒီကနေ့မှာ သတင်းထုတ်ပြန်ပါတယ်။ အများစုဟာ ဗိုင်းရပ်စ်စတင်ပြန့်နှံရာ ဟူဘေးပြည်နယ် ဝူဟန်မြို့မှာ ဖြစ်ပါတယ်။ ကူးစက်သံသယရှိသူဟာ ၁၇၈၈၈ ဦးရှိနေပြီး ဆေးရုံကဆင်းသွားသူ အရေအတွက်က ၂၄၃ ဦး ရှိပါတယ်။

– နိုင်ငံရပ်ခြားပြန့်နှံ့မှုကတော့ စပိန်နဲ့ ယူကအေပါအဝင် နိုင်ငံပေါင်း ၂၀ ကျော် ရှိလာပြီဖြစ်ပါတယ်။ ထိုင်းနဲ့ အင်ဒိုနီးရှားအပါအဝင် ကမ္ဘာတစ်ဝှမ်းကို ပြန့်နှံ့ရောက်ရှိနေတဲ့ ဝူဟန်မြို့သူမြို့သားတွေကို တရုတ်က သီးသန့်လေယာဉ်တွေနဲ့ ပြန်လည်ခေါ်ဆောင်နေပါတယ်။ ကမ္ဘာ့နိုင်ငံတွေကလည်း ဝူဟန်မြို့ကို ရောက်ရှိနေတဲ့ သူတို့နိုင်ငံသားတွေကို ပြန်လည်ခေါ်ယူနေကြပါတယ်။ နိုင်ငံတကာလေကြောင်းလိုင်းတွေကလည်း တရုတ်နိုင်ငံ အထူးသဖြင့် ဝူဟန်မြို့ကို ပျံသန်းမှုတွေ ရပ်ဆိုင်းခဲ့ပါတယ်။

– နိုင်ငံသားတွေကနေလွဲပြီး တရုတ်ပြည်ကလာရောက်တဲ့သူတွေကို ဩစတေးလျက ပြည်ဝင်ခွင့်ပိတ်လိုက်သလို၊ အမေရိကန်ကလည်း တရုတ်နိုင်ငံသားတွေအပြင် ပြီးခဲ့တဲ့ ၂ ပတ်အတွင်း တရုတ်နိုင်ငံကိုသွားရောက်တဲ့ နိုင်ငံခြားသားအားလုံးကို မနေ့က ပြည်ဝင်ခွင့် ပိတ်ပင်လိုက်ပါတယ်။ အမေရိကန်ရဲ့ ဒီပိတ်ပင်မှုဟာ ကမ္ဘာ့ကျန်းမာရေးအဖွဲ့ WHO ရဲ့ အကြံပြုချက်နဲ့ ဆန့်ကျင်နေတယ်လို့ ဝေဖန်ခဲ့ပါတယ်။

– အလီဘာဘာကုမ္ပဏီပိုင်ရှင် တရုတ်သန်းကြွယ်သူဌေး ဂျက်မာက ကိုရိုနာဗိုင်းရပ်စ်သစ် တိုက်ဖျက်ရေးမှာ အသုံးပြုဖို့ ယွမ် သန်း ၁၀၀ (ကန်ဒေါ်လာ ၁၄.၄ သန်း) ကို မနေ့မှာ လှူဒါန်းခဲ့ပါတယ်။ အလီဘာဘာကုမ္ပဏီကလည်း လိုအပ်တဲ့ ဆေးဘက်ဆိုင်ရာ ကိရိယာတွေ ဝယ်ယူဖို့အတွက် ၁ ဘီလီယံယွမ် (ဒေါ်လာ ၁၄၄ သန်း) လှူဒါန်းခဲ့သလို၊ ဆေးဝါးနဲ့ ကုသရေးလုပ်ငန်းအတွက် သူတို့ရဲ့ ဉာဏ်ရည်တုနည်းပညာ AI ကို အခမဲ့အသုံးပြုနိုင်တယ်လို့လည်း ကမ်းလှမ်းခဲ့ပါတယ်။

– ရောဂါကူးစက်ပြန့်နှံ့မှု ထိန်းသိမ်းကာကွယ်ရေးမှာ အသုံးပြုဖို့အတွက် ဂျာမနီဟာ ဆေးဘက်ဆိုင်ရာပစ္စည်း ၅ တန်ကို ပို့ဆောင်ခဲ့ပြီး ဝူဟန်မြို့ကို စနေနေ့မနက်ပိုင်းမှာ ရောက်ရှိလာပါတယ်။ မလေးရှားက ဆေးဘက်ဆိုင်ရာသုံး လက်အိတ် စုစုပေါင်း ၁၈ သန်းကို တရုတ်နိုင်ငံထံ ပေးပို့လှူဒါန်းသွားမယ်လို့ သောကြာနေ့မှာ ကြေငြာခဲ့ပါတယ်။

Ref: CNN, Aljazeera, The Star