အမေရိကန်၏ ပြည်ဝင်ခွင့်ဗီဇာ ပိတ်ပင်မှုစာရင်းတွင် မြန်မာပါဝင်လာ

ဖေဖော်ဝါရီ ၁၊ ၂၀၂၀
M-Media

-မွတ်စလင်တွေကို ပိတ်ပင်မှုလို့ ဝေဖန်သူတွေကဆိုတဲ့ ပြည်ဝင်ခွင့်ကန့်သတ်မှုအစီအစဉ်ကို အမေရိကန်သမ္မတ ဒေါ်နယ်ထရမ့်က ထပ်မံတိုးချဲ့လိုက်ပြီး နောက်ထပ် ၆ နိုင်ငံကို စာရင်းထဲ ထပ်မံထည့်သွင်းလိုက်ကာ၊ လူ့အခွင့်အရေး တက်ကြွလှုပ်ရှားသူတွေက ဒီဆောင်ရွက်မှုကို ဝေဖန်ခဲ့ကြပါတယ်။

ထရမ့်ဟာ သူအာဏာစရတဲ့ လွန်ခဲ့တဲ့ ၃ နှစ်ကတည်းက ဒီပြည်ဝင်ခွင့်ပိတ်တဲ့အစီအစဉ်ကို စတင်ခဲ့တာဖြစ်ပြီး အထူးသဖြင့် မွတ်စလင်အများစုရှိရာနိုင်ငံတွေကို ပိတ်ပင်တာဖြစ်ပါတယ်။ ပိတ်ပင်မှုကြောင့် ဝေဖန်မှုတွေ၊ ဆန္ဒပြမှုတွေ ဖြစ်ပေါ်ခဲ့သလို၊ အမေရိကန်တရားရုံးတွေကလည်း ထရမ့်ရဲ့ ဒီအစီအစဉ်ကို ကန့်သတ်တာတွေ လုပ်ဆောင်ခဲ့ပါတယ်။

ပြည်ဝင်ခွင့် ပိတ်ပင်ခံရတဲ့စာရင်းမှာ အရင်က ယီမင်၊ ဆီးရီးယား၊ အီရန်၊ လစ်ဗျားနဲ့ ဆိုမာလီယာတို့ ပါဝင်ပြီး၊ ဗင်နီဇွဲလားနဲ့ မြောက်ကိုရီးယား နိုင်ငံသားတွေ ပြည်ဝင်ခွင့်လျှောက်ထားမှုကိုလည်း ကန့်သတ်တာတွေ လုပ်ဆောင်ခဲ့ပါတယ်။

အီရစ်ထရီယာ၊ ကာဂျစ်စတန်၊ မြန်မာ၊ နိုက်ဂျီးရီးယား၊ ဆူဒန်နဲ့ တန်ဇန်းနီးယားကို ပြည်ဝင်ခွင့် ကန့်သတ်ပိတ်ပင်တဲ့ စာရင်းထဲကို အမေရိကန်ကထည့်သွင်းခဲ့ပြီး ဒါဟာ လုံခြုံရေးနဲ့ သတင်းအချက်အလက် မျှဝေရေး အမေရိကန်ကထုတ်ပြန်ထားတဲ့ စံချိန်စံညွှန်းတွေနဲ့ မညီလို့ဖြစ်တယ်လို့ ကန်အာဏာပိုင်တွေက ပြောကြားခဲ့ပါတယ်။ ပိတ်ဆို့မှုအသစ်ဟာ ဖေဖော်ဝါရီ ၂၁ ရက်နေ့ကစလို့ အကြုံးဝင်မှာ ဖြစ်ပါတယ်။

အီရစ်ထရီယာ၊ ကာဂျစ်စတန်၊ မြန်မာနဲ့ နိုင်ဂျီးရီးယားနိုင်ငံတွေကို အမြဲတမ်းနေထိုင်ခွင့် (PR) ရနိုင်တဲ့ ဗီဇာထုတ်ပေးတာမျိုး ရပ်ဆိုင်းမှာဖြစ်ပေမယ့် ပြောင်းရွှေ့အခြေချမှုနဲ့မဆိုင်တဲ့ ဗီဇာတွေကို ဆက်လက်ထုတ်ပေးသွားမယ်လို့ အမေရိကန် အမိမြေလုံခြုံရေးအကြီးအကဲ ချဒ်ဝုလ်ဖ်က ပြော‌ကြားခဲ့ပါတယ်။

ဆူဒန်နဲ့ တန်ဇန်းနီးယားနိုင်ငံသားတွေအတွက် DV ဗီဇာထုတ်ပေးမှုကို ကန့်သတ်သွားမှာ ဖြစ်ပါတယ်။ အမေရိကန်မှာ အခြေချခွင့်ရရှိမယ့် DV ဗီဇာကို နှစ်စဉ် ကမ္ဘာတစ်ဝှမ်းက လူပေါင်း ၅၅၀၀၀ လောက်ကို မဲနှိုက်ရွေးချယ်ပေးတာပါ။

ယီမင်၊ ဆီးရီးယား၊ အီရန်၊ လစ်ဗျားနဲ့ ဆိုမာလီယာ နိုင်ငံတွေအပေါ် ဗီဇာထုတ်ပေးမှုအားလုံး ရပ်ဆိုင်းထားမှုကို အရင်အတိုင်း ဆက်လက်ထားရှိမှာ ဖြစ်ပါတယ်။

Ref: Aljazeera