ပါလက်စတိုင်းအရေး ထရမ့်၏အဆိုပြုချက်ကို OIC က အရေးပေါ် ဆွေးနွေးမည်

ဖေဖော်ဝါရီ ၃၊ ၂၀၂၀
M-Media

-ပါလက်စတိုင်း-အစ္စရေး ပဋိပက္ခဖြေရှင်းရေးနဲ့ပတ်သက်ပြီး ထရမ့်ရဲ့ အဆိုပြုချက်ကို ဆွေးနွေးဖို့အတွက် အစ္စလာမ့်မစ်ပူးပေါင်းဆောင်ရွက်ရေးအဖွဲ့ (OIC) က ဒီကနေ့မှာ အရေးပေါ်အစည်းအဝေးတစ်ရပ် ကျင်းပဖို့ ရှိနေပါတယ်။

ပါလက်စတိုင်းရဲ့ တောင်းဆိုမှုနဲ့ ဆော်ဒီအာရေဗျနိုင်ငံ မြို့တော်ဂျစ်ဒါမှာပြုလုပ်မယ့် ဒီအစည်းအဝေးဟာ ၂ ရက်တာ ကြာငြမ့်မှာ ဖြစ်ပါတယ်။

အမေရိကန်သမ္မတ ဒေါ်နယ်ထရမ့်က သူရဲ့အစီအစဉ်ဟာ အချိန်အလွန်ကြာနေတဲ့ ပဋိပက္ခကို ဖြေရှင်းနိုင်မှာဖြစ်ပြီး ပါလက်စတိုင်းနဲ့ အစ္စရေး နှစ်ဖက်စလုံးအတွက် အကျိုးရှိမယ့်အစီအစဉ် ဖြစ်တယ်လို့ ပြောကြားခဲ့ပါတယ်။ ထရမ့်က ဒါဟာ ‘ရာစုနှစ်ရဲ့ သဘောတူညီချက်’ (Deal of the Century) လို့ လည်း သမုတ်ခဲ့ပါတယ်။

အာရပ်နိုင်ငံတွေကို စုပေါင်းထားတဲ့ အာရပ်လိဂ်က ထရမ့်ရဲ့ ဒီအဆိုပြုချက်ဟာ ပါလက်စတိုင်းတွေရဲ့ အနိမ့်ဆုံး ရပိုင်ခွင့်၊ တောင်းဆိုမှုတွေနဲ့ မကိုက်ညီတဲ့အတွက် လက်မခံဘူးလို့ ထုတ်ပြန်ခဲ့ပါတယ်။

အမေရိကန်ရဲ့အစီအစဉ်မှာ လွတ်လပ်တဲ့ ပါလက်စတိုင်းနိုင်ငံဖြစ်တည်ရေး ပါဝင်ပေမယ့် ပါလက်စတိုင်းရဲ့ နယ်နမိတ်ကို သတ်မှတ်ထားရာမှာ ၁၉၄၇ ခုနှစ် ကုလက သတ်မှတ်ပေးထားတဲ့ နယ်နမိတ်အတိုင်းမဟုတ်ပါဘူး။ ပါလက်စတိုင်း ပိုင်နက်တွေမှာ နိုင်ငံတကာဥဒေကို ဖောက်ဖျက်ကာ အစ္စရေးက ကျူးကျော်တည်ဆောက်ထားတဲ့ တရားမဝင်အိမ်ယာတွေကိုလည်း အသိအမှတ်ပြုထားပါတယ်။

ဂျေရုစလင်ဟာ အစ္စရေးရဲ့ ခွဲခြမ်းလို့မရတဲ့မြို့တော်ဖြစ်တယ်လို့ ‌အမေရိကန်ရဲ့ ဒီအဆိုပြုချက်မှာ ဖော်ပြထားသလို၊ ပါလက်စတိုင်းကိုတော့ ဂျေရုစလင်ဆင်ခြေဖုံးက အဘူဒစ်မြို့ကို မြို့တော်အဖြစ်သတ်မှတ်ဖို့ အဆိုပြုထားပါတယ်။ ပါလက်စတိုင်းဟာ အရှေ့ဂျေရုစလင်ကို မြို့တော်အဖြစ်ထားကာ လွတ်လပ်တဲ့နိုင်ငံတစ်ခု တည်ဆောက်ချင်နေတာ ဖြစ်ပါတယ်။

ပါလက်စတိုင်းခေါင်းဆောင်ပိုင်းက ဒီအစီအစဉ်ကို ပယ်ချခဲ့ပြီး၊ ဥရောပကနေ တရားမဝင်ဝင်ရောက်လာတဲ့ ဂျူးတွေက ပါလက်စတိုင်းပိုင်နက်တွေကို တိုက်ခိုက်သိမ်းပိုက်ကာ အစ္စရေးနိုင်ငံတည်ထောင်နိုင်ခဲ့တဲ့ ‘ဘဲလ်ဖိုးကြေငြာချက်’ လို့ အစီအစဉ်မျိုးသာဖြစ်တယ်လို့ ပြောကြားခဲ့ပါတယ်။

‌OIC က နိုင်ငံခြားရေးဝန်ကြီအဆင့် ပြုလုပ်မယ့် ဒီအရေးပေါ်အစည်းအဝေးမှာ ထရမ့်အစိုးရရဲ့ အစီအစဉ်နဲ့ပတ်သက်ပြီး မိမိတို့အဖွဲ့ရဲ့ ရပ်တည်ချက်ကို ဆွေးနွေးသွားမယ်လို့ ‌Twitter စာမျက်နှာမှာ ရေးသားထုတ်ပြန်ခဲ့ပါတယ်။

အီရန်က ဒီအစည်းအဝေးကို မိမိတို့မတက်ရောက်နိုင်အောင် ဆော်ဒီအာရေဗျက တားမြစ်ခဲ့တယ်လို့စွပ်စွဲခဲ့ပြီး အိမ်ရှင်ဆိုတဲ့ အခြေအနေကို တစ်လွဲအသုံးချနေတယ်လို့ OIC အဖွဲ့ထံ တိုင်ကြားခဲ့ပါတယ်။

Ref: Aljazeera