ဆိုမာလီယာနိုင်ငံတွင် ကျိုင်းကောင်အရေးပေါ်အခြေအနေ ကြေငြာ

ဖေဖော်ဝါရီ ၃၊ ၂၀၂၀
M-Media

-ကျိုင်းကောင်အုပ်တွေက ကောက်ပဲသီးနှံတွေကို ဖျက်ဆီးမှု မြင့်တက်လာတာကြောင့် ဆိုမာလီယာနိုင်ငံမှာ အရေးပေါ်အခြေအနေ ကြေငြာလိုက်ပါတယ်။

ဆိုမာလီကျန်းမာရေးဝန်ကြီးဌာနက ကျိုင်းကောင်တွေရဲ့ ကောက်ပဲသီးနှံ ဖျက်ဆီးမှုဟာ နိုင်ငံရဲ့ စားနပ်ရိက္ခာဖူလှုံမှု ဆိုးရွားနေတဲ့အခြေအနေအပေါ် နောက်ထပ်ခြိမ်းခြောက်မှုတစ်ခု ဖြစ်တယ်လို့‌ ထုတ်ပြန်ခဲ့ပါတယ်။ နိုင်ငံရဲ့ လုံခြုံရေး မတည်ငြိမ်မှုကြောင့် လယ်ယာတွေကို လေယာဉ်နဲ့ ပိုးသတ်ဆေးဖျန်းဖို့ မဖြစ်နိုင် ဖြစ်နေတာပါ။

အခုလို အရေးပေါ်အခြေအနေကြေငြာကာ ကျိုင်းကောင်နှိမ်နှင်းဖို့ ကြိုးစားပေမယ့် ကောက်ပဲသီးနှံရိပ်သိမ်းတဲ့ရာသီ စတင်တဲ့ ဧပြီလလောက်မှ အခြေအနေက ပိုမိုကောင်းမွန်မယ့်အနေအထားရှိနေပါတယ်။

ဆိုမာလီနဲ့ အီသီယိုးပီးယားတို့လို့ အာဖရိကအရှေ့ခြမ်းနိုင်ငံတွေမှာ ကျိုင်းကောင်တွေက ကောက်ပဲသီးနှံဖျက်ဆီးမှုဟာ အခုနှစ်မှာ ပိုမိုဆိုးဝါးလာပြီး ကင်ညာနိုင်ငံမှာဆိုရင် နှစ်ပေါင်း ၇၀ အတွင်း အဆိုးဝါးဆုံးအနေအထားနဲ့ ရင်ဆိုင်နေရပါတယ်။ အရေးပေါ်အခြေအနေ ကြေငြာထားတာကတော့ ဆိုမာလီယာတစ်နိုင်ငံတည်းသာ ရှိပါတယ်။

ကုလရဲ့ စားနပ်ရိက္ခာနှင့် လယ်ယာစိုက်ပျိုးရေးအဖွဲ့ (FAO) က အာဖရိကဦးချိုဒေသမှာ ကျိုင်းကောင်ပြဿနာ ဖြေရှင်းရေး ကူညီပေးဖို့ နိုင်ငံတကာအသိုင်းအ၀ိုင်းကို ဇန်နဝါရီလမှာ တိုက်တွန်းခဲ့သလို ဇွန်လမှာ အခြေအနေက အဆ ၅၀၀ လောက် ပိုမိုဆိုးဝါးမယ်လို့ ပြောကြားခဲ့ပါတယ်။

၂၀၁၉ ခုနှစ်နှောင်းပိုင်းက ယီမင်မှာ မိုးသည်းထန်စွာ ရွာသွန်းပြီးတဲ့နောက် ကျိုင်းကောင်အုပ်တွေဟာ ယီမင်နိုင်ငံကနေတစ်ဆင့် အခြား အာဖရိကနိုင်ငံတွေကို ပြန့်နှံ့လာတာ ဖြစ်ပါတယ်။ ကျိုင်းကောင်အုပ်တွေ လေယာဉ်အင်ဂျင်ထဲဝင်ကာ စက်ချို့ယွင်းတာကြောင့် ဒီဇင်ဘာလအတွင်း အီသီယိုးပီးယား ခရီးသည်တင်လေယာဉ်တစ်စီး အရေးပေါ် ဆင်းသက်ခဲ့ရပါတယ်။

Ref: BBC