ဖေဖော်ဝါရီ ၄၊ ၂၀၂၀
M-Media

-နှစ်ပေါင်း ၅၀ ကြာ အခက်အခဲတွေ၊ ဆန့်ကျင်မှုတွေကို ကျော်ဖြတ်ခဲ့ရပြီးတဲ့နောက် ဆလိုဗေးနီးယားနိုင်ငံရဲ့ ပထမဆုံး ဗလီဝတ်ကျောင်းတော်ကို တနင်္ဂနွေနေ့က မြို့တော် လူဘယာနာမှာ ဖွင့်လှစ်ခဲ့ပါတယ်။

ခရစ်ယာန်ကက်သလစ်အများစုဖြစ်တဲ့ ဆလိုဗေးနီးယားနိုင်ငံ ကွန်မြူနစ် ယူဂိုဆလားဗီးယားပြည်ထောင်စု အစိတ်အပိုင်း ဖြစ်နေတဲ့အချိန် ၁၉၆၀ ပြည့်နှစ်တွေကတည်းက အစ္စလာမ်ဘာသာဝင်တွေဟာ ဝတ်ပြုရာနေရာတစ်ခု ရရှိဖို့အတွက် အာဏာပိုင်တွေထံ ခွင့်ပြုချက် တောင်းခဲ့ကြတာ ဖြစ်ပါတယ်။

လွတ်လပ်တဲ့နိုင်ငံဖြစ်ပြီးတဲ့‌နောက် လွန်ခဲ့တဲ့ ၁၅ နှစ်ကမှ ခွင့်ပြုချက်ရခဲ့တာပါ။ ဒါပေမယ့် ဗလီတည်ဆောက်ဖို့ ဘဏ္ဍာရေးအခက်အခဲတွေ၊ လက်ယာသမားတွေရဲ့ ကန့်ကွက်မှုတွေကြောင့် ၂၀၁၃ ခုနှစ်ရောက်မှ ဆောက်လုပ်ရေးလုပ်ငန်းကို စတင်နိုင်ခဲ့ပါတယ်။

ဆလိုဗေးနီးယား အစ္စလာမ့်လူ့အဖွဲ့အစည်း အကြီးအကဲဖြစ်တဲ့ မွဖ်သီ နဒ်ဇက်ဂရာဘက်ဇ်က ယူဂိုဆလားဗီယား ပြည်ထောင်စုဝင် နိုင်ငံဟောင်းတွေထဲမှာ ဆလိုဗေးနီးယားဟာ နောက်ဆုံး ဗလီဝတ်ကျောင်းတော် ရှိလာတဲ့နိုင်ငံဖြစ်ပြီး ဒါဟာ တိုင်းပြည်အတွင်း အလှည့်အပြောင်းတစ်ခုဖြစ်တယ်လို့ ပြောကြားခဲ့ပါတယ်။

ဘက်စုံလွှမ်းခြုံမှုရှိ

ဗလီဝတ်ကျောင်းတော်မှာ အဆောက်အဦး ၆ ခုပါဝင်ပြီး လူပေါင်း ၁၄၀၀ လောက် တစ်ပြိုင်တည်း ဝတ်ပြုနိုင်ပါတယ်။

စာကြည့်တိုက်ပါဝင်တဲ့ သင်ကြားရေးစင်တာတစ်ခု၊ စားသောက်ဆိုင်တစ်ခု၊ ဘတ်စကတ်ဘော ကစားကွင်းတစ်ခု၊ ရှေ့ဆောင်အီမာမ်နဲ့ ဗလီအမှုထမ်းတွေ နေထိုင်နိုင်မယ့် အိမ်ယာတစ်ခုတို့ ပါဝင်ပြီး မင်နာရတ်မျှော်စင်က ၁၃၁ ပေ မြင့်ပါတယ်။ အဆောက်အဦးအားလုံးကို ကွန်ကရစ်၊ သစ်သားနဲ့ မှန်တို့ ပေါင်းစပ်ကာ ဗလီအတွင်းပိုင်းမှာပါဝင်တဲ့ အမိုးခုံးက အပြာရောင် ဖြစ်ပါတယ်။

ဗလီဝတ်ကျောင်းတော်ကို ဆောက်လုပ်ပေးခဲ့တဲ့ ဗိသုကာပညာရှင် မတက်ဂျ် ဘီဗက်က ဗလီကို အစ္စလာမ်နဲ့ ခေတ်ပြိုင် ဗိသုကာလက်ရာတွေ ပေါင်းစပ်တည်ဆောက်ထားတာဖြစ်တယ်လို့ ပြောကြားခဲ့ပါတယ်။

ဆလိုဗေးနီးယားနိုင်ငံ လူဦးရေ ၂ သန်းရဲ့ ၂.၅ ရာခိုင်နှုန်းဟာ အစ္စလာမ်ဘာသာဝင်တွေဖြစ်တယ်လို့ ၂၀၀၂ ခုနှစ်က ကောက်ယူခဲ့တဲ့ သန်ခေါင်စာရင်းအရ သိရပါတယ်။

Ref: Arab News