မွတ်စလင်များ တိုင်းပြည်ကို အကျိုးမပြုဟု အိန္ဒိယရှိ ထိပ်တန်း ဟိန္ဒူမဘသဘုန်းကြီးပြော

ဖေဖော်ဝါရီ ၆၊ ၂၀၂၀
M-Media

-ဗြိတိန်ထံကနေ လွတ်လပ်ရေးရတဲ့အချိန် တိုင်းပြည်အတွင်းမှာ ဆက်နေဖို့ ဆုံးဖြတ်ခဲ့ကြတဲ့ မွတ်စလင်တွေဟာ တိုင်းပြည်ကို ‘အကျိုးမပြုခဲ့ဘူး’ လို့ အိန္ဒိယမှာ နာမည်ဆိုးနဲ့ ကျော်ကြားတဲ့ ဟိန္ဒူမဘသဘုန်းကြီး ယိုဂီ အဒီယာနက်သ်က ပြောကြားလိုက်ပါတယ်။

အိန္ဒိယက ပြည်နယ်တစ်ချို့မှာ လာမယ့် စနေနေ့ကျရင် ရွေးကောက်ပွဲရှိနေတဲ့အချိန် အာဏာရ BJP ပါတီရဲ့ ထိပ်တန်းပုဂ္ဂိုလ် အဒီယာနက်သ်ရဲ့ ဒီလိုပြောကြားမှု ပေါ်ထွက်လာတာ ဖြစ်ပါတယ်။

အိန္ဒိယရဲ့ လူဦးရေအများဆုံး အူတာပရာဒက်ရှ်ပြည်နယ် ဝန်ကြီးချုပ်လည်းဖြစ်တဲ့ အဒီယာနက်သ်က ဗြိတိသျှထွက်သွားပြီး အိန္ဒိယ-ပါကစ္စတန် ကွဲတဲ့အချိန် အိန္ဒိယမှာဆက်ရှိဖို့ ဆုံးဖြတ်ခဲ့တဲ့ မွတ်စလင်လူ့အဖွဲ့အစည်းကို ဘီဘီစီသတင်းဌာနနဲ့ အင်တာဗျူးမှာ ဝေဖန်ပြောဆိုခဲ့ပါတယ်။

“ပါကစ္စတန်ဆိုပြီးဖြစ်လာတဲ့ ပိုင်းခြားရေးအစီအစဉ်ကို မွတ်စလင်တွေက ကန့်ကွက်ခဲ့သင့်ပါတယ်”

အသက် ၄၇ နှစ်အရွယ် ဟိန္ဒူဘုန်းကြီးဟာ အရင်ကလည်း မွတ်စလင်တွေအပေါ် တိုက်ရိုက် စော်ကားပြောဆိုမှုတွေ ရှိခဲ့ပါတယ်။

အိန္ဒိယရဲ့ အငြင်းပွားဖွယ် နိုင်ငံသားဥပဒေပြင်ဆင်ချက်နဲ့ပတ်သက်ပြီး ပြီးခဲ့တဲ့သီတင်းပတ်တွေအတွင်း ဖြစ်ပွားခဲ့တဲ့ ဆန္ဒပြမှုတွေကို အင်အားအလွန်အကျွံသုံးနှိမ်နှင်းမှုအတွက်လည်း အဒီယာနက်သ်ရဲ့ အစိုးရက ဝေဖန်ခံနေရပါတယ်။ အူတာပရာဒက်ရှ်ပြည်နယ်မှာ လက်ရှိအချိန်အထိ ဆန္ဒပြသူ အနည်းဆုံး ၁၉ ဦး သေဆုံးခဲ့ပါတယ်။

အဒီယာနက်သ်က အိန္ဒိယမှာ လူတိုင်းဟာ ငြိမ်းချမ်းစွာ ဆန္ဒပြခွင့်ရှိပေမယ့်၊ မငြိမ်းချမ်းတဲ့ ဆန္ဒပြမှုတွေ၊ အများပြည်သူလူထုကို ပြဿနာဖြစ်စေနိုင်တဲ့ ဆန္ဒပြမှုမျိုးကိုတော့ ခွင့်မပြုဘူးလို့ ပြောကြားခဲ့ပါတယ်။

နိုင်ငံသားဥပဒေပြင်ဆင်ချက်အပေါ် ဆန္ဒပြတဲ့ မွတ်စလင်အမျိုးသမီးတွေကို ဒံပေါက်ကျွေးခဲ့တဲ့ ဒေလီဝန်ကြီးချုပ် အာရ်ဗင် ကီဂျ်ရီဝဲလ်ကိုလည်း သူက အင်တာဗျူးမှာ ထည့်သွင်းဝေဖန်ခဲ့ပါတယ်။

ကီဂျ်ရီဝဲလ်ဟာ အာဏာရ ဟိန္ဒူအမျိုးသားရေးပါတီ BJP ကို ပြင်းပြင်းထန်ထန်ဝေဖန်သူဖြစ်ပြီး ၂၀၁၅ ခုနှစ် ဒေလီရွေးကောက်ပွဲမှာ BJP အပါအ၀င် အတိုက်အခံအားလုံကို ပြတ်ပြတ်သားသား အနိုင်ရခဲ့သူ ဖြစ်ပါတယ်။

“ကျုပ်တို့က ဒံပေါက်စားသူတွေမဟုတ်ဘူး။ မစ္စတာမိုဒီ ဝန်ကြီးချုပ်ဖြစ်လာပြီးကတည်းက အကြမ်းဖက်သမားတွေကို ဒံပေါက်အစား ကျည်ဆံတွေပဲ ကျွေးနေတာ” လို့ အဒီယာနက်သ်က ပြောကြားခဲ့ပါတယ်။

၂၀၁၇ ခုနှစ်မတ်လ အူတာပရာဒက်ရှ်ပြည်နယ်မှာ အာဏာရပြီးကတည်းက အဒီယာနက်သ်အစိုးရဟာ ပြည်သူတွေအပေါ် တရားလက်လွတ် သတ်ဖြတ်မှုတွေရှိခဲ့တယ်ဆိုတဲ့ သတင်းတွေ ကျယ်ကျယ်ပြန့်ပြန့်ထွက်ပေါ်ခဲ့ပြီး အဒီယာနက်သ်ကတော့ ဒါဟာ သူတို့ကို တိုက်ခိုက်ဖို့အတွက် ဝါဒဖြန့်သတင်းလွှင့်တာသာ ဖြစ်တယ်လို့ ပြောကြားခဲ့ပါတယ်။

Ref: BBC