ဝူဟန်ဗိုင်းရပ်စ်အကြောင်း ပထမဆုံးသတိပေးခဲ့သည့် ဆရာဝန်လီ ကွယ်လွန် (နောက်ဆုံးရ သတင်းများ)

ဖေဖော်ဝါရီ ၇၊ ၂၀၂၀
M-Media

• တရုတ်နိုင်ငံမှာ ကိုရိုနာဗိုင်းရပ်စ်သစ်ကြောင့် သေဆုံးသူအရေအတွက်ဟာ ဖေဖော်ဝါရီ ၇ ရက်နေ့ မနက်အထိ ၆၃၆ ဦး ရှိလာပြီဖြစ်ပြီး၊ ဖေဖော်ဝါရီ ၆ ရက်နေ့ တစ်ရက်တည်းမှာတင် ၇၃ ဦး သေဆုံးခဲ့တာပါ။ ကူးစက်မှုကတော့ ၂၄ နာရီအတွင်း ၃၁၄၃ ဦး ရှိခဲ့ပြီး စုစုပေါင်း ကူးစက်မှုအရေအတွက်ဟာ ၃၁၁၆၁ ဦး ရှိလာပြီ ဖြစ်ပါတယ်။ တရုတ်နိုင်ငံအပြင်ဘက်မှာတော့ ဟောင်ကောင်နဲ့ ဖိလစ်ပိုင်တို့မှာ ၁ ဦးစီသေဆုံးပြီး အနည်းဆုံး နိုင်ငံပေါင်း ၂၅ နိုင်ငံကို ပြန့်နှံ့နေပြီ ဖြစ်ပါတယ်။
• ဗိုင်းရပ်စ် ကူးစက်ပြန့်နှံ့မှုအကြောင်းကို ပထမဆုံးသတိပေးခဲ့သူတစ်ဦးဖြစ်တဲ့ ဝူဟန်မြို့က အသက် ၃၄ နှစ်အရွယ် ဆရာဝန် လီဝမ်လျန်ဟာ မနေ့က ဒီရောဂါနဲ့ပဲ ကွယ်လွန်သွားခဲ့ပါတယ်။ လီဟာ ကောလဟာလတွေ လွှင့်တယ်ဆိုပြီး တရုတ်အာဏာပိုင်တွေက အစပိုင်းမှာ ခေါ်ယူသတိပေးခဲ့ပါတယ်။ တရုတ်အစိုးရရဲ့ ခြစားမှုတိုက်ဖျက်ရေးအဖွဲ့ National Supervisory Commission က သူတို့အနေနဲ့ ဟူဘေးပြည်နယ်ကို အဖွဲ့တစ်ခုစေလွှတ်ထားပြီး ဒေါက်တာလီရဲ့ကိစ္စကို အသေးစိတ် စုံစမ်းစစ်ဆေးသွားမယ်လို့ ဒီကနေ့မှာ ထုတ်ပြန်ခဲ့ပါတယ်။ ဒေသန္တရ အာဏာပိုင်တွေကလည်း ‌နောက်ပိုင်းမှာ ဒေါက်တာလီကို သွားရောက်တောင်းပန်ခဲ့ပါတယ်။
• ရောဂါပြန့်နှံ့မှုကို အစွမ်းကုန် တိုက်ဖျက်သွားမှာဖြစ်ပြီး တစ်ဖြည်းဖြည်းနဲ့ အောင်မြင်တွေ ရရှိနေတယ်လို့ တရုတ်သမ္မတ ရှီကျင့်ဖျင်က ဒီကနေ့မနက်မှာ အမေရိကန်သမ္မတ ဒေါ်နယ်ထရမ့်ကို ဖုန်းဆက်ပြောဆိုခဲ့ပါတယ်။ ရောဂါတိုက်ဖျက်ရေး ဆောင်ရွက်နိုင်တယ်ဆိုတဲ့ ယုံကြည်မှုမျိုး မိမိတို့မှာရှိနေပြီး တိုင်းပြည်ရဲ့ ရေရှည် စီးပွားရေးတိုးတက်မှုဟာ ပြောင်းလဲသွားမှာ မဟုတ်ဘူးလို့လည်း ရှီက ဆိုပါတယ်။
• တရုတ်နိုင်ငံမှာ ကိုရိုနာဗိုင်းရပ်စ်သစ် ကူးစက်မှုဟာ အမြင့်ဆုံးအခြေအနေကို ရောက်နေလားဆိုတာ ပြောဖို့ စောနေသေးတယ်လို့ ကမ္ဘာ့ကျန်းမာရေးအဖွဲ့ WHO က ဒီကနေ့မှာ ပြောကြားလိုက်ပါတယ်။ ဒါပေမယ့် အဓိကကူးစက်မှုဟာ ဟူ‌ဘေးပြည်နယ်မှာသာ ဆက်လက်ဖြစ်ပွားနေပြီး တရုတ်နိုင်ငံရဲ့ တစ်ခြားနေရာတွေမှာ ပြန့်နှံ့မှုဟာ ဗုဒ္ဓဟူးမှာ ပထမဆုံးအကြိမ်အဖြစ် သိသိသာသာ ကျဆင်းသွားတယ်လို့ ဆိုပါတယ်။
• ဂျပန်နိုင်ငံ ယိုကိုဟားမားမြို့ရေပြင်မှာ ကျောက်ချထားပြီး လူ ၃၇၀၀ လောက် လိုက်ပါလာတဲ့ ကမ္ဘာလှည့် ဇိမ်ခံသင်္ဘောမှာ ဗိုင်းရပ်စ်ကူးစက်နေသူအရေအတွက်ဟာ ၄၁ ဦးအထိ ရှိလာတယ်လို့ ဂျပန်အာဏာပိုင်တွေက ပြောပါတယ်။ ဟောင်ကောင်မှာလည်း ‌ဇိမ်ခံသင်္ဘော ၂ စီးကို ရေပြင်မှာ ကျောက်ချကာ ၁၄ ရက်တာ စောင့်ကြည့်နေပါတယ်။ သင်္ဘော ၂ စီးမှာ စုစုပေါင်း လူထောင်ချီ ရှိနေတာပါ။
• ဝူဟန်မြို့ကနေ ကယ်ထုတ်လာတဲ့ နိုင်ငံသား ၂၄၃ ဦးဟာ ကျန်းမာရေးကောင်းမွန်တာကြောင့် ကိုရိုနာဗိုင်းရပ်စ် ရှိ၊ မရှိ နှာခေါင်းတို့ဖတ်နမူနာယူကာ စစ်ဆေးစရာ မလိုဘူးလို့ အင်ဒိုကျန်းမာရေးဝန်ကြီးဌာနက မနေ့မှာ ပြောကြားခဲ့ပါတယ်။ လက်ရှိ ဒီလူတွေကို သီးသန့်ခွဲထားပြီး စောင့်ကြည့်နေတာ ဖြစ်ပါတယ်။

Ref: Aljazeera