ဆီးရီးယားတွင် တူရကီက တပ်အင်အားဖြည့်၊ အာဆတ်အစိုးရနှင့် တင်းမာမှု မြင့်တက်

ဖေဖော်ဝါရီ ၈၊ ၂၀၂၀
M-Media

-ဆီးရီးယားနိုင်ငံက သူပုန်တွေရဲ့ နောက်ဆုံးခြေကုပ်ဖြစ်တဲ့ အီဒလစ်ပြည်နယ်က စစ်စခန်း း ၁၂ ခုမှာ ကွန်မန်ဒိုတွေ၊ ၊ လက်နက်ခဲယမ်းတွေပါဝင်တဲ့ စစ်တပ်ယာဉ် အစီးပေါင်း ၁၅၀ လောက်ကို ထပ်မံစေလွှတ် အင်အားဖြည့်တင်းခဲ့တယ်လို့ တူရကီ နိုင်ငံပိုင်သတင်းဌာန Anadolu က မနေ့မှာ ဖော်ပြခဲ့ပါတယ်။

ရုရှားကျောထောက်နောက်ခံပြုထားတဲ့ အာဆတ်အစိုးရတပ်တွေဟာ ပြီးခဲ့တဲ့ သီတင်းပတ်တွေအတွင်း အီဒလစ်ပြည်နယ်ကို ပြန်လည်သိမ်းပိုက်နိုင်ရေး ထိုးစစ်ဆင်မှုတွေ အကြီးအကျယ်ပြုလုပ်နေပြီး တူရကီနဲ့ တင်းမာမှုတွေ မြင့်တက်လာတာ ဖြစ်ပါတယ်။

၂၀၁၈ ခုနှစ် ရုရှားနဲ့ရရှိခဲ့တဲ့ သဘောတူညီချက်အရ အီဒလစ်ပြည်နယ် အရှေ့တောင်ပိုင်းမှာ စစ်စခန်း ၉ ခု တည်ဆောက်ထားရာမှာ လက်ရှိ အားလုံးကို ‌ဆီးရီးယားအစိုးရတပ်တွေရဲ့ ဝန်းရံပိတ်ဆို့မှုကို ခံနေရတယ်လို့ တူရကီက ပြောကြားခဲ့ပါတယ်။ အာဆတ်အစိုးရတပ်ရဲ့ ထိုးစစ်ဆင်မှုကြောင့် အီဒလစ်ပြည်နယ်ကနေ ဒုက္ခသည် သိန်းချီ တူရကီထဲကို ထွက်ပြေးခဲ့ရပြီး ဖေဖော်ဝါရီလကုန်ပိုင်းမှ ဒါတွေကို မရပ်တန့်ဘူးဆိုရင် ဆီးရီးယားအစိုးရတပ်ကို ပြန်တိုက်မယ်လို့ တူရကီသမ္မတ အာဒိုဂန်က ခြိမ်းခြောက်ခဲ့ပါတယ်။

ဆီးရီးယားနဲ့ တူရကီတို့အကြား တင်းမာမှုတွေ လျော့ချဖို့အတွက် ရုရှားအာဏာပိုင်တွေဟာ အန်ကာရာကို လာရောက်ဆွေးနွေးမှုတွေ လုပ်ဆောင်နေပါတယ်။

၂၀၁၇ နဲ့ ၂၀၁၈ ခုနှစ်တွေအတွင်း ရုရှား၊ တူရကီနဲ့ အီရန်တို့အကြား ရရှိခဲ့တဲ့ သဘောတူညီချက်တွေမှာ အီဒလစ်ပြည်နယ်နဲ့ အရှေ့ဂူတာဒေသက မြို့တွေကို တင်းမာမှုလျော့ချရေးဇုန်အဖြစ် သတ်မှတ်ထားပြီး တိုက်ခိုက်မှုကို ပြင်းပြင်းထန်ထန် တားမြစ်ထားတာ ဖြစ်ပါတယ်။ သဘောတူညီချက်အရ တူရကီ စစ်စခန်း ၁၂ ခု တည်ဆောက်ခွင့်ရခဲ့တာပါ။

Ref: Aljazeera