တာတိုပစ် ဒုံးကျည်သစ်တစ်စင်းကို အီရန် ထုတ်ပြ

ဖေဖော်ဝါရီ ၁၀၊ ၂၀၂၀
M-Media

-မျိုးဆက်သစ် အင်ဂျင်တွေကို သုံးထားပြီး ဂြိုဟ်တုတွေ လွှတ်တင်ရာမှာ အသုံးပြုနိုင်မယ့် ပြည်တွင်းဖြစ် ဒုံးကျည်အသစ်တစ်စင်းကို အီရန်က မနေ့မှာ ထုတ်ပြလိုက်ပြီး ဂြိုဟ်တု တစ်လုံးကိုလည်း လွှတ်တင်ခဲ့ပါတယ်။

အစ္စလာမ့်တော်လှန်ရေးအစောင့်တပ် IRGC ရဲ့ စီမံကိန်းကနေ ပေါ်ထွက်လာပြီး Raad-500 လို့ အမည်ပေးထားတဲ့ အဲဒီ ဒုံးကျည်ဟာ တာတိုပစ်ဖြစ်ကာ မိုင် ၃၁၀ လောက်အထိ ရောက်ရှိနိုင်ပါတယ်။ ၂၀၀၂ ခုနှစ်က ထုတ်ပြန်ခဲ့ပြီး ၁၂၄ မိုင်အထိသွားနိုင်တဲ့ Fateh-110 ဒုံးကျည်ထက် ပိုမိုပေါ့ပါးပြီး စွမ်းဆောင်ရည် ပိုမိုမြင့်မားပါတယ်။

အဲဒီဒုံးကျည်အသုံးပြုထားတဲ့ Simorgh ဒုံးပျံဟာ Zafar 1 ဆက်သွယ်ရေးဂြိုဟ်တုကို မနေ့ညပိုင်းက လွှတ်တင်ခဲ့ပေမယ့် ဂြိုဟ်တုဟာ လိုအပ်တဲ့အရှိန် မရတာကြောင့် ကမ္ဘာပတ်လမ်းထဲ မရောက်ခဲ့ပါဘူး။ အီရန် ဆက်သွယ်ရေးဝန်ကြီး မိုဟာမက် ဂျာဗဒ် အဇာရီ ဂျာရိုမီက ယခု ဂြိုဟ်တုလွှတ်တင်မှု မအောင်မြင်ပေမယ့် မိမိတို့ကို မရပ်တန့်နိုင်ကြောင်း၊ နောက်ထပ် အီရန်ရဲ့ ဂြိုဟ်တုတွေ လာတော့မာဖြစ်ကြောင်း Twitter စာမျက်နှာမှာ ရေးသားခဲ့ပါတယ်။

၁၉၇၉ ခုနှစ် အစ္စလာမ့်မစ်တော်လှန်ရေး နှစ်ပတ်လည်နေ့မတိုင်ခင် ၁ ရက်မှာ အီရန်က အခုလို တာတိုပစ် ဒုံးကျည်သစ်ကို ထုတ်ပြလိုက်တာပါ။ အီရန်ဟာ တော်လှန်ရေးနှစ်ပတ်လည်နေ့တွေမှာ ကာကွယ်ရေးဆိုင်ရာ နည်းပညာသစ်တွေကို ထုတ်ပြလေ့ ရှိပါတယ်။

ပြီးခဲ့တဲ့ ၁၀ စုနှစ်တွေအတွင်း အနောက်နိုင်ငံတွေရဲ့ စီးပွားရေးပိတ်ဆို့မှုတွေကြောင့် အီရန်ဟာ ကာကွယ်ရေးနယ်ပယ်မှာ ကိုယ့်ခြေထော်ပေါ်ကိုယ် ရပ်တည်ခဲ့ရပြီး တိုးတက်မှုတွေလည်း ရခဲ့ပါတယ်။ ပိတ်ဆို့မှုတွေကြောင့် လေတပ်အင်အားတောင့်တင်းအောင် မလုပ်ဆောင်နိုင်တော့ဘဲ ကာကွယ်ရေးအတွက် ဒုံးကျည်စီမံကိန်းကို စတင်မယ်လို့ အီရန်က ၂၀၀၉ ခုနှစ်မှာ ကြေငြာခဲ့ပါတယ်။

အမေရိကန်ကတော့ ဒီ အီရန်ရဲ့ ဒုံးကျည်အစီအစဉ်ကို ပြင်းပြင်းထန်ထန် ကန့်ကွက်ခဲ့ပါတယ်။

Ref: Aljazeera