ဝူဟန်ဗိုင်းရပ်စ်နှိမ်နှင်းရေး ကုလအဖွဲ့ တရုတ်ကိုရောက်ရှိလာ (နောက်ဆုံးရသတင်းများ)

ဖေဖော်ဝါရီ ၁၀၊ ၂၀၂၀ (ညနေ ၅ နာရီခွဲ)
M-Media

– ကိုရိုနာဗိုင်းရပ်စ်အသစ်ကြောင့် တရုတ်နိုင်ငံမှာ သေဆုံးသူအရေအတွက်ဟာ ၉၀၈ ဦး ရှိလာခဲ့ပြီး ကမ္ဘာ့ကျန်းမာရေးအဖွဲ့ WHO အဖွဲ့က ဦးဆောင်တဲ့ နိုင်‌ငံတကာ ဆေးဘက်ဆိုင်ရာ ကျွမ်းကျင်သူတွေ ပါဝင်တဲ့အဖွဲ့တစ်ခုဟာလည်း တရုတ်နိုင်ငံကို သွားရောက်နေပြီဖြစ်ပါတယ်။ တရုတ်နိုင်ငံမှာ မနေ့ကတစ်ရက်တည်း သေဆုံးသူ ၉၇ ဦးရှိပြီး ရောဂါ စတင်ပြန့်နှံ့ကတည်းက တစ်ရက်အတွင်း အများဆုံး သေဆုံးမှုလည်း ဖြစ်ပါတယ်။ ကူးစက်နေသူအရေအတွက်ကတော့ ၄ သောင်းကျော် ရှိလာပြီ ဖြစ်ပါတယ်။

– ဂျပန်နိုင်ငံ ယိုကိုဟားမားမြို့ ရေပြင်မှာ ကျောက်ချရပ်နားထားတဲ့ Diamond Princess ကမ္ဘာလှည့်ဇိမ်ခံသင်္ဘောမှာ ဗိုင်းရပ်စ်ကူးစက်နေတယ်လို့ အတည်ပြုနိုင်သူအရေအတွက်ဟာ ၁၃၆ ဦးအထိ ရှိလာပြီဖြစ်ပြီး ဂျပန်၊ အမေရိကန်၊ ဩစတေးလျ၊ ဖိလစ်ပိုင်၊ ကနေဒါနဲ့ ယူကရိန်းနိုင်ငံတို့က ဖြစ်ပါတယ်။

– ယူကေက ကိုရိုနာဗိုင်းရပ်စ်သစ်ကို ပြည်သူ့ကျန်းမာရေးအတွက် ဆိုးဆိုးရွားရွားခြိမ်းခြောက်မှုတစ်ခုအဖြစ် သတ်မှတ်လိုက်ပါတယ်။ ဒါ့‌ကြောင့် အစိုးရဟာ ဗိုင်းရပ်စ်နှိမ်နှင်းရေးလုပ်ငန်း ဆောင်ရွက်ရာမှာ အာဏာအသုံးပြုခွင့် ပိုမိုရရှိမှာဖြစ်ပါတယ်။ တရုတ်နိုင်ငံက ဝူဟန်မြို့နဲ့ ဟူဘေးပြည်နယ်ကို ရောဂါကူးစက်ရာနေရာအဖြစ် ယူကေကေ သတ်မှတ်လိုက်ပြီး နိုင်ငံအတွင်း ဆေးရုံ ၂ ရုံကိုလည်း ဝူဟန်ဗိုင်းရပ်စ် သီးသန့်ကုသရာ နေရာအဖြစ် ပြောင်းလဲခဲ့ပါတယ်။

– တရုတ်နိုင်ငံကို သွားရောက်ခဲ့ခြင်းမရှိတဲ့သူတွေမှာ ဗိုင်းရပ်စ်ပိုးကူးစက်မှု တွေ့ရတာဟာ စိုးရိမ်စရာဖြစ်ပြီး နိုင်ငံအားလုံး ပြင်ဆင်ထားကြဖို့ ကမ္ဘာ့ကျန်းမာရေးအဖွဲ့ WHO အကြီးအကဲ Tedros Adhanom Ghebreyesus က ပြောကြားလိုက်ပါတယ်။ အခု ကြုံတွေ့နေရတာတွေဟာ ‌ရေခဲတောင်ကြီးတစ်ခုရဲ့ ထိပ်ပိုင်းကို မြင်‌ရတာဖြစ်ပြီး၊ နိုင်ငံတွေအနေနဲ့ တည်တည်ငြိမ်ငြိမ်ရှိကာ၊ အချက်အလက်တွေကို မချွင်းမချန်မျှဝေကြဖို့လည်း သူက အကြံပြုခဲ့ပါတယ်။

Ref: Aljazeera