ပါလက်စတိုင်း လယ်ယာထွက်ကုန် တင်ပို့မှုကို အစ္စရေးက ပိတ်ပင်

ဖေဖော်ဝါရီ ၁၁၊ ၂၀၂၀
M-Media

-ပါလက်စတိုင်းဒေသကနေထွက်တဲ့ လယ်ယာထွက်ကုန်တွေ ဂျော်ဒန်ကနေတစ်ဆင့် နိုင်ငံရပ်ခြားတင်ပို့မှုကို အစ္စရေးစစ်တပ်က ပိတ်ပစ်လိုက်ပြီး၊ ပါလက်စတိုင်းဒေသတွေမှာ တင်းမာမှုတွေ ပိုမိုမြင့်တက်လာဖွယ် ရှိနေပါတယ်။

ဂျော်ဒန်ဟာ ပါလက်စတိုင်းပိုင် အနောက်ဖက်ကမ်းရဲ့ တစ်ခုတည်းသော ကုန်သွယ်ရေးလမ်းကြောင်း‌ ဖြစ်ပါတယ်။ တစ်ခြားလမ်းကြောင်းတွေကို အစ္စရေးက အရင်ကတည်း ပိတ်ဆို့ထားတာပါ။

အစ္စရေးစစ်တပ်ကတော့ ကာကွယ်ရေးဝန်ကြီးရဲ့ ညွှန်ကြားချက်အရ ဂျော်ဒန်ကနေတစ်ဆင့် ပါလက်စတိုင်းကုန်ပစ္စည်း တင်ပို့မှုကို ခွင့်ပြုမှာ မဟုတ်ဘူးလို့ ပြောကြားခဲ့ပါတယ်။

ပါလက်စတိုင်းအာဏာပိုင်အဖွဲ့ကလည်း အစ္စရေးစစ်သားတွေဟာ အဝင်အထွက်ဂိတ်တွေမှာ လယ်ယာထွက်ကုန် တင်ပို့မှုကို တားဆီးထားတယ်လို့ ထုတ်ပြန်ခဲ့ပါတယ်။

အစ္စရေးကနေ ပါလက်စတိုင်းပိုင်နက်တွေထဲ အသားတင်သွင်းမှု ပါလက်စတိုင်းအာဏာပိုင်အဖွဲ့က ပိတ်ပင်မှုကို အစ္စရေးဖက်က လက်တုန့်ပြန်တာဖြစ်တယ်လို့ ပါလက်စတိုင်း ဒုတိယစီးပွားရေးဝန်ကြီး တာရစ် အဘူလာဘန်က ပြောကြားခဲ့ပါတယ်။

အစ္စရေးဖက်က တင်သွင်းတဲ့ အသားတွေရဲ့ အများစုဟာ နိုင်ငံခြားကလာတာဖြစ်တာကြောင့်၊ မိမိတို့ကိုယ်တိုင် နိုင်ငံခြားကနေ တိုက်ရိုက်တင်သွင်းတော့မယ်လို့ ပါလက်စတိုင်းအာဏာပိုင်အဖွဲ့က ပြီးခဲ့တဲ့နှစ် စက်တင်ဘာလမှာ ပြောကြားခဲ့ပါတယ်။

စီးပွားရေးမှာ ပါလက်စတိုင်းက အစ္စရေးအပေါ် မှီခိုနေရမှုကို လျော့ချဖို့ ပါလက်စတိုင်းအာဏာပိုင်အဖွဲ့ရဲ့ ကြိုးစားမှုကို အစ္စရေးက မနှစ်မြို့ပါဘူး။

ပါလက်စတိုင်း-အစ္စရေး ပဋိပက္ခဖြေရှင်းရေးဆိုတဲ့ခေါင်းစဉ်နဲ့ အမေရိကန်သမ္မတ ဒေါ်နယ်ထရမ့်က ထုတ်ပြန်တဲ့ အဆိုပြုချက်နဲ့ပတ်သက်ပြီး ပါလက်စတိုင်းပိုင်နက်မှာ ဆန့်ကျင်မှုတွေ ဖြစ်ပေါ်နေတဲ့အချိန် အစ္စရေးက ဒီလိုပိတ်ဆို့လိုက်တာပါ။ ဒါ့ကြောင့် တင်းမာမှုတွေ ပိုမိုမြင့်တက်လာမယ်ဆိုတဲ့ စိုးရိမ်မှုတွေလည်း ရှိနေပါတယ်။

Ref: Aljazeera