ဝူဟန်ဗိုင်းရပ်စ်ကြောင့် သေဆုံးသူ ၁၀၀၀ ကျော်ပြီ (နောက်ဆုံးရသတင်းများ)

ဖေဖော်ဝါရီ ၁၁၊ ၂၀၂၀ (ညနေ ၅ နာရီ)
M-Media

• ဖေဖော်ဝါရီ ၁၀ ရက်နေ့ တစ်ရက်တည်းမှာတင် တရုတ်နိုင်ငံအတွင်း ဝူဟန်ဗိုင်းရပ်စ်ကြောင့် သေဆုံးသူဟာ စံချိန်တင် ၁၀၈ ဦးရှိခဲ့‌ပြီး စုစုပေါင်း သေဆုံးသူအရေအတွက်ဟာ ၁၀၁၆ ဦး ရှိလာပြီ ဖြစ်ပါတယ်။ ကူးစက်သူက မနေ့မှာ ၂၄၇၈ ဦး ထပ်တိုးလာကာ ၄၂၆၃၈ ဦးအထိ ရောက်လာပါတယ်။ ဟူဘေးပြည်နယ်က ကျန်းမာရေးကော်မရှင် ထိပ်တန်းအရာရှိ ၂ ဦးကိုလည်း တရုတ်အစိုးရက ရာထူးကနေ ထုတ်ပယ်လိုက်ပါတယ်။ ဗိုင်းရပ်စ်အဓိကပြန့်နှံ့ရာ ဝူဟန်မြို့ကို သမ္မတရှီကျင့်ဖျင် မနေ့က ပထမဆုံးအကြိမ် သွားရောက်ကြည့်ရှုခဲ့ပါတယ်။
• ပြည်သူတွေအနေနဲ့ တတ်နိုင်သမျှ အိမ်ထဲမှာပဲနေဖို့ တရုတ်နဲ့ကပ်နေတဲ့ ဟောင်ကောင်မှာ အစိုးရက သတိပေးချက် ထုတ်ပြန်ထားပါတယ်။ ဟောင်ကောင်မှာ ကျောင်းတွေလည်း ပိတ်ထားပြီး၊ လူတွေဟာ များသောအားဖြင့် အိမ်ကနေသာ အလုပ်လုပ်နေကြပါတယ်။ တရုတ်နဲ့ကပ်နေတဲ့ နောက်ထပ်ကျွန်းတစ်ကျွန်းဖြစ်တဲ့ ထိုင်ဝမ်ကတော့ ဟောင်ကောင်နဲ့ မကာအိုတို့ကို ခရီးမသွားဖို့ ပြည်သူတွေကို သတိပေးထားပါတယ်။
• ဗီယက်နမ်နိုင်ငံမှာ ဗိုင်းရပ်ကူးစက်သူအရေအတွက်ဟာ ၁၅ ဦးအထိ မြင့်တက်လာပြီး ၃ လအရွယ်ကလေးငယ်တစ်ဦးလည်း အဘွားဖြစ်သူထံကနေ ကူးစက်ခဲ့ပါတယ်။ ထိုင်းမှာတော့ မနေ့က တရုတ်အမျိုးသမီးတစ်ဦး ကူးစက်တာကို တွေ့ခဲ့ရပြီး စုစုပေါင်း ကူးစက်သူအရေအတွက်ဟာ ၃၃ ဦးအထိ ရှိလာပြီ ဖြစ်ပါတယ်။ အဲဒီအထဲက ၁၀ ဦးဟာ နေပြန်ကောင်းသွားတဲ့အတွက် ဆေးရုံကနေ ဆင်းသွားပြီ ဖြစ်ပါတယ်။
• ဖေဖော်ဝါရီလ ၁၃ ရက်နေ့ ဘန်ကောက်မှာ ကမ်းကပ်မယ့် အမေရိကန် ကမ္ဘာလှည့်သင်္ဘော MS Westerdam က ခရီးသည်တွေဆင်းခွင့် တောင်းခံမှုကို ထိုင်းနိုင်ငံက ငြင်းဆိုလိုက်ပြီး ဗိုင်းရပ်စ်ပြန့်နှံ့မယ့်အန္တရာယ် ရှိနိုင်တဲ့အတွက်ကြောင့်လို့ ပြောကြားခဲ့ပါတယ်။ သင်္ဘောကုမ္ပဏီကတော့ လိုက်ပါလာတဲ့ ခရီးသည်တွေမှာ ကိုရိုနာဗိုင်းရပ်စ်ပိုး ကူးစက်စရာ အကြောင်းမရှိဘူးလို့ ဆိုပါတယ်။
• တရုတ်ဖက်ကနေ ဗိုင်းရပ်စ်တွေဝင်မလာရေး နယ်စပ်မှာ ပတ္တရောင်လှည့်ဖို့အတွက် လူရာချီစေလွှတ်ထားတယ်လို့ မြောက်ကိုရီးယားက မနေ့မှာ ထုတ်ပြန်ပါတယ်။ မြောက်ကိုရီးယားဟာ တရုတ်နဲ့ ကုန်းကြောင်း၊ လေကြောင်း အားလုံးကို ဖြတ်တောက်ထားတာပါ။ တောင်ကိုရီးယားကတော့ မြောက်ကိုရီးယားဖက်ကို ဝူဟန်ဗိုင်းရပ်စ် ရောက်နေပြီလို့ ဆိုပါတယ်။

Ref: Aljazeera