ဘင်္ဂလားဒေ့ရှ်တွင် ဆော်ဒီကုမ္ပဏီများ ဒေါ်လာ ဘီလီယံ ၃၀ အထိ ရင်းနှီးမြှုပ်နှံရန် ရှိနေ

ဖေဖော်ဝါရီ ၁၃၊ ၂၀၂၀
M-Media

-ဆော်ဒီအာရေဗျက ကုမ္ပဏီတွေဟာ နိုင်ငံရဲ့ စီးပွားရေးလုပ်ငန်းပေါင်းစုံမှာ ကန်ဒေါ်လာ ဘီလီယံ ၃၀ ဖိုးလောက် ရင်းနှီးမြှုပ်နှံဖို့ စီစဉ်နေတယ်လို့ ဘင်္ဂလားဒေ့ရှ်အာဏာပိုင်တွေက ပြောကြားလိုက်ပါတယ်။

ဆော်ဒီက ကုမ္ပဏီကြီး ၇ ခုအပါအဝင် နိုင်ငံရဲ့ စီးပွားရေးလုပ်ငန်းတွေက ကိုယ်စားလှယ် ၄၀ လောက်ပါတဲ့ အဖွဲ့နဲ့ ဘင်္ဂလားဒေ့ရှ်အာဏာပိုင်တွေဟာ ၂ ရက်ကြာ စီးပွားရေးဆိုင်ရာ ဆွေးနွေးပွဲကို မြို့တော်ဒါကာမှာ မနေ့က ပြုလုပ်ခဲ့ပါတယ်။ ဆော်ဒီအဖွဲ့ကို နိုင်ငံခြားရေးရာဝန်ကြီးဌာန ဒုတိယဝန်ကြီး မာဟီရ် အလ်-ဂါစင်က ဦးဆောင်တာ ဖြစ်ပါတယ်။

ဘင်္ဂလားဒေ့ရှ် စီးပွားရေးဆက်ဆံမှုဌာနရဲ့ အရှေ့အလယ်ပိုင်းဆိုင်ရာ တာဝန်ရှိသူ ဖိုင်ဆဲလ် ဇာဟူရ်က ဆွေးနွေးပွဲအတွင်း ဘင်္ဂလာဒေ့ရှ်နိုင်ငံရဲ့ စွမ်းအင်ကဏ္ဍမှာ ရင်းနှီးမြှုပ်နှံရေး အဓိကထား ဆွေးနွေး သဘောတူညီချက်မူကြမ်းတစ်ခု ရရှိခဲ့ကာ ကြာသာပတေးနေ့မှာ လက်မှတ်ထိုးမယ်လို့ ပြောကြားခဲ့ပါတယ်။

ဆော်ဒီအာရေဗျမှာ အလုပ်လုပ်ကိုင်နေတဲ့ ဘင်္ဂလားဒေ့ရှ်အလုပ်သမားတွေ အဆင်ပြေလွယ်ကူ ချောမွေ့စေရေး ဆောင်ရွက်ပေးဖို့လည်း နှစ်ဖက်ကိုယ်စားလှယ်တွေက ဆွေးနွေးခဲ့ကြပါတယ်။

“ဆော်ဒီလုပ်ငန်းရှင်တွေဟာ ဘင်္ဂလားဒေ့ရှ်မှာ ဘယ်လောက်ပမာဏပဲဖြစ်ဖြစ် ရင်းနှီးမြှုပ်နှံဖို့ အဆင်သင့်ဖြစ်နေတယ်။ တိုင်းပြည်က ဘယ်လောက်ဖြုန်းပေးနိုင်မလဲဆိုတဲ့အပေါ်မှာပဲ မူတည်ပါတယ်” လို့ ဇာဟူရ်က ပြောကြားခဲ့ပါတယ်။

ဘင်္ဂလားဒေ့ရှ် ရင်းနှီးမြှုပ်နှံမှု တိုးတက်ရေးဆိုင်ရာ အာဏာပိုင်အဖွဲ့ (BIDA) ရဲ့ အမှုဆောင်ဥက္ကဌ မိုဟာမက် ဆီရာဇူလ် အစ္စလာမ်က ဆော်ဒီလုပ်ငန်းရှင်တွေရဲ့ ရင်းနှီးမြှုပ်နှံနိုင်တဲ့ပမာဏာ မြင့်မားတာကြောင့် နိုင်ငံမှာ လာရောက်လုပ်ကိုင်ဖို့ အလွန်ဆန္ဒရှိကြောင်း၊ ဒေါ်လာ ဘီလီယံပေါင်းများစွာ ရင်းနှီးမြှုပ်နှံနိုင်တဲ့ လုပ်ငန်းရှင်တွေကို ဆွဲဆောင်နိုင်ဖို့ အဓိကထား လုပ်ဆောင်သွားမှာဖြစ်ကြောင်း ထည့်သွင်းပြောဆိုခဲ့ပါတယ်။

မနေ့က အစည်းအဝေးမှာ အစိုးရနဲ့ ပုဂ္ဂလိကလုပ်ငန်းတွေ ပူးပေါင်းဆောင်ရွက်မှု၊ ပုဂ္ဂလိကလုပ်ငန်းအချင်းချင်း ပူးပေါင်းဆောင်ရွက်မှုတွေအတွက် ဆွေးနွေးခဲ့ကြတယ်လို့လည်း သူက ဆိုပါတယ်။

Ref: Arab News