အီရန်အပေါ် စစ်ဆင်နိုင်မည့် သမ္မတအာဏာကို ကန်လွှတ်တော် ကန့်သတ်

ဖေဖော်ဝါရိ ၁၄၊ ၂၀၂၀
M-Media

-အီရန်ကို စစ်တိုက်တာနဲ့ပတ်သက်ပြီး သမ္မတထရမ့်ရဲ့ အခွင့်အာဏာကို ကန့်သတ်တဲ့ ဥပဒေတစ်ခုကို ရီပက်ဘလစ်ကန်ကြီးစိုးတဲ့ အမေရိကန်အထက်လွှတ်တော်က မနေ့မှာ အတည်ပြုလိုက်ပါတယ်။

အခုဥပဒေအရ အီရန်ကို စစ်ရေးအရ အရေးယူမယ်ဆိုရင် သမ္မတထရမ့်ဟာ လွှတ်တော်ရဲ့ အတည်ပြုချက်ကို ရယူရတော့မှာ ဖြစ်ပါတယ်။

အီရန်တော်လှန်ရေးအစောင့်တပ်ဖွဲ့က တပ်မှူး ကာစင် ဆိုလိုင်မာနီကို ထရမ့်ရဲ့ အမိန့်နဲ့ ပြီးခဲ့တဲ့လမှာ အမေရိကန်က လုပ်ကြံသတ်ဖြတ်ခဲ့ပြီး အီရန်ကလည်း အီရတ်က အမေရိကန်စစ်စခန်း ၂ ခုကို လက်တုန့်ပြန် တိုက်ခိုက်ခဲ့တာကြောင့် အရှေ့အလယ်ပိုင်းဒေသမှာ ပဋိပက္ခတွေ ပိုမိုကျယ်ပြန့်သွားနိုင်တယ်ဆိုတဲ့ စိုးရိမ်မှုတွေ မြင့်တက်လာခဲ့တာပါ။

မူကြမ်းတင်သွင်းတဲ့ လွှတ်တော်အမတ် တင်မ်ကိုင်နီက ဒီမူကြမ်းကို ထရမ့်ကြောင့် ဒါမှမဟုတ် သမ္မတအာဏာကြောင့် အတည်ပြုတာမျိုးမဟုတ်ဘဲ လွှတ်တော်ရဲ့ စစ်ကြေငြာခွင့် အခွင့်အာဏာကို ပိုမိုခိုင်မာအောင် ဆောင်ရွက်တာဖြစ်တယ်လို့ ပြောကြားခဲ့ပါတယ်။

တိုင်းပြည် တိုက်ခိုက်ခံရမယ့် အနေအထားမျိုး ကြုံလာရင် တိုင်းပြည်ကို ကာကွယ်ဖို့ သမ္မတမှာ အာဏာအပြည့်အ၀ရှိပေမယ့် ထိုးစစ်ဆင်မှုအတွက်တော့ လွှတ်တော်မှာဆွေးနွေးမှု၊ လွှတ်တော်ရဲ့အတည်ပြုမှု ရယူရမယ်လို့လည်း သူက ဆိုပါတယ်။

ဒီမိုကရက်တွေကြီးစိုးတဲ့ အောက်လွှတ်တော်မှာ ပြီးခဲ့တဲ့လက ထရမ့်ရဲ့ စစ်ကြေငြာခွင့်အာဏာကို ကန့်သတ်တဲ့ ဆုံးဖြတ်ချတ်ချက်တစ်ခု အတည်ပြုခဲ့ပါတယ်။

ဇန်နဝါရီ ၃ ရက်နေ့က အီရန်ဗိုလ်ချုပ် ကာစင် ဆိုလိုင်မာနီကို ဒရုန်းနဲ့လုပ်ကြံမှုကိစ္စမှာ ထရမ့်အစိုးရကို ရီပက်ဘလစ်ကန်နဲ့ ဒီမိုကရက်အမတ်တွေက ဝေဖန်ခဲ့ကြပါတယ်။ အီရန်က တိုက်ခိုက်မှု ပြုလုပ်လာနိုင်တယ်ဆိုတဲ့ သတင်းကို အမေရိကန်အာဏာပိုင်တွေက အသေးစိတ်မဟုတ်ဘဲ အပေါ်ယံသာ ပေးခဲ့တယ်လို့လည်း ပြောကြားခဲ့ပါတယ်။

ဒေါ်နယ်ထရမ့်ကတော့ တင်မ်ကိုင်နီရဲ့ ဒီမူကြမ်းကို ဆန့်ကျင်တာဟာ နိုင်ငံတော်လုံခြုံရေးအတွက် အရေးကြီးတယ်လို့ ဗုဒ္ဓဟူးနေ့က Twitter စာမျက်နှာမှာ ရေးသားခဲ့ပါတယ်။

Ref: Aljazeera