ဗလီများအား အကြမ်းဖက်တိုက်ခိုက်ရန် ကြံစည်သည့်အဖွဲ့ကို ဂျာမနီ ဖမ်းဆီး

ဖေဖော်ဝါရီ ၁၈၊ ၂၀၂၀
M-Media

-ဗလီဝတ်ကျောင်းတော်တစ်ချို့ကို အကြီးစား အကြမ်းဖက်တိုက်ခိုက်ဖို့ စီစဉ်နေတဲ့ လယ်ယာစွန်းရောက် အုပ်စုတစ်စုကို ဖမ်းဆီးလိုက်တယ်လို့ ဂျာမနီအစိုးရက သတင်းထုတ်ပြန်ပါတယ်။

လက်ယာစွန်းယောက် ၁၂ ဦးကို ပြီးခဲ့တဲ့တစ်ပတ် သောကြာနေ့က နိုင်ငံတစ်ဝှမ်းမှာ စီးနင်းဖမ်းဆီးခဲ့တာဖြစ်ပြီး ပြီးခဲ့တဲ့နှစ် မတ်လက နယူးဇီလန်မှာဖြစ်ပွားခဲ့တဲ့ ဗလီဝတ်ကျောင်းတော် ၂ လုံး အကြမ်းဖက်ခံရမှုအတိုင်း တိုက်ခိုက်ဖို့ စီစဉ်နေတာလို့ ဂျာမနီပြည်ထဲရေးဝန်ကြီးဌာန ပြောရေးဆိုခွင့်ရှိသူ Björn Grünewälder က ပြောကြားခဲ့ပါတယ်။

ဂျာမနီမီဒီယာတွေကလည်း ဒီအုပ်စုဟာ လူအများ စုရုံးဝတ်ပြုတဲ့နေ့မျိုးမှာ ဗလီဝတ်ကျောင်းတော်တွေကို တစ်ကြိမ်တည်း၊ တစ်ပြိုင်တည်း တိုက်ခိုက်ဖို့ စီစဉ်နေတယ်လို့ တနင်္ဂနွေနေ့မှာ ဖော်ပြခဲ့ပါတယ်။

“အချိန်တိုတိုအတွင်းမှာ အစွန်းရောက်အောင် လုပ်ခြင်းခံလိုက်ရတဲ့ အုပ်စုငယ်တွေ ရှိနေတယ်ဆိုတာကို မြင်ရတာ တုန်လှုပ်စရာပါပဲ” လို့ Björn Grünewälder က ဆိုပါတယ်။

ဝန်ကြီးချုပ် အိန်ဂျလာမာကဲလ်ရဲ့ ပြောရေးဆိုခွင့်ရှိသူ Steffen Seibert က တိုင်းပြည်ရဲ့ လွတ်လပ်စွာ ကိုးကွယ်ခွင့်ကို ကာကွယ်ရေးမှာ ဒီကိစ္စဟာ အစိုးရအတွက် စမ်းသပ်မှုတစ်ခုဖြစ်တယ်လို့ ပြောကြားခဲ့ပါတယ်။

“ဥပ‌ဒေဘောင်အတွင်းကနေပြီး ကိုယ်ယုံကြည်ရာကို ကိုးကွယ်တဲ့ ဘယ်သူအပေါ်မှာမှ ဒီလိုခြိမ်းခြောက်မှုမျိုး၊ အန္တရာယ်ပြုမှုမျိုး လုပ်ဆောင်ခွင့် မရှိပါဘူး

နယူးဇီလန်နိုင်ငံ ခရိုက်ချက်မြို့က ဗလီ ၂ လုံးကို တိုက်ခိုက်မှုမှာ ဆီးမီးအော်တိုမက်တစ် လက်နက်တွေကို အသုံးပြုခဲ့တဲ့ ပုံစံအတိုင်း တိုက်ခိုက်ဖို့အတွက် ဒီလက်ယာစွန်းရောက်အဖွဲ့က စီစဉ်ခဲ့ကြတယ်လို့ ဂျာမန်မီဒီယာတွေက ထည့်သွင်းဖော်ပြခဲ့ပါတယ်။

ရဲတပ်ဖွဲ့ရဲ့ စောင့်ကြည့်မှုကို ခံနေရတဲ့ အဖွဲ့ခေါင်းဆောင်ဟာ ပြီးခဲ့တဲ့တစ်ပတ်က အဖွဲ့ဝင်တွေနဲ့တွေ့ဆုံကာ အစီစဉ်အသေးစိတ်ကို ရှင်းလင်းပြောကြားခဲ့တာပါ။ ဂျာမနီရဲတပ်ဖွဲ့ဟာ အသွင်ယူတပ်သားတစ်ဦးကနေတစ်ဆင့် ဒီသတင်းကို ရရှိခဲ့တာ ဖြစ်ပါတယ်။

ပြီးခဲ့တဲ့နှစ် ဇွန်လမှာ ကွန်ဆာဗေးတစ် နိုင်ငံရေးသမား Walter Lübcke အသတ်ခံရမှု၊ အောက်တိုဘာလအတွင်းက နိုင်ငံအရှေ့ပိုင်းမှာ ဂျူဘုရားကျောင်းတစ်ခု အကြမ်းဖက်တိုက်ခိုက်ခံရမှုတွေ ပြီးတဲ့နောက် ဂျာမနီအာဏာပိုင်တွေဟာ မြေအောက် လက်ယာစွန်းရောက်အဖွဲ့တွေကို ပိုမိုသတိထား စောင့်ကြည့်ခဲ့ပါတယ်။

လက်ယာစွန်းရောက်အဖွဲ့တွေနဲ့ ပတ်သက်သူ ၅၃ ဦးကို စိုးရိမ်စရာကောင်းပြီး အကြမ်းဖက်တိုက်ခိုက်နိုင်ခြေရှိသူအဖြစ် ဂျာမနီရဲတပ်ဖွဲ့က သတ်မှတ်ထားပါတယ်။

Ref: The Guardian